ISAYA 10

1Woshiny ni lwa yewo vakeesisya vafwafwa, neevasoka usumanu lwawo, vakasaleesa mavavaso a wongo eevalammya. 2Vakasoka vana va ngwera usumanu lwawo, vakaiva umasi lwa vandu vakwa llwa lukwaani nawo; vaka va ding'u na vana va ngwera vakava nrapu yaawo. 3A mmbo kushetanaa-kyi nkonu yeto wa ngapo, nkonu yeto uraato uniini lushemusheyaa luuka kwaasha? Ni kwa-vi musherishyaa itereva-fo weekyi? A mmbo masaa any musheasurumaa kwavii? 4Mafurummyony mmbo mushekukushyaa nnang'ani a mifungwa na imamitwa kyimwi shayewo vakeewaawa fireny. Naakwa nnyendo nyashi ya Nndumi Iruva mmbo ikeengera isaama na ngapo tikeengereka.

Wikyimbi lwa Iruva kwa mangyi ya Ashuru

5Woshiny lwakwe Ashuru, nsengye wa nyashi yakwa, yewe mmbwe mbiiri ya nyashi yakwa! 6Mmbwe shilenruma nave ngapo ya isanga elyi ilyang'a isanga lyitiri kyiila lyikapwa na ikamarwa mifungwa, vakakashwa sha iposhi efo shia. 7Indi wo Vaashuru mmbo vakusarye kilasha, mmbo veetiri makusaro a ivamamita kushu, namamite masanga meengyi ngata kyishiidimikaa. 8Mashika we mmbo aleamba, “Wo nsongoru wa itorito wakwa ni mangyi! 9Mmbo shekaba neevinga miri ya Kalno na Karshemishi, nshiindo shitannyaa muri wa Hamati sha muri wa Arpadi, Samaria sha Damasko? 10Kwakooya ngapo yakwa yaidima ifikya mangyi valya veiindya mafwanu na maruva a wongo akailannya alya a Yerusalemu na Samaria. 11Mmbo shileidima itannya Yerusalemu na Samaria amwi na mafwanu awo?”

12Kyeeri Nndumi Iruva ashemarisya mashora yoo akwe efo ifumbuu lya Sioni na Yerusalemu llyo meendi asherumaa ngapo kwa mangyi yei mbafu ya Ashuru. 13Mashika yeu mmbo aleamba, “Ni finya takwa shimuni, makusaro na urango shaidima itana efyo fyoose, shauta-fo minyanu nnang'ani a masanga na masaa awo vesangirya moose shavasoka kwa finya, neewo veekaaye firi fya umangyi shavatuula. 14Kimwi sha nndu aoroya woko ando kukee kyiluulyi, ni indo shileipoo masaa awo kimwi sha nndu arorrwaa mapore arewa kifuriny ni indo shisherorrwaa ulaniny koose, nta kulawonikaafo nndu aidima ishitukya woko; ao itarammbwa kana kyakwe ishikangaya!”

15Indi Nndumi Iruva mmbo aamba; “A ndesa, kyaara kishiidimaa ikushopya yeto arunda nakyo? Ao nseminu ushiidimaa ikurosa mbee ya yeto mwiirunda nato? Ni kyimwi sha yaamba mbiiri yeeshiidimaa ikurika yeto aitiri, ao nsengye ukurike yeto alakee kyiri”! 16Kweekyo Nndumi Iruva, Iruva wa matorito, mmbo asheveenngye iniyya vandu vawongye vatiri finya ngapo ya ndwari ishewoonga samu na wiidimi lwawo lushemamitwa sha muro ukeeyaaka. 17Sa ya Israeli mmbo ashaaluka muro na mweele wakwe ashaaluka kipala-pala kya muro ando a nkonu umwi ushemamita wo kindo misuusuu na miinga myoose kushu. 18Nturu wakwe na itumbe na nnda wakwe ivessye, Nndumi Iruva mmbo ashemamita fyoose nnuma na mwiili ishevaka nndu alyiwa ni ndwari. 19Miri ishesaa yefo nturu yeto wakwe mmbo ishevaa myaangu nnu, naakwa ni mwana n-du mmbo ashiidimaa iyeekyena.

Ni vaangu vashewuyaa

20Nkonu yeto seseri ta Israeli na vaturunnya va Yakobo mmbakyivikaa nsia isanga llya lyilevakapa ngapo ing'ani, indi mmbo vashevikaa nsia kwa Nndumi Iruva Mweele umwi wa Israeli kya dede. 21Valya vaangu vashekooywa-fo mmbo vashewuyya Iruva waawo muni finya. 22Naakwa Vaisraeli yewo vafo vaingifwa sha nsanga wa mbai ya yeeve ni vaangu-nsi vashekooya iwuya. Mashika urumato lwamma ideesywa, llukeiiritya usumanu. 23Yee! Nndumi Munifinya, Iruva wa matorito, mmbo ashiinuttya kya dede ekyo anrummbwa itana mmbo shiinuutya nnang'ani ya uruka loose.

Nndumi Iruva ashekapaa Vaashuru

24Kweekyo Nndumi Munifinya, Iruva wa matorito mmbo aamba indi, “Eni vandu vakwa mukee efo Sioni, mulavaereye Vaashuru yewo vakeemukapa na mbiiri, veemwiipoiyywa misenngye sha llya Vamisri vemutannya-fo. 25Mashika ni kivero kyaangu kyiseiu nyashi yakwa ikeemanda, nayo ishewawoyaa kya urumato.”

26Nndumi Iruva wa matorito mmbo shishevakapaa na ngova sha llya elashwa vandu va Midiani kulya mbangeny ya Orebu, na umbiiri lwakwe uwe ya yeeve, asheiipoo shaasa etana kulya Misri. 27Na nkonu yeto shishemurrwaa kyikonde kyakwe uka meeveny any, na yookyi yakwe ifishwa yuuke singony yaany.

Vammboywa ni Misa

28Ammuuka Rimonyi kasha fika Ayati; ammiira nnang'ani ya Migrony nnyasurumaa findo fyakwe Mikmashi; 29Vamma ikillya irikony, kio ekyi ni Keba vakeelala na va Rama mmbo vakererema mmbweerei, vandu va Kibea, muriny wa Sauli vanrisha. 30Onisa unyanga Yewe mfu va Kalimu! Looteny kaarwi yewe Laisha! Nrouwe! Yewe Anatoti! 31Madmena mmbo vakeerisha na Kebimu mmbo vakeerisha ikyira muu wawo. 32Nkonu yeu wa inu mmbo asalalaa kulya muriny wa Nobu ashesisikyaa woko kulya ifumbuny lya mfu va Sioni, yee mmbo asisikyaa woko muriny wa Yerusalemu. 33Lola, Nndumi muni finya, Iruva wa matorito mmbo ashearammbwa na finya sheeresi sha nndu ashaarammbwa maramba a miri na yewo vaasha vashefiiswaa na masiingo ashetuulwa-si. 34Nndumi Iruva mmbo ashevatuula-si sha nndu atuula miri ngoroshony na kyaara, na Lebanoni na mieresi yakwe mmbo ishetuulwaa.

Currently Selected:

ISAYA 10: MAS2

Highlight

Copy

Compare