VAEBRANIA 13
13
Shaasa lushesenyaa Iruva
1Ukundi sha lwa vana va nka lukee-u. 2Mulare mulawarya veny-fo; mashika indo kwiifo vengyi valembwarya vasu va Iruva valaishi. 3Kummbweny yewo vakee vafinge kimwi sheelyi mukee vafinge nawo; neewo vakeesisyo da muveekye, kimmba neeni mukee vandu. 4Usando lwa nndu na nka luindyo ni vandu woose, na ando elala ashie; mashika vatuusi na vakirinda Iruva mmbo ashevautyaa uvingo. 5Mulatire ngaa yekunda fesa-fo; fureny neefyo mutiri; mashika we muni mmbo aleamba, “Nshishekwaanguyaa nta-fo, nta nshishekuraa-fo.” 6Kutani lwaidima yaamba,
Nndumi mmbwe mwishitarama, nshishiryaa-fo;
nndu wa vandu nkyoki asheshitannyaa?
7Kummbweny vasongoru vany, valya valemoongoya irero lya Iruva. Na lyingyi, mwiilolaa nnu masiiyony a ngaa tawo, musore kyikusiryo kyawo. 8Yesu Kristo ni we yeto muni da aiyoo, ukwau na inu na fika llung'anu. 9Mulashekurikwa ni ngyufundo tingyi shive na shive, na ta veny, mashika nkyisha nrima utumariswa ni isarya nta nshi shoonga-fo, mashika valya valeenda indo mbalewona-u pule-fo. 10Lutiri kitara kyerasya ekyo valya vakee ifurukanyau yoo yeemeny elyo valatiri mumu wa ilya findo fya vayo. 11Mashika findo filya samu ya vayo yeendwaa ando yoo eele ni nkohani nniini kimaruma kya ulyamari, firimbiti fya vayo mmbo fyakoryo efo kipoo ya ulale. 12Kwa kimaruma ekyi Yesu nawe naambo nailyise vandu na samu yakwe muni, mmbo alelyiswa ukyiva kipoo ya muri. 13Naasa lweende lunsheye kipoo ya ulaleny lwakwe, lwiirye uvingo lwakwe. 14Mashika yaa llutiri-u muri ukaa-fo, mmbo lukeeruuya ulya ushaa. 15Naasany, kyeendwa mmbwe, luniinge Iruva kiraso kya nnduma kyeeri kyoose, nkyo kyaamba, eto nto ndunda ta kana ekyo kyakeindya irina lyakwe. 16Lyo mularekywa itana fya usha na yaakana amwi-fo; mashika firaso sha efi mfyo fisenyi Iruva.
17Indyeny vasongoru vany neevatirya vio, mashika wo mmbo vakeelala rembo kimaruma kya mirima yaany, sha vandu vasheveswaa kyany, naambo vatani indo vemusongoyaa na ifura nta valarosaa uuwo, mashika nkishemukyau kyisha-fo.
18Luterevyeny; mashika lwiishi mmbo lutiri nrima nkesi, lukakunda itira ngaa shisha findony fyeru fyoose. 19Neeny mmbo shamutereva nnu mutani indo naambo shiviirwa kwany uviny.
20Naasany, Iruva wa urilalyi yeto aleviira Mwiisi Nniini wa ironda lyakwe auka kwa vafu, na samu ya kyaasa kya llung'anu, we Nndumi weeru Yesu, 21namusongovise yeni mutani wo kindo kyisha, mwiitanaa shaasa akundye; nawe natani efyo finsennyi nnang'ani yeeru, kwi Yesu Kristo, Nnduma mmbwakwe llung'anu na llung'anu. Amen.
22Lyo shamutereva vanavama, musisiryani na irero elyi lyirye wiikimbi; mashika mmbo shamureiya na marero maangu. 23Manyiny sheelyi mwanamaye weeru Timoteo alemmaa iporomuwa, nawe kansha uviny, mmbo nshekwanannyaa na yeni ando amwi nawe. 24Idikireny vasongoru vany woose, na veele woose; yewo va Italia nawo vamwiidikira. 25Isarya lyikae na yeni moose.
Currently Selected:
VAEBRANIA 13: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
