YAKOBO 4
4
Umbuya na ulana yelu
1A fira nkwi tikeyuuka ando amwi na ngapanu eto tikee kwany? A-nshi kunu kwany kweni efo langony eto tikapanaa na malungo any? 2Mmbo mukee ilanga, lyo mulatiri kindo, mukawaa na ilollya kinying'u, nta mulawonisaa kindo. Mmbo mwakapana lyo mmuwonaa kindo-fo mashika elyi mulaterevaa! 3Naakwa mwatereva, mmuwonisaa-fo mashika elyi muterevaa kikasha, naambo murundye nafyo lango eto tany. 4Yeni vetuusa, a mmbo mulaishi itira mbuya na ulana ni iva nkiduva wa Iruva? Nkyo wo nndu akunda iva mbuya ya ulana mmbo akwallwa nkiduva wa Iruva. 5A ndesa mareiyo mmbo arera kya ruu? Mumuyo yeto akee nnang'ani yeeru mmbo alulangye kindo kyamaa yeende kififi? 6Kyaindi mmbo alusimba yese isarya elyo lyiilannyi kyeeso; nkyo kaamba, Iruva mmbo akingya yewo vekung'anisa veni, kaniinga yewo vakunyiisye isarya lyakwe. 7Kikeeny indo indyeny Iruva. Umbuteny mmbishwa, nawe mmbo ashemurishaa. 8Serikyeny kufii na Iruva nawe mmbo ashekaa kufii na ini. Maako any nalatani makasha-fo, kimmba mulakee va nrwe umwi. 9Muverovyo nting'wa na ikapa kiiyo. Ikyesa lyany lyaaluke kiiyo, na ifura lyany lyive yaanguywa. 10Kunyiiseny mbee ya Iruva Nndumi naambo nawe namurose.
Yuutya vengyi uvingo
11Nyira vanavama, mulavikyani ureeree-fo, yeto mwivikya ungyi ureeree ao imuutya uvingo mmbo avikya usumanu ureeree na iluutya uvingo. Nkyoony kwammuutya usumanu uvingo nkwatana kya usumanu-fo, mmbo kwankwallwa mwirumbwa myaandu. 12Mwiniingya usumanu akee na mwirumbuya vandu mwaanduny ni umwi nsi, mmbwe yeto ashidimaa ikira ao irumata. A-ni yewe vi kwaidima yuutya ungyi uvingo?
Ikurosa
13Kyasiany-te yeni mwambaa, “Inu ao ndesi mmbo lushendaa muriny mmbe na ikaa-fo ando a mwaaka sele, lukapye-fo mbusha na iwona masaa”; 14lyo nta mmwiishi mbony ta ndesi-fo. A muu wany mmbo ukee inda? Mashika yeni mmbo muvakye murwe wa mura ulollyo ulaalu-da numa mmbukiyo-fo. 15Yeni ando a yaamba, “Kwakooya Nndumi akunda, mmbo lukaa-u lwitanaa kive na kive”, 16lyo ulaalu mmbo mwakurosa mwirumanaa, ikurosa lyoose lya ngata yei mmbo lyikee ikasha. 17Kyasiany yeto eeshi kyisha kyeetana nawe kara nalakitana, kwakwe yeto ni ulyamari.
Currently Selected:
YAKOBO 4: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
