ISAYA 23

Urumato lwa Tiro na Sidoni

1Yei nnyo mbony yesheya Tiro yuuka kwa Iruva, ishaamba; Kapeny kiiyo yeni varundi va ngalava ta Tarashishi mukee yefo kwaasha, mashika muri wany wa Tiro wallyamarwa, nkukyiifo kundo kweekaa nta mmba-fo. Mbony yeto mmbo mushetimanya kyeeri muwuyaa muuka Kipro. 2Malallyeny-sau eni vandu va mbaa-mbaa ya yeeve, yee malallyeny eni veekapa mbusha va Sidoni. 3Muleruma vandu vany vakeera uwe ya yeeve, yuura neekumba nganu ta Misri, mukeedima ikaba mbusha na vandu va masanga moose. 4Yewe Sidoni, Suka muri na turuve mbaa-mbaa ya yeeve. Yeeve sheni mmbo yaamba, “Nshilevavywa ni usu lwa mwana-fo nta shindekooye yoota mwana wa kyen ao wa womi-fo.”

5Elyi mbony tindefikaa Misri, sheelyi Tiro yallyamarwa, mmbo vavavywa nnu deny neesiiywa ni finya. 6Kapeny kiiyo yeni vandu va Foinike, kwiipony mukarishya Tarshishi. 7Ayeu nto muri ulya wa Tiro, muri ukee ntani myaaka ifye indo, muri woota vandu vakandetira marema ngyurukeny ta kwaasha? 8A mmbi aletannya Tiro mbony yei, muri ulesaalesa vamangyi, veekaba mbusha vaniini vakainndywa urukeny koose? 9Ni Nndumi Iruva wa matorito alevika uramba lwa mbony eyo. Naambo ukaidi na ukushobi lusye amwi neesuta vaniini yewo vawo. 10Ulaalu eni vandu va Tarshishi, reminy marema kunu urukeny lwany, mashika nkukiifo lyingyi bandari ishiidimaa iwarya meeli shiniini-fo. 11Nndumi Iruva wa matorito mmbwe alemukabannya kwa finya yakwe, kaorwa woko lwakwe uwe ya yeeve, kawunndwa turuve na ushilyi lweifo kulya Kanaani. 12Yewe muri wa Sidoni, ifura lyany lyamfika ufishony, vandu vafo mmbo vakeesisywa; naakwa varishya Kipro mmbakyaa-fo.

13(Nshi Vakaldayo, nta Vaashuru valeotora mafisi a ngoroshony ishewunndwa muri wa Tiro-fo. Mmbo uleringitya muri kwa minara vakavaafinya marama.)

14Kapeny kiiyo eni meeli ta Tarshishi, mashika kulya mweevikye nsia kwammbunduwa. 15Kukeesha kyeeri muri wa Tiro usherekyeka ando a myaaka makumi mfungare, ekyo ni kyeeri kya ushilyi lwa mangyi. Elyi kyeeri ekyo kyishesyaa, Tiro mmbo ishevaa sha kyiimbo kya nka isonga,

16“Endeepoo kivale kyafo,

kurunguke-runguke nakyo yefo muriny,

yewe isonga kulenrekyeka,

kwiimbe fiimbo fishoomwa vandu,

fiimbo fiingyi naambo vaidimi ikukummbwa lyingyi.”

17Ando a myaaka eyo makumi mfungare, Nndumi Iruva mmbo ashewunndwa muri wa Tiro, nato ushewiiya utuusi lwavyo, vashetuusa na vandu va masanga a ulana loose. 18Fesa kushewonisaa-fo mmbo ishevikwa wakfu kwa Nndumi Iruva. Muri mmbushelollya mbusha-fo, indi vasheinndyaa Nndumi Iruva, wo mmbo vashuura nayo shoonga na soori ndesa vakunndye.

Currently Selected:

ISAYA 23: MAS2

Highlight

Copy

Compare