ISAYA 11

Umangyi urilalyi

1Mmbo kushekaa kumye-fo maa efo ngyeeri ya ufyari lwa Yese; na iramba lyishemyaa miraariny ya vayo. 2Mumuyo wa Nndumi Iruva ushenkayaa; mumuyo wa urango na umanyo, mumuyo wa makusaro mesha na finya, mumuyo wa kilosshyo na yeereya lya yiinndya Nndumi Iruva. 3Ifura lyakwe ni yeereya lya yiinndya Nndumi Iruva. Nnyasheleta vandu kwa ivalla na miso-fo, nta irummbwa mbony kwa ilatya filya akeeyiita-fo. 4Mmbo asheletaa vandu vaturi kya usumanu lwawo, asheirumbuya vandu vasuri urukeny ndesa kyikwaani. Ashekapa uruka na nsengye wa kana kyakwe, na kwa mumuyo wa firomu fyakwe asherumata weesi. 5Usumanu mmbo lushevaa nkanda wa ifinga kisi kyakwe na wiindi luve ngomita kisiny kyakwe.

6Kite kya ngoroshony mmbo kishekaa ando amwi na yoonri, nyamandu mmbo ishelalaa ando amwi na ngurana ya mburu, ngashe na miiso na ivanda ando amwi, na mwana n-du mmbwe ashevaa mwiisi waawo. 7Ng'umbe na ngare mmbo tilyiiyaa ando amwi na ngashe ta vayo mmbo tishiimuyaa ando amwi na miiso ishelya mare sha ngoleta. 8Mwana n-du mmbo ashetavana yoo mwaangony wa irina lya shoka itiri suumu, kuleefo weeresi nta kindo kimpaana; naakwa avika woko efo oroony lya-vayo. 9Efo ifumbuu yeele lya Iruva nkushevaa-fo maariso nta ukyiva-fo, mashika finya ya imanya Nndumi Iruva, mmbo ishekwaana ulaniny koose. Sheelyi mura waivalyiivalyi yeeveny.

Iwuya lya vandu vakee ushingeny

10Kusheesha nkonu ashesaaleeswa mangyi ooka efo ufyariny lwa Yese nave mangyi asheinndywaa ni masanga moose. 11Elyi nkonu yeto ushefikaa, Nndumi kwa finya ya woko lwakwe mmbo ashesangirya vandu vakwe, valya vesaa kulya Ashuru, Misri, Pathrosi, Esopia, Elimu, Babilony, Hamati na kulya mbaa-mbaa ya yeeve.

12Nawe Nndumi Iruva ashesaamisaa bendera uwe na vandu va masanga woose valollye sheelyi vana va Israeli, valya veenyanyakye ulaniny na yiipalwa, vakeesangirywa amwi wooka taari toose yiinya ta uruka. 13Kusu-kusu na finying'u nnang'ani ya Efraimu na Yuda mmbo fishesyaa na kiduva mmbo kishemandaa nnang'ani yaawo. 14Woose mmbo vashekulungaa vakape Vafilisti vakee taari ya nkwaany amwi na valya vakee taari ya ngama vashitirwa nrapu, Vamoabi na Vaedomu mmbo vashevingwaa yoo Vaamoni mmbo vashevainndyaa.

15Nndumi Iruva mmbo asheumisaa yeeve yaa Shamu, mwi wa kirangasi usheumisaa mura wa Eufrate, nato ushekwaava ngyusoka mfungare na vandu vashekillya ando koomu na marende. 16Nalyo kusheva-u shia ing'ani yuuka Ashuru ya vandu vakwe valya vesaa-fo, shia ilya ya Vaisraeli kyeeri kilya wooka Misri.

Currently Selected:

ISAYA 11: MAS2

Highlight

Copy

Compare