ISAYA 21
21
Usukukyo lwa Babilony imamitwa
1Yei nnyo nrumi yesheya Babilony: Sha kitita-si uraato lutiri finya mmbo lukeesha luuka uruka lutiri weeresi taari ya kasa koomu, mmbo lurye urumato lweeresye urukeny. 2Mmbo shammoorwa shalollya findo fyeeresye, shalollya vandu vawai, vandu veemamita, saaminy efo uwe yeni Vaelemi, kapeny yeni Vaamedi! Iruva mmbo ashemukapannyaa na ngabo muleenngywa ni Vababiloni toose mmbo tishesyaa. 3Filya shelollya na yiita kulya mooreny alya mmbo kyansheenngye weresi na ivavywa iniini, sha usu lwa nka awonaa mwana, mavavywa akeengyifwa kutani shalemwa yiita, shasavaa kutani shalemwa ilola. 4Ngoo mmbo ikeefuluka-fuluka na weerei lukeengereka, mmbo shekeetereva nkonu wiile, kufike nkwaany indi wiikifika makusaro akashirovya mmwasi.
5Shoonga temmaa ideesywa miseny, vandu mmbo vakeelya neena. Pari-parii! Unyanga lukasha lushaamba, Kwiipony yeni vasongoru va uruka! Kamareny fisha fyany!
6Mashika Nndumi mmbo eshivia, “Enda kwavika mwiilala shoovi ekyo alollyaa nakabe weele. 7Kyeeri ashelollyaa veesama frasi mapaleny, veesama ngamula na mishungu nakabe weele na lyimwi.”
8Naasa mwiiringa koonisa unyanga kaamba, “Nndumi wakwa, mmbo shesinda nkonu piti na kyio tara-raa shiiringaa.” 9Alyo itorito va fira vakeesha veesaamye frasi mapaleny, veshaamba, “Babilony, kwantuulwa, mafwanu moose a maruva a wongo antuulwa-si neefishwa-fishwa.”
10Yewe Israeli vandu vakwa, eni mwansewa sha nndu ashuulula nganu. Mmbo shikeemuvya mbony shileeta tuuka kwa Nndumi Iruva wa matorito, Iruva wa Israeli.
Usukuyo kya Edomu
11Yei nnyo nrumi yesheya Edomu. Mbony yei mmbo yesheya Edomu, shiitye nndu avaanga ooka Seiri kaamba, “Yewe, mmbony-kyi ta kio ekyi? Mmbony-ki tiifo kio ekyi?”
12Neeny shanndouwa shammbya, “Ngama ikeesha kio nakyo kyikesha, indi kwankunda ivesa enda kwasha lyingi.”
Usukukyo kya Arabia
13Yei nnyo mbony yesheya Arabia ishaamba:
Eni matorito a Dedani, reiyeny ulale kio ekyi kunu kasa koomu ka Arabia. 14Eni vandu va uruka lwa Tema, niingeny vandu mura weena yeva vatirwa ni kyaakuka, varrwaaye shoonga veerishiswa yewo. 15Mashika mmbo vakeerisha ngyusu na mife tammaa isomuwa shombony na ngyura ta mife ikee minnwe yeekapana. 16Mashika Nndumi Iruva mmbo aleshivia indi, “Ando a mwaaka umwi kuleefo ikillya itumbe lya Kedari mmbo lyifikaa ufishony. 17Veekapa mife vaangu nnang'ani ya masiingo a vandu va Kedari mmbu vasaa-fo. Ni yeny Nndumi Iruva, Iruva wa Israeli shaamba.”
Currently Selected:
ISAYA 21: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
