YAKOBO 2
2
Wiikyimbi kya irauwa vandu
1Nyira vanavama, mulashetira iirikyo elyi lya Nndumi Yesu Kristo akee Nndumi wa itumbe kyikee kya ikundya vandu maata-fo. 2Mashika mmbo lulolyaa kwakooya aanga nndu efo mwiindyeny aree pete ya saabu na soori shisha; elyi yeni naange nafo nndu nkiva, aree soori shikuu. 3Na yeni mukaniinga ulya aree soori shisha wiindi, na immbia, “Yewe kaa rembo yaa kusha.” Na ivia nndu yeto nkiva, “Yewe salala alya, ao kaa ya si marendeny akwa.” 4A ndesa mmwatana kindo kitiri teve miriminy yaany, mukavetira makusaro matefusu a yaava vandu? 5Vanavama vakunde, aranyiny-te, mwiishi sheelyi Iruva mmbo alesauwa vakiva va ulana yelu vave masimba a iirikyo na veni ding'u ya umangyi yelo adeerye kyaasa yewo venkunda? 6Kyaindi yeni mukamina vandu vakiva. A vandu masimba nshiwo yewo vakee imufota na imurwaa mundeutyo uvingo? 7A ndesa nshi vakee yaarara uvaango lwany? 8Kyaindi lyo kwakooya mwainutya ivavaso elyo lyisenyi llya lyikee ireiye indi, “Kunda nndu ungyi shaasa kukukunndye kumuni,” mmbo mutanaa nisha. 9Lyo kwankooya mmbo murauwaa vandu mwivakundyaa, mmbo mwatana kya ulyamari na yeni mmbo musheutywaa uvingo mwikee verenga. 10Mashika wo nndu asheringaa mavavaso moose, lyo kafisha-u lyimwi nsi-da, mmbo amfisha moose. 11Kimmba yeto aleamba, “Kulatuuse”, mmbwe yeto-da aleveamba, “Kulawae.” Kyasiany kwakooya kulaore kwatuusa, lyo kwawaa, mmbo kwamfisha mavavaso. 12Rereny na itana sha vandu yewo valeke mmavavaso. 13Mashika uvingo llutiri usari kwa yeto nalasaryaa-fo. Isarya vengyi mmbo lyitiri itumbe ngota yuutya uvingo.
14Nyira vanavama, mmbo kwiiyo mbusha kyi kwakooya nndu aamba atiri iirikyo, lyo nalatanaa nta kindo? A-ndesa iirikyo yeni lyishidimaa inkira? 15Kwakooya nndu weeru wa kyuumi ao wa kyika nalatiri kyeraa ao anguywa nkya ilya, 16na nndu wa kwany navavie, “Kweengyeny na ufoo, mundeora muro na iwuura, lyo nare nalavanniinga filya fivaanguye, mmbo kyeekya-u-kyi? 17Na kiwo-da na kyikusiryo, kwakooya kilatiri mitannyi misha mmbo kifiiye.” 18Lyo nndu ashidimaa yaamba, “Yewe kutiri kyikusiryo, na yeny shatira mitannyi misha. Shoorany kyikusiryo kyafo kilatiri mitannyi, na yeny shikoore kyikusiryo kyakwa na shia ya mitannyi yakwa. 19Nkisha deny elyi kwiirikye sheelyi Iruva ni umwi. Naakwa ni mmbishwa na vasu vakwe veerikye indo na ireremya-u. 20Kyaindi langa imanya yewe nndu wa vandu kulamaye nta kindo, sheelyi kyikusiryo kilaryani na mitannyi nkitiri ndunda? 21A nde weeru Abrahamu nshi aleekenywa usumanu kyuukana na mitannyi misha, llya aleniingya mwana ulya wakwe Isaki kava kiraso? 22Yoo mmbo lwalollya kyikusiryo mmbo kilerunda mashora ando amwi na mitannyi yakwe, na kyikusiryo kilya kyikavangiswa ni mitannyi ilya yakwe. 23Mareiyo alya akainutywa alya eambaye, Abrahamu mmbo aleirikya Iruva, kyikava nkyo kyamweekenya usumanu, kavevaangwa Mbuya ya Iruva. 24Mmbo mwallollyany sheelyi nndu mmbo asheekenywa usumanu kimuukya efo mitannyiny yakwe, nshi kyuuka na kyikusiryo kyeni-da-fo. 25Naakwa Rahabu nawe, we nka ulya ntuusi a mmbo kulore aleekenywa usumanu kya mitannyi yakwe, llya aleworya varumi valya nisha, na ivakira evasomutaa na shia ingyi? 26Kyasiany, shaasa mwiili wamfwa elyi mumuyo ulaiyo, ni indo-da na kyikusiryo mmbo kifiiye kwakooya kulaiyo mitannyi misha.”
Currently Selected:
YAKOBO 2: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
