YAKOBO 5
5
Wiikyimbi kwa Masimba
1Naasany-te yeni masimba iyeny, moongore kimaruma kya nyinyira yeyo imusheyaa. 2Masaa any mmbo akee mapooru, na soori tany mmbo tikee shilye nkurukuru. 3Saabu yaany na fesa yaany mmbo yantirwa nkurere, na kurere ya vayo mmbo ishemusutaa, ishelya miili yaany sha muro. Mmbo mwankuvikya kiraambu kya nkonu wa ifurumya. 4Loleny-te, weesi lwa varemi yewo valeilula marema any mukalurwaa na ntambo, weesi yelo mmbo lukeevaanga, na fiiyo fya yewo valeilula mmbo fileanga marwiny a Nndumi muni matorito. 5Mmbo mukeekureka ulaniny, na ikushangala efo langony ta mwiili, mukawuutisa mirima yaany indo. 6Mmbo mukeyuutya yeto wa usumanu uvingo mukammbwaa, nta nalashidimaa isalala na yeni.
Usisiryo na fiterewo
7Kimmba ni indo nyira, sisiryeny kufike nkonu eto Nndumi ashaa. Mwiishi, nremi mmbo avereyaa na nsia fimu fya uruka fikee fya wuuru, kavereya kimaruma kya vayo kutani fimu fyawonisa mbua ya mbee na ya ifurumya. 8Na yeni kevesisiryeny-te mukaarise mirima yaany, mashika isha lya Nndumi mmbo lyikee kufii.
9Nyira, mulakunung'uni-fo, naambo mulasheutywa uvingo. Loleny-te, mwileta mwaandu nyoo mwaangony akai. 10Nyira, soreny vakisuku valya valerera na irina lya Nndumi, vave kyaaso kya yewo vasumani iwona makasha, vavesisirya. 11Loleny-te yewo veevereya mmbo lwavio vatiri ngoma. Mmbo muleeta mbony ta usisiryo lwa Yobu, mukavelollya shaasa Nndumi atana yoo mafurumyony, sheelyi Nndumi mmuni ulyilyi na muni isarya.
12Kyaindi mmwasi ya efyo fyoose, vanavama, mulalye mboo-fo, nta na iruveeu nta na ulana-fo, nta na ngata ingyi-fo, kyaindi yee yany ive yee na oode iveva oode, naambo mulasheanga uvingony.
13Kwakooya nndu waany awa rengeny, natereve Iruva. Kwakooya akyesye nriminy, eembe fiimbo fya yaarafuma. 14Na kwakooya nndu wa kwany alwee navaange vamiku va siri; nawo vashenterevya na imwaamba mafura meele na irina lya Nndumi. 15Na itereva kwa kyikusiryo mmbo lyishekiraa nndu yeto alwee na Nndumi namwipoo, na kwakooya elyamarye nakooye isaryo. 16Kuryeny ngyulyamari tany muweni na veni na iterevyana, naambo mukooye ishiiswa. Itereva lya nndu wa usumanu mmbo lyikee isha nnu, kwakooya atereva na sina. 17Nkisuku Elia mmbo ekee nndu wa ngata yeeru yese, katereva na sina mbua ikamanda; mmbwa ikara ilakapa ando a myaaka iraru na kyenga. 18Kooka-fo katereva-se, kulya iruveeu kukarwiika mmbwa ikakapa, na uruka lukaende ndunda ta vayo.
19Vanavama, kwakooya nndu waany ameenda mbai neekywa kyikee kya dede, na ungyi kansongosia, 20manyiny sheelyi yeto asongosyaa nndu allyamara kutani ooka efo shieny yakwe ya ureti, mmbo akira nrima ukie ufu, na isikya ulyamari wiingyi.
Currently Selected:
YAKOBO 5: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
