YAKOBO 3
3
Ulumi
1Vanavama, mulakuvike velosha muveni, mashika mmbo musheutywaa uvingo uniini nnu. 2Mashika mmbo lwawona misindara yese loose keengyi nnu. Nndu nalawonaa nsindara efo mireryeny yakwe, yeto ni nndu nsongovisi, yeto ashiidimaa ilammya mwiili wakwe moose. 3Mwiishi mmbo frasi tivikwaa ukova kaniny naambo tisore kilya lukunndye, na itiinduta teende efo lukunndye. 4Lyingyi loleny shaasa ngalava ing'ani, na irawa ni ngyuraato niini, mmbo tiindutwa ni uvirii unnywa nsele ikeenda kundo koose efo nsongoru akunndye. 5Naakiwo na ulumi niindo lukee kilungo kidu, lyo mmbo lweendee ikurosa iniini nnu. Loleny shaasa muro munnywa ukoraa nsito nniini nnu. 6Ulumi nalo mmuro, ni uravi lukwaani koose, ulumi mmbo lukee kilungo kyeru, kyaindi llo lutefusaa mwiili moose, nalo mmbo lwaataa muro ularumikaa uvakye wa gehena. 7Mashika wo ngata ya ifisi, na ya ndeye, na ya fyuumbe firufukaa si, na yefyo fikee yeeveny, fyoose efyo fivaa ilammya fivikyo, nafyo filemmaa yaavikwa ni vandu. 8Lyo ulumi lluvee yaavika-fo, ni uravi lulamalallyaa, mmbo lwiishwe uroi lweende ufu. 9Mmbo lwidimaa iindya nalo Iruva Nde weeru, lukavewuya idenga nalo vandu valya alevaumba kwa fwana yakwe. 10Kaniny ekyo kyeni mfo kushuukaa mbora na kidengo. Vanavama, nkivaa kive indo-fo. 11A ndesa usoka lumwi lwidimaa yuuta mura nsha na mura wa mmbala? 12Vanavama, ao ndesa nri wa nkuu ushidimaa ivika ndunda ta mafura, ao nsabibu uvike ndunda ta nkuu? Kiwo indo-da usoka llushidimaa yuuta mura wa mmbala na mura nsha-fo.
Urango lwa kiiruvee-u
13Mmbi kwany araiye urango na umanyo? Naasa yeto noore mashora akwe a ngaa shisha, ekee na ufoo na urango. 14Lyo mukantira kififi na irovyo miriminy mwiruyaa myaandu, naasa mulakuroseeny-fo, nta mulasande wongo na dede-fo. 15Urango lwa ngata yeyo lluukye uwe-fo, llwa kiulana, lwa ngata ya kivandu na lwa kimmbishwa. 16Mashika ando kukee kififi na myaandu, nng'u kuiyo mirauko na wo ngata ya uravi. 17Kyaindi urango luukye kwa Iruva mmbo lukee usha, lwa urilalyi na ufoo, lwa waarya, lulangye yarannya vandu vengyi, lukaishwa ilyillya na itira ndunda shisha, lulatiri uriingyi, nta lulatiri ukunang'ari. 18Ndunda ya usumanu mmbo yavaankywaa ni urilalyi kwa yewo veende urilalyi.
Currently Selected:
YAKOBO 3: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
