VAEBRANIA 11
11
Mbony ta kyikusiryo
1Naasany ikusirya ni ivika nsia deny kya efyo fikaa fishe, kulaore fyallollyo. 2Na vamiku veru mmbo valekureekywa kya ekyo. 3Kyeendwa ni irero lya Iruva ulana mmbo luleumbwa, ni indo lukusirye, naakwa mfindo efi filollyo mfileumbwa mfindo fingyi-se. 4Eetiri kyikusiryo, Abeli mmbo aleutya Iruva kiraso kyisha ngota Kaini, kakureekyo sheelyi mmbo akee wa usumanu; Iruva kakureekya firaso fyakwe, kimmba ni indo, na kyikava alemmaa ifwa, mmbo eefo areraa. 5Kyeendwa nkyikusiryo Enoki mmbo aleipowa-u, nalalollye ufu, nta nnyalelollyo-fo mashika Iruva alemwiipo-u: Mashika elyo kulore emmipowa-u mmbo ekureekye sheelyi mmbo alesennya Iruva. 6Lyo kulaiyo kyikusiryo nkushiidimaa insenya-fo; mashika nndu asheengyaa Iruva nkuti mbele neerikye sheelyi eefo, na sheelyi we mmbo alyimyaa mbora yewo vensheya. 7Ekee na kyikusiryo, Noe llya alemaa iikimbwa ni Iruva kya findo efyo fikaa fishe numa filandelollyo, shaasa aleirikya Iruva, mmbo aletana mmba ilya ya isanduku, naambo nakire va mmba yakwe. Nkyo kautya ulana uvingo neeva muya ding'u wa usumanu yelo lwawonika kimmya efo kyikusiryony. 8Kyeendwa nkyikusiryo Abrahamu mmbo aleirika llya alevaangwa, nakupoo neende iwonisa ando alya kushevaa ding'u yakwe, kakwiipoo naleeshi kundo akeenda. 9Na kyikusiryo kakaa kulya urukeny llwa weny lwa kyaasa, urukeny lulakee lwakwe, kakaa yeemeny we na Isaki na Yakobo, veni ding'u ando amwi nawe va kyaasa kilya kyeni. 10Mashika mmbo evikye nsia ilollya muri utiri uvasha, ukee n-deesye neetanwa ni Iruva muni. 11Kyeendwa nkyikusiryo Sara muni mmbo alewona wiidimi lwa ikufinga lla llya emiilannya kyeeri kyakwe, mashika llya alevika nsia yeto mwiimbikya kyaasa ni wa dede. 12Kyeendwa ni efyo vakairwa ni nndu umwi nawe kava sheelyi amfwa, vakawonika vandu veengyi sha nyinyiri ta efo nginiiu-te, sha nsanga wa mbai ya nruva ulavaa yeekyena.
13Yewo woose vakafwa na kyikusiryo, valandewarya fyaasa filya, lyo vakafilollya vekee kwaasha na iirikya, neiirikya sheelyi wo ni veny na va kyaaro kunu urukeny. 14Mashika yewo veamba findo sha yefyo mmbo woora paa sheelyi mmbo vakeeruuya uruka lwawo veni. 15Na kukooye veekumbwaa uruka lulya kundo valeuka, mmbo veshidimaa iwuya nafo. 16Kyaindi lyo ulaalu mmbo valangye uruka usha mmwasi, llo elo lwa iruveeu. Kweekyo Iruva nnyasuaa ivaangwa Iruva waawo-fo; kimmba mmbwe yeto alevatannya muri.
17Kwi kyikusiryo Abrahamu llya aleeswa mmbo aleuta Isaki nave kiraso, neeto alewarya fyaasa efyo mmbo ekeniingya mwana wakwe wa ngitany. 18Ee-da, mmbo emmivyo, Yoo kwa Isaki ng'u ufyari lwafo lushepookyaa, 19kikallollyo sheelyi Iruva mmbo ashidimaa innduta ooke kwa vafu, nammbonise lyingyi. 20Ekee na kyikusiryo Isaki mmbo alevikya Yakobo na Esau mbora, naakwa nkya findo efyo fisheshaa numa. 21Ekee na kyikusiryo llya Yakobo emfikya ifwa, mmbo alevikya vana va Yosefu mbora, keendya Iruva ekwinyikye yoo ndateny ya nsengye wakwe. 22Ekee na kyikusiryo llya Yosefu alefikya yoo mafurumyony akwe, mmbo alesenda mbony ta vana va Israeli yuuka Misri kavavasya kya mafua akwe. 23Na kyikusiryo llya Mose alewonika kasurumwa mmbamiku vakwe ando a miiri iraru, llya valellollya nkinkoku kyisha, nta valairyae ivavaso lya mangyi. 24Ekee na kyikusiryo ekiva nndu nniini kalema ivaangwa mwana wa mfu wa Farao; 25kalollya nkyeni ilyiswa ukyiva ando amwi na vandu va Iruva ngota ifurya ulyamari ando a kirambo kidu; 26kalolya Kristo iteendwa ni usimba uniini ngota umasi loose lwa Misri, mashika nfyo evereye natawa. 27Na kyikusiryo kooka Misri nalairyee unyafi lwa mangyi, kasisirya evikye nsia yeto nalalollyo. 28Na kyikusiryo kavika Pasaka, na yaamba samu ilya, naambo ulya asherumataa fyuumbe fivee fyoose wo nalavapaani. 29Na kyikusiryo vakaira kulya yeeveny lya Shamu sha ando oomu; Vamisri vakunda nawo itana indo vakamirwa mmura. 30Kyeendwa nkyikusiryo isimamba lya Yeriko ukawunduka, llya muri uleringityo ando a mikonu mfungare. 31Ekee na kyikusiryo Rahabu ulya ntuusi nnyalerumatwa ando amwi na valyang'a valya-fo; mashika llya alewarya vandu valya va sa na ufoo. 32A yeny shaambe-se kyi? Mashika mwaanya mmbushimaa shaambe mbony ta Gidion na Baraka na Samson na Yefta na Davidi na Samweli na ta vakisuku, 33yewo kyeendwa ni iirikyo valevinga ngyumangyi ta vamangyi, vakatana usumanu, vakatira fyaasa, vakafinga kana kya miiso, 34vakavinga muro, vakakkya iwaawa na usu. Vakaniingwa finya llya vekee vafwafwa, vakakaarya fireny, vakoombuta vamisa woose. 35Vaka nawo vakawaarya vafu yewo valerutwa. Lyo vengyi vakawondorwa fika ifwa, valairikye iwouwa, naambo vawoni irutwa. 36Vengyi vakeetwa fyeesony fyeteendwa neekapwa, yee neefingwa, neevikwa kifingyony; 37vakakapwa na mawe, vakaparwa na misomenu, vakavikwa fyeesony, vakawaawa noosu, vakaringitya-ringitya veree masara a moonri na mburu; vakaanguyo mfindo, vakalyiswa ukyiva, vakatannyo uravi; 38(vandu yewo kulore vesumani ikaa yaa ulaniny), mmbo valeraa-raa kulya kasa na kulya mafumbu-u neefo mbangeny na midesheny. 39Na vandu yewo woose mmbo valekureekywa kyeendo nkyikusiryo kyawo, lyo valawarye kyaasa. 40Kimmba Iruva elludeesya yese ekyo kyikee kyisha mmwasi, naambo wo valashesongwa iwaryo ngota yese.
Currently Selected:
VAEBRANIA 11: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
