ISAYA 46
46
1Yaa mmasiiyony a maruva a Babeli Yeve iruva Beli kwammbwa, na iruva Nebo kwansambuka, mafwanu awo ansaamiswa uwe ya ng'umbe na findo filya mwekeyoondwa efo na efo ulaalu fyammba iryo; iryo lya irovya nshungu waaraye. 2Vankulema vakakulema woose kyimwi; lyo mmbaidima ikurrwa-fo kya indi wo vakarawo kifingyony. 3Shaaranyiny eni mmba ya Yakobo, eni mukee masaaro a mmba ya Israeli, shilemwiipoo uka kulaore mwammiirwa, mukavikwa ando a uve ukya elyo fika umikuny lwany, 4Yeny mmbwe naakwa ni kyeeri kya ukuu lwany shimwipoo, shiletana indo, ee da shishemwipoo na imukira.
5A mmbo mushiinanisaa na vi na ishaananisa nawe naambo lwiinane? 6Vandu vauta saabu yuuka mbolokony tawo na yeesa meseny tawo, vakavika varundi vandesongosya saabu vakaallwa nng'u maruva awo veefiryandi na iyaarafuma. 7Vashiipoo na iseleesa ando a vayo akasalala, eeda ashevangwaa, lyo nnyashidimaa irouwa nta imwauwa efo ukyiveny lwakwe-fo.
8Kumbweny efi, mundesalala kyuumi, umburaneny eni mukeilyamara. 9Kumbweny mbony ta elyo kasha, mashika yeny ni Iruva, nta kulaifo ungyi, Yeny ni Iruva kulaifo ainani na yeny. 10Mmbo shivambisye mbony uka mapookyony fika mafurumyony na ukya elyo kasha mbony kulaore tilentanyika shisheambaa. Usumanu lwakwa llo lushesalalaa. Nshishetanaa kilya kishisennyi yeny. 11Shavaanga ngoru uka taari ya ngama na nndu wakwa uka uruka lwa kwaasha, ee shammaamba, na yeny shishetanaa. 12Shaarannyiny eni mutiri ngoo shuumu, yeni mukee kwaasha na usumanu. 13Yeny shisheendee kufii usumanu lwakwa, llushekaa kwaasha, na ukiro lwakwa llushekyeywaa-fo; na Yeny shishevikaa ukiro efo Sioni kimaruma kya Israeli, usuri lwakwa.
Currently Selected:
ISAYA 46: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
