ISAYA 47
47
Uvingo lwa Babilony
1Osho, oloka kukee rembo efo kiluulyiny ewe mwana wa kyeny wa Babilony. Kaa sumbai kulaiyo kitima kya umangyi, ewe sambura ya Vakaldayo; mashika nkushekivaango-se mmamiri kukundye fya usuri-fo. 2Ipoo isewe, kuse nswa, kwaammbwe ngyireto tafo na masara afo. Lambara marende afo kwiire mura. 3Umbereto lwafo lushelollyo na usutu lwafo kumanyike. Shishetaiyaa kiduva, nta nshishewaryaa nndu moose-fo. 4Mwikira weeru, Nndumi Iruva wa matorito llyo irina lyakwe, mweele wa Israeli.
5Malallya sau, anga ireeminy eni sambura ta Vakaldayo; mashika nkushekivangwaa-se nka wa kimangyi-fo. 6Shetiri isswa na vandu vakwa, shatefusa umasi lwakwa shavavika maakony afo yewe; nta nkulevalillya-fo, mmbo kulevavika vamiku vawo mashoreny moomu deny.
7Nkuleamba yeve mmbo kuvaa nka wa kimangyi llung'anu, nta nkulekusununda kya efyo-fo nta kukumbwee ufishony lwa vayo-fo. 8Ulaaluny, arannya mbony eti, yewe mwiikunda utore, yewe kulollye kwiifo urilalyi Yewe kukulolye sheelyi yewe ni yewe na nkwiifo mmwaasi yafo-fo. Nshishekaa sha nka wa ding'u nta nshishefiywaa ni vana-fo. 9Kya indi mbony eti ivii tisheshaa kwafo nkonu umwi, kyeeri kyimwi, ifiywa na vana na mmi fishekusheyaa deny; usavi lwafo naakwa lwafumbuka, na vaanga lwafo na lukang'ana inda.
10Ni kimaruma yewe kukusirye uravi lwafo kwishambaa, “Nkwiifo ashilolye-fo; na umanyo lyafo na urango lwafo fyankureta, na yewe kwaamba nrimeny kwafo, ‘Yeny mmbwe, nta nkwiifo ungyi mmwaasi yakwa-fo.’ 11Kyeendwa ni ekyo, ukasha lushekusheyaa nkushidimaa ikwauwa-fo, na ting'wa tishekuroywaa nta nkushidimaa ikuutafo-fo; na ungwera kushekushingillyaa na pyany kulalwiishi. 12Salala ulaalu, na vaanga vafo, na wiingyi lwa usavi lwafo kulekulumba nalo ukya ukoo lwafo, kweenda ndesa kusheonaa-fo mbusha ao kungyi kushevingaa. 13Kwemaraa kya wingyi lwa mbony tafo, naasa vasalale ewo veeshi mbony ta nyinyiri, na imanya filya fishaa mwiiriny eto, vashekukira na mbony eto tikeeikusheya.
14“Lola vashevaa sha matungururu, vashemamitwa ni muro, nta mmbashekyaa-fo, nkushekaa-fo nta makaa erorwa nta yoorwa-fo. 15Ni indo kishevaa kya mbony eti kukee ikwaarisa nato. Valya kweekabaa nawo mbusha ukya ukoo lwafo vashenyanyakaa kwaasha neewe wo nndu neende kyakwe, nta kuleefo wa ikwauwa.”
Currently Selected:
ISAYA 47: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
