YAKOBO 1
1
Fiidikiro
1Ni yeny Yakobo, ishinga lya Iruva na Nndumi Yesu Kristo, shamureiya na imwidikira nnu yeni ngyufyari ikumi na ivii ta Israeli tinyanyankye.
Kyikusiryo na urango
2Vanavamaye vakwa, lollyeny sheelyi ni ifura yeni kyeeri mwavikwa fyeesony five na five. 3Mwiimanyaa sheelyi kyikusiryo kyany kyikambikwa kyeesony mmbo muwonaa ivika nsia. 4Ivika nsia lyoore usongovisi lwa vayo, naambo mukooye iva vasongovisi na vasaari mulakee vaanguye nkindo.
5Lyo nndu wa kwany kaanguywa ni urango, atereve iruva yeto aniinga woose kwa vingyi, nta nnyakyeemmya-fo, nawe mmbo aniingwaa. 6Lyo natereve etiri kyikusiryo deny, nalatirwa nnyinyira nta shinnywa-fo; mashika yeto atirwa nnyinyira mmbo avakye matundulu a mura avivitwaa ni uraato, evivitwaa efo na efo. 7Nndu wa ngata yeyo nalasheekusara awonisaa kindo efo kwa Nndumi-fo. 8Nndu akee ilasa kuvii mmbo atirwa nnyinyira shieny takwe toose. 9Kyaindi nndu nalatiri nnduma we nafure mashika we ammaa ing'aniswa; 10kyaindi kimmba isimba lyansisirwa mmbo lyivakaa kivaro kya mbuveny ekyo kisherumakaa. 11Mashika elyi mwi wavaa mmbo ukoraa mare, kivaro kya vayo kikaangara, na usha lwa vayo lukareka, isimba ni indo kishendaa.
Fyeeso
12Ngoma ni ya yeto asisirya fyeeso; mashika elyi ammaa iirikywa ni Nndumi mmbo ashewonaa ureto lwa muu, yelo Nndumi adeesye yewo vankunndye. 13Kyeeri nndu akee yeeswa nalasheamba, “Ni Iruva akee isheesa.” Mashika Iruva nnyeswaa ni uravi-fo, nta we muni nnyesaa nndu-fo. 14Mashika wo nndu mmbo eswaa llango takwe muni timoommwaa na illemba. 15Lango ilya ikammaa ivanga ikeende ulyamari, na ulyamari llwa lukankuvamba lukaende ufu. 16Vanavama vakwa vakunde, loleny mulalembike. 17Wo ngata ya iniingya yeyo ikee shisha, na wo kindo kyaniingywa kyikava kisongovisi, mmbo kyauka kwa Iruva, yeto muni sa, yeto kwakwe kulaifo yalashika, nta iveruka-veruka. 18Llya alekunda we muni mmbo alelwiira kyeendwa ni irero lyakwe lya dede, lukava vasongoru va fyuumbe fyoose.
19Efyo mufiishi ninsha, vanavama vakunde, kyasiany wo nndu nave mwaangu yaaranya, lyo nalave mwaangu irera ao iswa-fo, 20mashika unyafi lwa nndu wa vandu llutanaa fya usumanu shaasa Iruva akundye-fo. 21Kyasia kwiiseny deny na uravi na ukasha lwa wo ngata, mukooye iwarya irero llya lyilesongwa kwany mukee vafoo sau, nalyo llyo lyisheidimaa ikira mirima yaany, 22Lyo veny vandu vatanaa kindo nta nshi vearanya-da-fo, mwilembikaa muveni. 23Mashika, kwakooya nndu ava mwiiranya-da nalatanaa, nndu wa ngata yeyo mmbo avaa sha nndu akulolaa yoo kiloleny. 24Mashika nndu mmbo akulolaa kawuya kakweengya, karekyo shaasa akai. 25Kyaindi nndu yeto ammaa iringa ivavaso elyo lyishyallwa nndu nave lleke na ilyitira, nalavaa mwiiranya arekywa, kyaindi kava mwiitana, yeto mmbo ashevaa wa ngoma efo mirundyeny yakwe. 26Kwakooya nndu moose akusara mmbo eshi Iruva, lyo nalasiraa ulumi lwakwe, kava indo mwikulemba we muni, ngata ya nndu yeto nshi yemanya Iruva-fo. 27Imanya Iruva lya dede lyilatiri kiteve mbee ya Iruva Nde llyo elyi, “Ni indesaiya vana va ngwera na vaka va ding'u efo ngatareny tawo, na ikuringa kumuni kulawoni-fo fiteve.”
Currently Selected:
YAKOBO 1: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
