ISAYA 22

Nrumi ya Yerusalemu

1Yei nnyo mbony ya Iruva yesha imungony lya Usukuyo; ishaamba, Mmbo kyava inda vandu va Yerusalemu woose mukasaama mmbee-u wa mmba? 2A mindoro nnyeekyi muri moose vakeefura? Vandu vany woose, mmbo valefwa, mmbalefiiya fireny, nta mmbalefwa veekapana-fo. 3Vaniini vany woose, mmbo verisha kulaore nta vammeera mfe umwi. Vandu vafo woose valekooywa-fo, mmbo vetirwa mifungwa. Lla na kulya vemma irishya kwaasha. 4Nkyo kimaruma shikeemuvia, shireny shiiye misoru a mavavywa a vandu vakwa mulakwaatare ishiviiryamuu kyimaruma kya vandu vakwa-fo.

5Mashika inu Nndumi Iruva wa matorito mmbo alweengye usau, lukanyanyaka na ivingwa kunu Imungony lya Usukuyo. Masimamba a miri amfishwa-fishwa, fyooronngye fya vandu mmbo fikeitewa fika mafumbuu. 6Matorito a Elamu mmbo eerye ngyura na mife wokony, mmbo vesha veesamye frasi na makari a fira; indi nalyo itorito lya Kiri mmbo lyetiri fisha fyawo wokony. 7Yewe Yerusalemu mamungo alya afo mesha, mmbo eeshwe makari/mitika a fira na frasi, vesaama frasi veesalelyi mwaangony wa turuve yafo. 8Uringyi lwany lulewunnduka. Nkonu ulya mmbo mwenderuuya fisha fyeesurumyi kulya mmba ya Nsiton. 9Mukalollya kundo masimamba a mmba ta Yerusalemu akunndye asongosyoo. 10Mukalola wo ando yefo mmba ta Yerusalemu na tingyi mukawunndwa naambo muute-fo mawe eesongosya masimamba a muri. 11Mukatana irrwa lya mura nnang'ani a muri, naambo lyive irrwa lyeeletya mura ushuuka kulya irrweny lya kasha. Indi mmwesara kya nndu yeto erunda ishora elyo, nta yeto eniingya ikusaro lya mbee-fo.

12Nkonu yeto Nndumi Iruva wa matorito, mmbo ekunndye mukape kiiyo, neefira muute fii ta nrrwe neeraa soori ta makunnya. 13Indi yeni mmbo mwekeeseka na ikapa nndoro. Mukashisha ng'umbe na moonri, mukalya nyama neena wari. Eni mmbo mulaamba, “Ra! Llulye neena mashika ndesi mmbo lukeefwa.” 14Nndumi Iruva wa matorito karera neeny kashivia, Ni kya dede mmbasarywa kya ulyamari yelu-fo, mmbo vafwaa kuleefo isarywa. Ni yeny Nndumi Iruva wa matorito shaamba.

Wikyimbi lwa Shebna

15Nndumi Iruva wa matorito, mmbo eshivia sheende kwa Shebna, mwiisalallya mmba ya kimangyi shindemmbya, 16“Mmbo kutiri usumanu-ki ikaa kunu kukai? Ao kwiifo nndu kukwaani nawe kunu, kutani kwashesummya kifu kunu mbangeny uwe ifumbuu? 17Nndumi Iruva mmbo akweryaa kwaasha kwa finya. 18Yewe nndu kutiri finya mmbo akwiipoo uwe sha mpira nakweerye urukeny lung'ani mmwasi. Kundefiyya-fo na makari afo alya kweavikye nsia. Kuve usutu kwa mmba ya Nndumi wafo. 19Nndumi Iruva mmbo ashekoolota-si, kuuka uwe yoo ando kukai.”

20Nndumi Iruva kavia Shebna, “Elyi nkonu yeto ushefikaa, mmbo nsherumaa ishinga lyakwa Eliakimu mwana wa Hilkia. 21Shishemmbika isara lyafo lya umangyi, shishemfinga nkanda wafo, shisheniinga ushilyi loose llwa kweetiri nave mangyi ya vandu va Yerusalemu, Israeli na Yuda. 22Shishenniinga wiidimi loose lwa mmba ya Davidi, kamfinga kuleefo nndu ashiidimaa iporomwa, kaporomwa kuleefo nndu ashiidimaa ifinga. 23Eliakimu mmbo shinniinga finya sha isinde iniini lyikee ifinngye ando asheiindywa vandu woose va mmba ya ufyari lwa vakuu vakwe. 24Vanndu woose va mmba yakwe vadu na vaniini mmbo vashenkusiraa-we kyimwi sha fideeva na saani tikeeshifinngye ando amwi kutiri finya.”

25Indi nkonu umwi fishevanukaa-u alya ando fikeefifinngye. Ni Nndumi Iruva aamba.

Currently Selected:

ISAYA 22: MAS2

Highlight

Copy

Compare