VAEFESO 1
1
1Ni yeny Paulo, nrumi wa Kristo Yesu, shaasa kilesennya Iruva, shamureiya yeni veele va Efeso mukusirye na Kristo Yesu, 2Isarya lyimukaye na ufoo luukye kwa Iruva Nde weeru na kwa Nndumi Yesu Kristo.
Simbo ta mirima elyi lukee na Kristo
3Iruva nang'aniswa, we Nde wa Nndumi weeru Yesu Kristo, yeto aleluvikya mbora takwe ta nriminy, ulaniny elu lwa kimumuyo lukee lwa Kristo. 4Shaasa alelusauwa lukee va Yesu uka llya kulaore ulana lwemmbeiywa, naambo lukooye iva veele, luveva vandu valatiri mbese mbee yakwe lukae na ikunda. 5Mashika mmbo alesongwa ilusauwa, naambo luvikwa vana vakwe kwi Yesu Kristo, shaasa alekunda we muni. 6Itumbe lya isarya lyakwe lyiniingwa nnduma, elyo alelulyimmya kyuuka na Mwana wakwe. 7Kyeendwa mmbwe na kimaruma kya samu yakwe yese lukawonisa iwowowa lyeru, na ifwaaywa kya ulyamari kiinani na usimba lwa isarya lyakwe. 8Nawe mmbo alelupusuya yefyo kya usaari na urango lwakwe. 9Llya alemaa iloora kyama kya ikunda lyakwe shaasa alekunda we muni. 10Kyeendwa ni Kristo kavika findo fyoose ushilyiny lungyi, yefyo fya iruveeu na fya ulaniny kiwo, ee, kyeendwa mmbwe. 11Yese lukavikwa veni ding'u, mashika shaasa eekundye uka elyo mbee mmbo eelusauye, shaasa akukunndya itana fyoose shaasa akunndye we muni. 12Neese lukee nnang'ani yakwe luve nnduma wa itumbe lyakwe, yese lulesongwa yoora ivika nsia weru efo kwa Kristo. 13Na yeni ni kiwo-da kyeendwa mmbwe mmbo mulemmaa iita irero lya dede, lyo Nrumi ya Nsia ya ukiro lwany, mukammaa imwiirikya, na ivikwa wende lwa kiringisyo ni Mumuyo ulya ekee nteerye akee Mweele. 14We mmbwe akee kiringisyo kya ding'u yeeru, naambo nalulyimyi ukiro efo umangyiny lwakwe luve nnduma wa itumbe lyakwe.
Kiterewo kya Paulo
15Kimmba ni indo na yeny, uka llya shileeta mbony ta kyikusiryo kyany kwa Nndumi Yesu, na kya ikunda lyany kwa veele woose, 16nshikeemanda yaana Iruva kimaruma kyany-fo, shiimukummbwaa efo fiterewony fyakwa. 17Iruva Nde wa Nndumi weeru Yesu Kristo we Nde wa itumbe, namuniinge yeni nrima wa urango na imurambuya immanya we. 18Miso any na mirima yaany yeengere imikywa nsa, naambo mumanyi ivika nsia kya uvaango lwany shaasa lukai, na usimba lwa itumbe lwa ding'u yakwe kwa veele shaasa lyikai. 19Na utore lwa uniini lwa wiidimi lwakwe lukee nnang'ani yeeru yese lukusirye shaasa lukai, kiinani na urundi lwa finya yakwe. 20Llo elo alelwiinutya kwa Kristo llya alennduta kauka kwa vafu, kammbika yoo woko lwakwe usha efo ulaniny yelo lwa mumuyo. 21Kanrosa uwe nnu ngota ngyumangyi toose, na wiidimi na finya na ushilyi, kailannya wo irina lyivaa isenda, nta nshi yaa ulaniny-da-fo, naakwa ni yefo ulaniny elo lwiishaa. 22Iruva kavika findo fyoose yoo si ya marende akwe. Kaniinga ulyimbi lweesalallya findo fyoose kimaruma kya siri. 23Ikee nnyo mwiili wakwe, mmbwe yeto amaye fyoose na iinutya fyoose yoo kwakwe.
Currently Selected:
VAEFESO 1: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
