1 PETRO 1
1
1Yeny Petro, Nrumi wa Yesu Kristo, shamureiya yeni Vakristo munyanyakye mukakaa kundo kweny efo Ponto na Galatia, Kapadokia na Asia na Bitinia. 2Shaasa Iruva Nde alesongwa imumanya llya alemwiilyisa na Mumuyo, mukatana mwakunyiisa mukaletywa samu ya Yesu Kristo. Nndumi namweengerye urilalyi na isarya.
Ivika nsia lyivangi
3Iruva naitikiswa, we Nde wa Nndumi weeru Yesu Kristo, yeto alelwiira lya kavii kyuuka na isarya lyakwe naambo luwoni ivika nsia elyo lyeende muu kimaruma kya iruka lya Yesu Kristo auka kwa vafu; 4Naambo luwoni ding'u yeyo ilalyamarikaa, ilatiri ivara, ilashuumaa, ikeeshisurumi iruveeu kimaruma kyany. 5Na yeni mmbo mukeeringwa ni finya ya Iruva kimuukya kikusiryony kutani mwawona ukiro yelo lushelollywa paa kyeeri kya ifurummya. 6Mmbo mufuraa nnu kyeeri ekyo, na kyikava ulaalu kyeeri ekyi kifii mmbo kimukooye irovyo ni fyeeso fya ngata shive na shive. 7Naambo elyi kyikusiryo kyany kyisheeswaa, nakyo mmbo kiilanyi saabu shoose yeyo yeeswa na muro, kushe nnduma na itumbe na wiindi, elyi Nndumi Yesu Kristo ashelollywa paa. 8Nawe mmbo munkundye, lla elyi mulandellollye na miso, na kyikava mmullollye ulaalu, lyo mumwiirikye, na ifura nawe nnu deny ifura lyilavaa imina nta, ifura lyitiri itumbe, 9kya iwarya ekyo mushefurumya nakyo kya iirikyo lyany, llo ukiro lwa mirima yaany. 10Kya mbony ta ukiro elo vakisuku mmbo valeruuya-ruuya, nesununda-sununda, vakaawuya kisuku kya isarya elyo lyishekaa lyimusheye yeni. 11Vakaruuya ni indii na ni kyeeri kyi kileorwa ni Mumuyo wa Kristo yeto ekee nnang'ani yaawo, yeto alepooka ikureekya makiva yoo ashekoyaa Kristo, na itumbe elyo lyisheshaa numa ya vayo. 12Vakaorwa sheelyi nshi kimaruma kyawo veni-fo, kyaindi kimaruma kyany nkyo vakafurukannya efyo, na mfyo muleongoywa ni valya valemoongoya Nrumi ya Nsia vekaywa ni Mumuyo Mweele yeto alerumwa auka iruveeu. Mbony eti naakwa ni vasu mmbo valangye itilola.
Uvaango lwekaa na Muu nsha
13Kyasia, kaaryeny efo miriminy yaany, muve na mwiina findony fyany muvikye isarya elyo nsia deny eto muleorwa paa lya Yesu Kristo alesha. 14Veny sha vana vatiri wiindi mure mulasora lango tilya ta mbee teeriyani na utondo. 15Muvevaka yeto alemuvaanga akee mweele, neeni muveva veele efo mikaayeny yaany; 16kimmba kyikee kyireiye indi, mmbo mushevaa veele shaasa neeny shikee mweele. 17Na kimmba mwambaanga Nde, nawe mmbwe yeto ashaanduyaa wo nndu kulaifo ikundya shaasa akunda we muni, naasa kaeny na usau kyeeri ekyi mukee yaa ulaniny mukee veny. 18Muvemanya sheelyi nshi mulewowowa na findo filyamarikaa-fo, sha fesa ao saabu, naambo muuke efo ngaany ya ureti mulewarya kwa vande vany-fo. 19Kyaindi mmbo mulewowowa na samu ya wuuru, sha ya ngurana ilatiri ivara nta mfere, nnyo ya Kristo. 20Nawe mmbo aishiwa deny uka elyo mbee kulaore ulana elu lwemmbeiywa, nawe kaorwa paa fyeeri efi kimaruma kyany. 21Yeni muleirikya Iruva kyeendwa mmbwe, nawe mmbo alennruta auka ufuny kaniinga itumbe, naambo muwoni kyikusiryo neevika nsia efo kwa Iruva. 22Mukammaa ikwiilyisa mirima yaany na iirikya dede yeyo, muvefikya ikunda lya Kikristo lyilatiri ukunang'ari, mukundani na nrima. 23Mashika mmbo muleirwa lya kavii, nshi kyuuka ufyariny yelo lukeesia-fo, nkwa yelo lulasiaa, na irero lya Iruva lyitiri muu, elyo lyakaa llung'anu. 24Mashika,
Mwiili wa nndu mmbo uvakye mare,
na itumbe lya vayo lyoose nkimwi sha kivaro kya mare,
mare mmbo ashumaa na kivaro kyaangare.
25Kyaindi irero lya Iruva mmbo lyakaa-u llung'anu. Na irero elyo ni irero llya isha lyileongowa kwany.
Currently Selected:
1 PETRO 1: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
