VAGALATIA 6
6
Isisiryana na yeekyana
1Vanavama wakwa, kwakooya nndu arendeya karenga, yeni mukee va ngata ya Mumuyo viireny nndu yeto mukee na nrima wa ufoo, na ikulola yeni muveni mulasheanga fyeesony. 2Taraniny mario any mukooye iinutya ivavaso lya Kristo. 3Mashika kwakooya nndu alollya akee ng'waana ya vengyi, nawe nalakee indo, mmbo akulemba we muni. 4Kyaindi wo nndu nakulole we muni eshesaa mashora akwe, lyo ashemanyaa kwakooya kivaa nakurumishe we muni, nalyo llyo ashewonaa kimaruma kyeefura efo nriminy wakwe we muni, lyo nshi kwa vandu vengyi-fo. 5Kimmba wo nndu mmbo akamaraa irio lyakwe muni.
6Mwiiloshwa naakani na mwiillosha wakwe kya mesha moose. 7Mulasheelembika, Iruva nnyavaa ilemba-fo, mashika wo kindo nndu ammbaaya nkyo asheilulaa. 8Mashika yeto avaaya fya mwiili wakwe mmbo asheilulaa urumato kya mashora yoo; kyaindi yeto avaaya fya ngata ya Mumuyo, kiinani na Mumuyo mmbo asheilulaa-u muu wa llung'anu. 9Nta lulasheyaaraa itana mesha-fo, mashika mmbo lusheilulaa elyi kyeeri kya vayo kifikaa, lukanra lulafwa nrima. 10Nkyo wo kyeeri luwonaa mwaanya lutannyi vandu woose mesha, mmwasi yewo vakusirye-u.
Kyeemarisya na fiidikiro
11Loleny shaasa shamureiya na fireiyo finiini na woko lwakwa yeny shimuni! 12Yewo valangye ikushiisa kya findo fya mwiili, mmbo yewo vakee imwiitikya irinwa, naambo valasheesuka kimaruma kya nsalaba wa Kristo, naasa da. 13Mashika naakwa ni yewo vakee varini mmbakeeinutya uvavaso-fo; lyo mmbo vakunndye yeni murinwa-da, naambo vakufurye kimaruma kya vayo-da. 14Lyo yeny, nshikundye ifura na kindo kingyi nta kinnywa-fo, kuuta nsalaba wa Nndumi weeru Yesu Kristo, na kimaruma kya vayo ulana loose mmbo lulekapyo nsalabeny yaa kwakwa, na yeny kimaruma kya ulana. 15Mashika irinwa ao ira kularinwa nshi kindo-fo, iva kyuumbe kiiya nkyo kikundywa. 16Na yewo woose vasoraa irero elyi ufoo na isarya fivakayaa, yee, kwa Israeli ya Iruva.
17Kupookya ulaalu, kulakive-se nndu ashaatara-fo mashika mmbo shirye wende lwa Yesu mwiiliny wakwa.
18Vanavama wakwa, isarya lya Nndumi weeru Yesu Kristo lyikee ando amwi na mirima yaany. Amen.
Currently Selected:
VAGALATIA 6: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
