VAEBRANIA 12
12
Nndumi alulosha luve vasaari
1Kiwo neeseny-da, kimmba lukee varingitye ni vakureekyi veengyi indo, lukurwe mario yoo maroo, na ulyamari, lutamballye yeenda mbee lwikee na usisiryo efo kivakyanuny kya muu yeu. 2Lwiilolaa Yesu, yeto mwipooka na mwiinutya kyikusiryo kyeru; kimaruma kya ifura elyo aleniingwa we mmbo alesisirya nsalaba neemina sony, nawe mmbo akee rembo woko usha lwa kitima kya itumbe kya Iruva. 3Nkye kusareny nnu kya yeto alesisirya iteendwa iniini indo lya veetana ulyamari, mulasheyaaraa-fo, nta ifwa nrima-fo. 4Mulekapana fira mukafikya nta ipuswa samu, mwiwanaa na ulyamari-fo; 5lyingyi mmbo mwanrekyo wiikimbi lulya, lukeerera neeni yeni mukee vana,
Mwana-kwa kulaile umbiiri lwa Nndumi,
nta kulafwe nrima kyeeri akeekukyeemya,
6Mashika yeto Nndumi ankundye mmbo ankapa,
na mwana yeto mumwirikya mmbo ankapa.
7Mmbo musumani ikapwa, Iruva mmbo ammutanya sha vana; mashika lyo ni mwana-kyi yeto nalakapwaa n-ndeye? 8Naasa kwankooya mulakapwa shaasa kyikee kwa woose, mmbo mwava vana valakee veni kyeny, nshi vana va dede-fo. 9Ando amwi na efyo mmbo lutiri vande veru va ngata ya mwiili nawo vakalukapa, neese lukairikya, a nshi kyeni deny luwarani na Nde yeto wa mirima yeeru lukie muu? 10Mashika lyo dede yewo ando a mikonu myaangu mmbo valelukapa shaasa valelollya wo veni kivaa, nawe kya pule yeeru, naambo lwaakaniswa weele lwakwe. 11Wo ngapo kyeeri kilya nnyilelollyo nkindo kya ifura-fo, nkyeevavisa, kyaindi kwa yewo vakee veeshivire indo numa vakawonisa ndunda ta usumanu titiri ufoo. 12Kyasia orweny maako yoo akee mafwafwa na ndi yeto shipooru, 13sumanisyeny marende any shia, naambo ekyo kyikee nkete-kete kilareke shia, naambo kikirwa.
14Kundeny na nrima moose ikaa na urilalyi na vandu woose, nalo weele yelo kulaifo nndu ashidimaa ilollya Nndumi kwakooya alutura. 15Mulollye nnu deny kulasheva nndu amina isarya lya Iruva, kwiiseny nnu naambo nri yeto uvavaa ulasheemya kwany ushemwaatara na veengyi vaone itefuswa. 16Kulakae-fo nndu ntuusi nta nndu naleshiindya Iruva-fo, sha Esau llya alekumba ding'u yakwe ya mwana mbee kimaruma kya shoonga ikee imutu lyimwi nsi. 17Mashika mwiishi llya numa alekunda iwona mbora, nkilekiva-fo, (mashika nnyalewona mwaanya wa ikurya-fo), lla shaasa aleiruuya na misoru deny.
18Mashika mmulefikya ifumbu lyivaa ipaana-fo, lyileaka muro, nta ifishi yuu, na ireema, na uraato lwa finya, 19na unyanga lwa iranda na unyanga lwa marero, yelo valya valelwiita valetereva valakivyo kindo kingyi-fo, 20mashika mbaleidima isisirya marero alya valevavasyo-fo. Naakwa ni ifisi lyikapaana ifumbu elyo mmbo lyikapwaa na mawe. 21Na efyo filelollyo shaasa fyeeresye, kutani Mose aamba, “Shantirwa mmbwerei neererema.” 22Kyaindi yeni mmbo mwasheya ifumbu lya Sion, na muri wa Iruva akee na muu, Yerusalemu ya iruveeu, na maronda meengyi a vasu fiku fiingyi, 23na ikwaanu iniini na siri ya vana vavee vakee vareiye iruveeu, na Iruva mwileta vandu woose, na mirima ya vandu va usumanu vasongovikye, 24na Yesu nrumi wa kyaasa kiiya, na samu ya inanatywa, yeyo ireraa mesha ngota ilya ya Abeli. 25Loleny mulashelema yeto akeerera. Mashika kwakooya kulaore valekirwa valya valelema yeto alevaikimba yaa ulaniny, ni mmwasiny deny llushekirwaa kwakooya lwaindukya mbai neeto aleuka iruveeu elwikimbaa; 26yeto unyanga lwakwe lulereremisa uruka kyeeri ekyo, lyo ulaalu mmbo avika kyaasa kyeyaamba ulaalu mmbo shireremisaa lyingyi lyimwi nshi uruka-da-fo na iruveeu-da. 27Kyaindi irero elyi, “Lyingyi lyimwi”, mmbo lyoora paa filya fisheutwaa-u elyi fireremiswaa, mfyo filya fikee fyuumbe, naambo filya filavaa ireremiswa fyo fisalale-u. 28Naasany kimmba lukeewarya umangyi yelo lulavaa ireremiswa, lukaeny na isarya, na kyeendwa llyo luvikye Iruva miindye insenyi, ando amwi neekunyiisa na vio; 29mashika Iruva weeru nsha muro.
Currently Selected:
VAEBRANIA 12: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
