HOSEA 7

1Kyeeri kilya shikundye ishiisa vandu vakwa Israeli, llyo uravi lwawo lwalollyo mmwasi. Wo nndu mmbo akeelemba uroye, vakafisha mmba ta vengyi na iiva neyaafinya vandu efo shieny ta muri ivasoka findo fyawo. 2Nta mmbeeshi sheelyi nshevakapaa kimaruma kya efi fyoose-fo. Ngyulamari tawo mmbo tivaringitye. Nshiraa shilatilola-fo.

Utefusu kwa vaniini va Uruka

3Nndumi Iruva aamba indi, “Vandu mmbo vafisha kyama vakalemba mangyi na vangari vakwe. 4Yewo woose mmbo vakee vatuusi vavakye muro mwiingyi ukee mwaate ni nkori wa mikate kupookya ikanda nswa na iuvikya ntarango, muro ularumikaa. 5Nkonu wa sikukuu ya mangyi mmbo vaniinga mangyi na ngyama takwe wari kutani vanangwa vakava sha yoonri. 6Yee, ngata tawo mmbo tikoraa sha muro. Kio kyawo ni yooka mitambo tupu, ngama muro ukariika.

7“Nnang'ani ya muro eto vakawaa veevashillya. Vamangyi vawo mmbo valembwaawa umwi umwi. Lyo nkwiifo nta mwiikurya-fo.”

Israeli na Uruka

8Nndumi Iruva kawuya kaamba, “Vandu va Israeli mmbo vavakye nkate mmbisi taari imwi. Mmbo vakusasanda na vandu va masanga ewo vavaringitye, 9valamanyi sheelyi veny mmbo vambamaa fikya. Nta mmbakeemanya sheelyi kyawo mmbo kyankashaa deny-fo. 10Uravi lwa vandu va Israeli mmbo lwanshifikya lukashifuuya. Sanda na efyo fyoose filevasheya lyo mmbaleshiwuiya yenye Nndumi Iruva waawo-fo. 11Israeli mmbo avakye mbeta shirung'ani ikabaa pita-pita ruu. Vandu vakwe mmbo vavikye Misri nsia vawonise-fo ngarami, vakooka-fo vakarishya Siria! 12Mmbo nshevavikyaa nsoori wa waafu uvatire sha uruu. Kimaruma kya uravi lwawo mmbo nshevakabaa!

13“Oshiny lwawo! Mmbo valeshilema vakashira. Mmbo vamamikaa. Sheekundye ivakira, lyo miindye yaawo ikava mitefusu. 14Nta mmbakesh itereva na nrima-fo, kyawo tupu niikutuula efo si neekufwafwala sha vandu va masanga. Vakatereva vaoni shoonga mfinyo mmbo vatafukya findo efyo sha vandu va masanga. Apaa vandu varavi! 15Na kyikava ni yeny shilevang'anisa na ivalosha, lyo mmbo valeshifuluka. 16Mmbo vashikapa mungo vakaalukya maruva a ruu. Mmbo vakee vandu va tangalu vakava sha ura lootokye. Mashika naakwa ni vasongoru vawo mmbo varera veekutulaa. Ra vafwe tiny fireny na Vamisri vavaseke.”

Currently Selected:

HOSEA 7: MAS2

Highlight

Compare

Copy