HOSEA 8

Nndumi eesityo-u Israeli kimaruma kya iinndya maruva

1Kaba iranda. Ekawo misa mmbo vakeesha sha uviri urukeny lwakwa! Vandu vakwa mmbo valefisha kyaasa kilya shilevika nawo, vakamina na ufundo lwakwa. 2Naakwa vashivaanga Iruva waawo neamba mmbo vakee vandu vakwa neeshimanya, 3Lyo mmbo valemmyi mesha vakakunda makasha. Kimmba ni indo vasherishiswaa ni misa. 4Vandu vakwa mmbo valekusauya vamangyi wo veni. Vakavika na vasongoru kulore vashivesa. Vakeepoo saabu na fesa vakasongosya-fo mafwanu fikee mfindo fivarumataa wo veni. 5Mmbo shisuuye nawo kya iruva lya saabu lya vandu va Samaria. Shitirwa ni unyafi kimaruma kyawo. Mmbo vashindyaa maruva a wongo fika indii? 6Mwisraeli mwiipasha mmbo alesongosya ifwanu lya kiri: nalyo nshi iruva-fo. Nalyo iruva elyo lya saabu lya Samaria mmbo lyishewunduwaa! 7Wo mmbo vavaaya uraato, lyo vasheilulaa kititasi! Mashika nganu ilaviraa nnyishukaa nswa-fo. Lyo naakwa yuute, vamisa mmbo vesheilulaa-fo. 8Vaisraeli mmbo vammba sha vandu va masanga engyi vakooka-fo vakava sha nungu iparikye! 9Vakava vakaidi sha mishungu ya kasa, vakakweengya shaasa vakundye. Mmbo valeenda Siria vanderuuya-fo ngarami. Vakataa vandu va masanga naambo vavaringe. 10Lyo ulaalu mmbo nshevasang'iryaa ando amwi shivakabe. Ni ulaalu indi vashevavywa vafwe, elyi mangyi ya Siaria ashevafotaa.

11Shaasa veengera fitara fyeerasya naambo vasarywa, niindo vafumbuta ulyamari lwawo! 12Mmbo shavareiya mavavaso akwa na ngyufundo shiingyi, lyo vakaamba mfindo fyeny vakamina. 13Mmbo vashuutya firaso fyeeshisha, vakalya nyama eto. Lyo yeny Nndumi Iruva nshisenywa nnyefyo-fo. Mmbo nshengeraa ilola ngyulyamari tawo shivakabe. Mmbo nshevaviraa Misri!

14Vandu va Israeli mmbo vatanyi mmba ta kimangyi, lyo vakarekywa Muumbi waawo. Vandu va Yuda nawo mmbo valetana miri miikare. Lyo mmbo nsherikaa muro weekora mmba yeto na miri yaawo.

Currently Selected:

HOSEA 8: MAS2

Highlight

Compare

Copy