VALETI 2

Nsu wa Nndumi Iruva Kulya Bokimu

1Naasa nsu wa Nndumi Iruva kasha Bokimu ooka Gilgali kaamba, “Mmbo shilemusaamisa shilemuuta Misri shamweende urukeny yelu shilevikya vande vany kyaasa, llya shileamba, Yeny nshishefishaa kyaasa kyakwa shilevika na vandeye vany-fo. 2Nkyo neeni mulavike kyaasa na vandu va uruka yelu-fo. Sammbweny fitara fyawo fyeerasya. Lyo yeni mmuleshiita-fo. A nkyiki elyi muletana indi? 3Naasa nkyo kileengye shaamba, Nshishe vaumbutaa vauke kwany-fo. Mmbo vashemukaya vavake mwiinga neeva nreiyo kwany, na maruva awo ave nsindara wany.” 4Naasa nsu wa Nndumi Iruva ekimaa ivia vandu va Israeli woose marero yoo nawo vakakapa kiiyo. 5Vakafishya ando alya irina ni Bokimu. Vakauntya-u Nndumi Iruva kiraso.

Ufu lwa Yosua

6Naasa Yosua ekimaa isama vandu yewo, wo ufyari lukeenda wo nndu ding'uny yakwe. 7Vandu yewo vakarunndya Nndumi Iruva kyeeri kyoose kya Yosua, na kya vamiku yewo valelollya mashora a ngyende Nndumi Iruva aletannya Israeli. 8Naasa Yosua mwana wa Nuni akee nsero wa Nndumi Iruva, kafwa eekee wa myaaka iyana na ikumi. 9Nawo vakamwaara ireminy lyakwe alya Timnat-heresi, kulya urukeny lwa mafumbu lwa Efraimu taari ya ndoo ya ifumbu lya Gaashi. 10Nawo vandu va irika elyo vakasia neendesanga na vande vawo. Naasa llyo kulekwiiboo-fo irika lyingyi lyilaishi Nndumi Iruva, nta valaishi kya fyoose Nndumi Iruva aletannya Israeli.

Israeli Valema Yiinndya Nndumi Iruva

11Naasa llyo vana va Israeli valetana meesi mbee ya Nndumi Iruva vakeenndya maruva a wongo mmbo Mabaali. 12Vakara Nndumi Iruva wa vande vawo yeto alevauta kulya Misri, vakainndya maruva a vandu valya vekee kwawo efo neefo, vakafuluta Nndumi Iruva na unyafi. 13Mmbo valera Nndumi Iruva vakawuya yiindya Baali na Mashitoreti (mmbo maruva a kyuumi na a kyika). 14Nawe Nndumi Iruva karooyo ni unyafi kavavika maakony a vakiduva vawo vengyi vawo vakakummbwa, nta valakidimi-se ikabana na vakiduva vawo, 15Wo ando vekeenda Nndumi Iruva kavakaba, shaasa llya emmbavia, nawo vakasavaa nnu deny. 16Naasa llyo Nndumi Iruva alevika-fo vandu vavaangwaa Valeti, mmbo yewo valevaauwaa makony a vandu yewo valevakamara mifungwa. 17Nalyo nta valakunde yaarannya valeti yewo, vakeengera ilatya maruva a wongo, neveenndya, vakara uviny indo-dwa shia ilya ya vande vawo shaasa valetira mavavaso a Nndumi Iruva lyo wo vakalema, 18na Elyi Nndumi Iruva alevavikya valeti yewo, Nndumi Iruva kakaa nawo, kavaringa kyeeri kyoose kya valeti yewo, kavaauwa maakony a vakiduva vawo, mashika Nndumi Iruva mmbo alevalyillya elyi alelola shaasa vakiduva vawo valevasisya neevasaveesa, 19lyo kyeeri mwiileta nsongorualefwa, wo vakawuya iva varavi ngota elyo mbee llya vande vawo, veesoraa maruva engyi, veenndyaa, nta valakunde ira shia tawo shiravi nta uumu lwa mirima yaawo

20Nndumi Iruva karooywa ni unyafi kimaruma kya Israeli, kaammba, “Kimmba vandu yeva vafisha kyaasa kyakwa shilevika na vande vawo nta valaarannye unyanga lwakwa,” 21kyasia neeny nshisheumbutaafo vandu yewo va masanga veefo uka Yosua nalandefwe-fo. 22Shitani indo shiveese kwakooya vashiindukaa vasore shia yakwa ao ode. 23Naasa Nndumi Iruva kavareeya vandu valya va masanga kyaasha nalavaumbuta, nta Yosua nnyalevavasywa navakabe-fo.

Currently Selected:

VALETI 2: MAS2

Highlight

Compare

Copy