ISAYA 19

Ngapo ya Misri yuuka kwa Iruva

1Yei nnyo nrumi yesheya Misri:

Lola! Nndumi Iruva akeesha Misri eesammye ifishi lyisheenda nnu. Mafwanu a maruva a Vamisri arerema mbee yakwe. Na vandu va Misri mmbo vashevaa nsele-sele. 2Nndumi Iruva mmbo aamba indi: “Nshivasuyaa fira, vaniini vakapani veni kwa veni, nndu na mwana-maaye, nndu na amurasa wakwe. Muri na muri ungyi. Mangyi akapani na mangyi ungyi. 3Mmbo shisokaa Vamisri wiidimi na finya vatiri shinyanyate makusaro awo mesha. Vanderuuya makusaro kwa mafwanu na kwa varumu, vasavi veelafya na mimuyo mikasha. 4Mmbo shirambikya Vamisri maakony a vandu mbafu, mangyi nnyaasi ashevashillya, ni yeny Nndumi Iruva wa matorito shaamba.”

5Mura wa Naili mmbo ushuumiswaa nato wuumi kara. 6Mifongo yawo mmbo isheende kiraa ngata isheengeraa yuumya. Mare moomu na makongye a vayo mmbo amamika. 7Shoonga tikeshivaaye yefo mbai ya Naili shoose mmbo tishuumaa nato tiveevivywa kwaasha ni uraato. 8Veereiya makunga mmbo vaiyaa na ifiira na ewo veereiya na ndoanu mmbo vaffwa na veereiya va wo ngata woose mmbo vafwaa nrima. 9Vefuma soori ta kitani woose mmbo vashuuta-pa; woose mmbo vaffwa nrima. 10Veefuma soori mmbo veepalwaa na veekyi vawo mmbo vating'wa.

11Vasongoru va muri wa Soani mmbarung'ani neewo vakee ngyama ta Farao mmasembo! Nkishiidimika inda wo nndu ivia Farao, yeny mmbo shekee mwana wa nndu nndango; wa ufyari lwa mangyi elyo mbee? 12Nkwi ulaalu vandu vafo varango vakai? Vavaangeny na ikumanyisya kindo Nndumi Iruva akusarye kya matorito a Misri? 13Indi vandu va Soani mmbarung'ani, vasongoru va Memfis vallembwa, yewo veni uruka, vareta vandu va Misri. 14Nndumi Iruva ammbanyanyata vakareta shia Vamisri woose. Vakava sha nndu ananngwa mmbwari akeesinga-singa efo eraakaa. 15Nkwiifo nndu wa tokyi moose urukeny lwa Misri, ave nsongoru ao nndu wa mwiina ashiidimaa itana kindo kyoose-fo.

Vamisri vasheinndyaa Nndumi Iruva

16Nkonu yeto vandu va Misri mmbo vashekaa varereme sha vaka. Mmbo vashererema na yeereya nnu kyeeri vashelollya Nndumi Iruva eevaipoyo woko lwa ngapo. 17Vandu va Misri mmbo vasheereya nnu vandu va Yuda kyeeri vashiita ekyo Nndumi Iruva wa Matorito akunndye ivatannya.

18Elyi nkonu yeto ushefikaa kishomu kya Vaebrania mmbo kisherewaa miriny iraanu ya Misri na vandu nkonu yeto mmbo vashevikaa kyaasa kwa irina lya Nndumi Iruva munifinya. Na umwi ya miri eyo ishevaangwa Muri wa Mwi. 19Nkonu yeto kushevaa-fo kitara kya irasya efo urukeny lwa Misri, kushesaleesa ngo ikeeshivike wakfu kwa Iruva efo minyanuny ya Vamisri. 20Isheva kiringisyo na ukireekyi kwa Nndumi Iruva wa matorito efo urukeny lwa Misri naambo kyeeri vafuuya Nndumi Iruva kya vakiduva vawo avatarami na ivarikya mweekyi.

21Nndumi Iruva llyo ashekoora kwa Vamisri nawo vashemwiirikya, neemwiinndya veshuuta firaso fyeekora na muro, numa vasheutya Nndumi kyaasa kilashaalashika. 22Nndumi Iruva mmbo avarikya ngapo, neevakira nawo ni kuti vafuuye Iruva nawe ashevaarannya neevafwaaya.

23Kyeeri ekyo kushevaa-fo shia isheendaa Ashuru yuuka Misri na yuuka Misri indefika Ashuru. Nawo Vamisri na Vashuru mmbo vashekaa mmba imwi ya Iruva ya iterevya. 24Kyeeri ekyo, Vaisraeli, Vamisri na Vashuru mmbo vashekaa vaekyennywa ando amwi, nawo masanga yaa araru vamwi mmbo ashevaa mbora ya urukeny. 25Nndumi Iruva wa matorito mmbo alevavikya mbora ashaamba, “Vikkyweny mbora Misri vandu vakwa na Vaashuru mashora a maako akwa neewe Israeli mwiyading'u yakwa.”

Currently Selected:

ISAYA 19: MAS2

Highlight

Copy

Compare