VALETI 15

1Naasa elyi numa kyeeri kya fimu fya nganu, Samson kandesaiya nka yeto wakwe, keenda eerye mburu, kaammba, “Mmbo nshaangaa efo mmba kwa nkaakwa.” Lyo ndeye-a-nka kalema. 2Ndeyaanka kammbia, “Yeny mmbo sheeishi mmbo kulemuswa deny nkyo kimaruma shanniinngya mbuya afo. A mwanawo kulollye ninsha ngota we ndi? Ipoo yeto nave we nkaa-fo ando a yeto.” 3Samson kammbia, “Tura yei yeny nshitiri mbese na Vafilisti-fo, mashika lyo nkuti shivavie ukasha.” 4Samson kakuboo kandetira mabarwe mayana araru, numa keeboo fimwii fya muro kafifinngya efo mikyeny ya vayo ivii ivii, kayaatyany muro. 5Kooka-fo kalekeyany mabarwe yoo akeera efo mareminy a nganu a Vafilisti, ekimaa yaatya muro, na miri ya mafura nayo ikaveeya. 6Naasa Vafilisti vakaammba, “A mbovi yeto alutannya indi?” Vakaammba, “Ni Samson yeto nkwe wa Mtimna mashika elyi ndeye aleniinngya nndu ungyi nka wakwe.” Nalyo Vafilisti vakandemamita nka yeto na ndeye na muro. 7Nawe Samson kavavia, kwakooya mwatana findo fya ngata yeyo nkuti neeny shimutaiye, shimandeny. 8Kavakaba nnu deny, kasoka kandekaa ando ngereko ya iwe itiri yaanga iniini kulya Elamu.

Samson Avinga Vafilisti

9Naasa Vafilisti vakarwa vakandemanya ulale kulya urukeny lwa Yuda fika Lehi. 10Vandu va Yuda vakaammba, “A nkyiki elyi mukunndye ikabana neese?” Vakaammba, “Mmbo lwasha naambo lusheavika Samson, luntannye shaasa nawe alelutannya yese”. 11Llyo vandu fiku firaru va Yuda valesoka na kulya Elamu yaangeny lya iwe, vakandevia Samson, “Kwiishi-se sheelyi Vafilisti mmbo valushillye? A nkyoki yewe kulevatannya?” Nawe kavavia, “Shaasa valeshitannya wo, niindo neeny shilevatanya-wo.” 12Naasa Vayuda vakammbia, “Yese mmbo lwasha lushekwaavika neekurammbikya Vafilisti.” Samson kavavia, “Shilyiyyeny mboo sheelyi mmushiwaa yeni muveni-fo.” 13Vakammbia, “Nkisha, lyo mmbo lukwiinivaa deny, lukurambikye kwawo; lyo yese llukuwaa-fo.” Naasany vakamfinga na fyoove fivii fiyya, vakamuuta efo iweny eekai.

14Kyeeri Vafilisti vellollya efo Lehi vakoongora woose. Nalyo mumuyo wa Nndumi Iruva ukansheya na finya nnu, na fyoove filya ekeemfinge nafyo fikeelela fikava sha ngatani yakorwa na muro, nafyo fikaangarya yoo si. 15Naasa Samson kalollya iffwa lya yuundu lya nshungu, kalyiipoo neekapa nalyo vandu kyiku. 16Samson kaammba,

“Ni iffwa lya nshungu shilekaba nalyo vandu kyiku,

Shavafwafwala vakakuumbya nguru nguru.”

17Eekimaa irera keera iffwa llya lya nshungu efo, nang'u ando alya akavaangwa Ramath-lehi.#15:17 Ramath-lehi: Irina elyi Kiebrania ni Ifumbu lya yuundu. 18Nalyo Samson kaakuka nnu, kavaanga Nndumi Iruva kaammba, “Yewe mmbo kukeeluniinga ukiro wokony lwa nsero wafo, neeny ulaalu mmbo shiifo shiwaawaa nnyura, shitirwa ulaalu mmbandu valaishi Iruva.” 19Nawe Nndumi Iruva karauwa yoo si yoo Lehi, mura ukarukau, nawe Samson ekimaa ina, kawuiyo mmuu, kafura, nang'u ando allya akavaangwa, Enhakore, nang'u mmbo kulollyo alya Lehi fika inu. 20Nawe kava mwileta Israeli ando a myaaka makumi avii kyeeri Vafilisti veetiri ushillyi.

Currently Selected:

VALETI 15: MAS2

Highlight

Compare

Copy