ISAYA 17

Ngapo ya Iruva kwa Israeli na Ashuru

1Nndumi Iruva aamba:

“Damasko nkukyivaa lyingyi muri-fo, mmbo kushevaa mbillya ya marama. 2Miri yakwe mmbo ishevaa marama llung'anu, mmbo kushevaa kundo kweyiisa findo na mafisi a ngoroshony, nta kuleefo nndu avaerese. 3Turuve ta Efraim mmbo tishemamikaa na umangyi lwa Demaski lushemanda. Vashuru vashesaa-fo mmbo vashiipalwaa kyimwi sha va mmba ya Israeli. Ni yeny Nndumi Iruva wa matorito shaamba.”

4Nndumi Iruva aamba, “Itumbe lya Yakobo mmarama llung'anu lyishetuulwa na umasi lwa vayo lusheva nguya. 5Mmbo ashevakaa nrema yooluulwa, ashetannyo sha nndu n-du mwiyuulula fimu imungony lya Refaimu. 6Mmbo vashesaariswa-fo vaangu deny, sheelyi nndu ayaya seituni, seituni ivii, isaru ta iramba lya uwe, yiinya isaanu ta maramba a nri yeu uvikye deny.” Ni yeny Nndumi Iruva, Iruva wa Israeli shaamba.

Umando lwa yiindya mafwanu

7Nkonu yeto mmbo vasheendukya Muumbi waawo na miso awo ashelolaa mweele yeto waawo Israeli. 8Mmbakiinndya lyingyi fitara efyo fya irasya fikee fisongosye kwa maako awo-fo. Nta ivika nsia mashora yoo a maako awo meni, a isongosya mafwanu a maruva a Ashera na fitara fya ifwallya ubani.

9Nkonu yeto miri yaawo ilya ikee miikare kisha, mmbo irewa marama sha ilya ya Vahifi na Vaamori, ilya veesama kyeeri vekeerisha vana va Israeli. Wo kindo kyikalyamarika. 10Mashika yewe Israeli mmbo kulerekywa Iruva wafo ulya alekutarama kakukyira. Kwarekkywa turuve ya muu wafo. Kweekyo kwavaaya mafwanu a Baali, neewe kwaivika wakfu kwa maruva a veny, 11na kwakooya kwaidima iivaakya imye na ing'ana nkonu yeto mweni na yuute fivaro nkonu yeto mweni, fimu fyany mmbo fisarummya nkonu yeto wa nsindara na mavavyo alashiaa.

Masanga vakiduva avingwa

12Apaa irunduma lya vandu veengyi! Vakeerunduma sha yeeve. Apaa yoona lya vandu va masanga! Unyanga sha lwa mura mwiingyi. 13Masanga akeerunduma sha irunduma lya mura mwiingi, indi Iruva mmbo asheakyeemyaa arishye kwaasha. Mmbo uvivitwa sha muulu ni uraato fika mafumbuu. Sha kiluulyi kikeevivitwa ni uraato lwa kitita-si. 14Kyeeri kya nkwaany kyikelweenngye weeresi lung'ani, indi kulaore kwankya lwammairumika! Ekyo nkyo kyishevakooya valya vakee lwiivya na ilusoka masaa eru.

Currently Selected:

ISAYA 17: MAS2

Highlight

Copy

Compare