ISAYA 18

Ngapo ya Esopia yuuka kwa Iruva

1Woshiny lwa uruka lwiisshwe kivivita kya maaru,

uruka lukee kwakulya ya uruka lwa Esopia,

2Yanruma vandu vakeeyiira mureny wa Naili

Veesaamye ngalava ta makongye,

endeny yeni vandu vaantu kwa isanga elyi lyitiri masiingo a vandu vaasha,

vamamiri, vatiri finya.

Vandu yewo mmbo vaereiyo wo ando

na uruka lwawo mmbo lwaavywa ni mura.

3Arannyiny, yeni vandu woose mukaa kunu urukeny, Aranyiny kyeeri tarumbeta ishekapwaa! 4Mashika Nndumi Iruva ashivia indi, “Kuuka uwe kyeny kwakwa, mmbo shilelola yefi fikeeyuutika, shiimalallye sha nndu akeeyarannya nrikye wa mwi sha ifishi lya laura kyeeri kya fimu. 5Mashika kulaore fyeeri fya fimu ivaa fyammisya na fivaro fyammaangara na sabibu tammbira, Iruva mmbo avyaa maramba kwa kyaandu na yuuta-fo maramba alya akwaallye. 6Moose mmbo areeywa ndeye ta mafumbuu, na mafisi engyi a ngoroshony. Ndeye na mamutony mfo kundo vakaa kyeeri kya mwi na mafisi a ngoroshony asheallwa-fo kundo kwawo kweekaa kyeeri kya kisie.”

7Kyeeri ekyo, Nndumi Iruva wa matorito mmbo asheengywa firaso fyuuka kwa vandu vaasha vamamiri, vandu veeresye va kwaasha na kufii ulaniny koose, isanga lyitiri masiingo a vandu uruka lwawo lwaavywa ni mira. Mmbo asheenngyoo firaso efyo kulya ifumbuu lya Sioni yefo akeyiinndywa, we Nndumi Iruva wa matorito.

Currently Selected:

ISAYA 18: MAS2

Highlight

Copy

Compare