ISAYA 45

Nndumi Iruva asauwa Koreshi

1Yaandi nng'u marero Nndumi Iruva avia Koreshi, mesia wakwe, ulya antiri woko lwakwe usha, naambo nashilye masanga moose mbee yakwe, na yeny shisheelelyisa finya ta vamangyi na myaango myoose isheruuka mbee yakwe, nta nnyisheraywaa-fo, 2Nsheendaa mbee yafo sheeremute ando kukasha, shipapare myaango ya minya na ifishafisha malungo a vayo. 3Na yeny shishekuningaa ulyilyi lusurumi ireeminy, na usimba lusurumi ando a kirika naambo kumanyi sheelyi ni Nndumi Iruva, shilekuvaanga na irina lyafo, ee da Iruva wa Israeli. 4Kimaruma kya Yakobo, ishinga lyakwa, na Israeli nsauwe wakwa shilekuvaanga na irina lyafo, shakuniinga irina lyitiri itumbe, lla na shaasa kulare kuleshimanya.

5Yeny ni Nndumi Iruva, nta kuleefo ungyi mmwaasi yakwa nkwiifo Iruva ungyi-fo. Shishekuvikaa ukova lla neelyi shaasa kulashiishi. 6Naambo vamangyi uka taari ya ngama fika taari ya nkwaany vamanye sheelyi nkwiifo mwaasi yakwa yeny ni Nndumi Iruva, nta kulaifo ungyi. 7Ni yeny shatana sa na ireema na yeny sheende na urumato. Yeny ni Nndumi Iruva shitanaa efyo fyoose. 8Shoolotyeny eni ng'ina uka uwe, mafishi apuswe usumanu, uruka lusiikwa naambo ashoshote usumanu na iwona usumanu; myooro imye, ni yeny Nndumi Iruva shileumba.

Nndumi Iruva muumbi na mbony ta vayo

9Oshiny lwa yeto akweesa na muumbi wakwe. Ni woyo lumwi nnang'ani ya ngoyo ta ulana. A ndesa uteri lusheviaa eto muumba uteri nkyoki kuketana? Ao immbya mashora afo nya-ruu. 10Oshiny lwa mwana avia ndeye; nkyoki kuleira? Ao nndu nka, “Nkyiki kutiri mavina a ufee?” 11Nndumi Iruva, mweele wa Israeli, na yeto muumbi wakwe aamba indi, “Shivesa mbony ta efyo fishaa mbony ta vana vakwa, na mashora a maako akwa naasa shivavasye. 12Ni yeny shiletana ulana, shaumba nndu wa vandu; Yeny, eeda na maako akwa yeny, shaalafo ng'ina na nsemu wa vayo shauvika. 13Yeny shansaleesa usumanuny; na yeny shisheorotaa shia takwa toose. Ashetanaa muri vakwe nasheviira valya vekee vakamare mifungo kyeny nta nalavesaa weesi lwa fesa.” Ni Nndumi Iruva, muni matorito aamba.

14Nndumi Iruva aamba endi, “A Misri na findo fya Esopia na Vaeseba, vandu vaasha vakusheyaa, nawo vashevaa vafo, vashekulatyaa, vashe vekee vafinge minyororo vashe vave mbee yafo; vashekutereva veshambaa, ‘Ni kya dede Nndumi Iruva akee nnang'ani yafo, nta nkwiifo ungyifo; nkwiifo Iruva-se-fo.’”

15Ni kya dede yewe ni Iruva kukusurumyi. Ee Nndumi Iruva wa Israeli, Nkira 16vashesukaa na iting'wa yewo woose vesongosya mafwanu. 17Kya indi Israeli vashekirwaa ni Nndumi Iruva kwa ukiro lwa llung'anu. Eni mushesukaa na isavaa llung'anu na llung'anu.

18Mashika Nndumi Iruva aletana ngina aamba ule, We ni Iruva, niwe aletana ulana na iivika; niwe aleivika kainangisa nnyaleumba ikee ruufo, mmbo aleyuumba naambo vandu vakeefo. Yeny ni Nndumi Iruva nta kuleefo ungyi. 19Nnshileumba kwa kirumo ando a ireemyiny-fo; nshilevia vana va Yakobo vashiruuye ruufo. Yeny ni Nndumi Iruva nshaambaa kya dede na kya usumanu.

Nndumi Iruva waulana na mafwanu a Babilony

20Kuumbeny mushe ando amwi, yeni va masanga mulellatya na ikirwaa. Mmbatiri urango yewo vakusirya mafwanu awo epasha, veterevaa maruva alashiidimaa ivakira-fo. 21Rereny, vambiseny mbony naambo vaumburane na iitumuso kya eto alevaora efyo ukya elyo mapookyony. A mmbi alevambisa mbony eti elyo mbee? Nshi yeny mapokyony? Nndumi Iruva? Nta nkwiifo Iruva mwaasi yakwa yeny, Iruva wa usumanu, Nkira nkwiifo ungyi mwaasi yakwa-fo. 22Shiloleny yeny naambo mushekirwa eni masanga woose; kimmba yeny ni Iruva nta kulaifo ungyi. 23Ni yeny shimuni shilelya mboo; kirero ekyi nkileuka kaniny kyakwa kya usumanu, nta llyishewuyaa-fo kyeamba sheelyi, “Mbee yakwa vo nndu ashefiiryaa ndi na wo ulumi lusheamba paa.

24Mmbo vashaambaa sheelyi, “Kwa Nndumi Iruva nsi mfo kwiifo usumanu na ashevavyaa finya; ee da vashendaa kwakwe na woose valya valesua kyakwe vashesukaa. 25Efo kwa Nndumi Iruva, vana woose va Israeli vaniingwa usumanu na iitikiswa.”

Currently Selected:

ISAYA 45: MAS2

Highlight

Copy

Compare