ISAYA 43

Iruva avika kyaasa kya iviira vandu vakwe

1Kya indi ulaalu, Nndumi Iruva alekuumba ewe Yakobo, we alekutana yewe Israeli, mmbo aamba indi, “Kulairyee mashika mmbo shilekukira shilekuvaanga irina lyafo, ewe ni wakwa. 2Naakwa kweera mureny mwiingyi mmbo nshevaa ando amwi neewe, naakwa ni efo mireny miniini, nkusheekaafo. Kweerwa murony nkusheyaa-fo nta muro wa kipalapala mmbushekumamitaa-fo. 3Mashika yeny ni Nndumi Iruva, Iruva wafo, mweele wa Israeli, nkira wafo. Nshileuta Misri ive ukiro lwafo, na Esopia na Seba kimaruma kyafo. 4Kimmba kukee wa uuru nnu misony akwa na nndu wa iindywa, na yeny shakukunda. Kimmba ni indo mmbo nsheutaa vandu kimaruma kyafo, na ngyufyari ta vandu kimaruma kya muu wafo. 5Kulairyee, mashika yeny shikee neewe; shisheendee va ngyeeri yafo uka taari ya ngama, shishekusanyirya uka taari ya nkwaany.” 6Shivie taari ya ndoo, “Lekeiya” na taari ya sinde, nta kulashifinngyeshia-fo. Endeny vana vakwa uka kwaasha, na sambura takwa masiiyo ya uruka. 7Wo nndu akee mbaange kwa irina lyakwa, yeto shilemuumba kya usuri lwakwa, yeny mmbo shilemuumba, ee-da, ni yeny shilentana.

Israeli ni we nkureekya Nndumi Iruva

8Endeny vafu miso vatiri miso, na vafu maarwi vatiri maarwi. 9Vakusanyirye vandu va masanga woose, na ngyufyari toose vakuumbye; a ni vi nnang'ani yaawo ashiidimaa yaamba irero elyi na iloora findo fya kasha? A kye veende vakureekyi valollyo mmbo vatiri usumanu ao veetye vaambe “Yee ni usumanu”

10“Yeni ni vakureekyi vakwa” Nndumi Iruva aamba indo, na ishinga shilesauwa naambo mumanyi. Na ikusirya na iitumuso kya dede sheelyi yeny NIWE, kulaore shenkaafo nkweifo Nndumi Iruva ungyifo, nta numa yakwa yeny nkushekaafo ungyifo. 11Yeny, ee-da, Yeny ni Nndumi Iruva mmwasi yakwa yeny, nkwiifo nkira-fo. 12Shammamba mbony, shammauwa vandu, shammoora ngyende nta nkwiifo maruva a veny nnang'ani yaany-fo kwa ekyo yeni ni vakureekyi vakwa.” Ni Nndumi Iruva aamba. 13Ee-da, ukya nkonu wa inu, yeny ni we, nta nkwiifo ashidimaa yuuta kindo maakony akwafo; yeny shishetanaa mashora, a mmbi ndesa ashidimaa ishiima?

Yaashuka Babilony

14Nndumi Iruva, Nkira waany, mweele wa Israeli mmbo aamba indi, “Shanruma nrumi Babilony kimaruma kyany. Shisheolota woose sha vandu vakeirishiswa, ee-da, Vakaldayo wooke efo ngalaveny tawo vatikundye. 15Yeny ni Nndumi Iruva mweele waany, muumba Israeli, mangyi yaany.”

16Nndumi Iruva mmbo aamba indi, “Yeto aruuya shia efo yeeveny na ando a iira efo mireny miniini. 17Auta frasi na mitika, nsemu wa vasikari vatiri finya valala, mmbakyikwiipo-fo vanrumatwa sheelyi kwarumya uruu lwa taa.” 18Mulakumbwe mbony tilya ta mbee nta itisununda. 19Lola shikeetana kindo kiiya ulaalu kishemyaa. A ndesa mmushemamyaa ulaalu? Shishesongosya shia efo ando kuumu na eende mira efo kasa koomu. 20Mafisi a ngoroshony asheshiindyaa Yeny naakwa ni mabarwe na nyaa kimmba shambaniinga mura efo kasa koomu na mifongo naambo iniwa ni vandu wakwa, vasauwe vakwa. 21Vandu valya shilevaumba, nshilevaniinga mumuyo wakwa naambo vavambise irina lyakwa.

Ulyamari lwa Israeli

22Kya indi nkulevaanga irina lyakwafo yewe Yakobo; kya indi kwammaraa, nrima wankapa pirisi ewe Israeli. 23Nkulesheengye ngurana ya yonri ive kiraso-fo nta ishiindya na fimu fyafo-fo. Nshilekwaarisa na firaso nta ubani-fo. 24Nkuleshyuurya mafura afwaamaa na fesa na ishiwutisa na mafura a firaso fyafo-fo. Kya indi mmbo kuleshilyilyisa kya makasha afo kwashaarisa kya ulyamari lwafo. 25Yeny, eeda, Yeny mmbwe shisheilyisaa ulyamari lwafo kimaruma kyakwa yeny shimuni nta nshishekikummbwaase ulyamari lwafo-fo.

26Shikumbura, luumburane, shivia mbony tafo, naambo kuniingwa usumanu lwafo. 27Ndoo ulya wa mbee, alelyamara na valya verambwa mbony na valeshimina. 28Kimmba ni indo, mmbo nshevatefusaa vaniini va ando alya kweele na shaallwe Yakobo navadenge na Israeli naararo.

Currently Selected:

ISAYA 43: MAS2

Highlight

Copy

Compare