VAGALATIA 5
5
Ringeny uleke lwany
1Kristo mmbo aleluvika valeke, kwa ekyo salaleny, nta mulasheereiywa muvikwa ushingeny-fo.
2Lolen-te, yeny Paulo mmbo shamuvia, kwakooya mwarinwa Kristo nnyatiri mbusha neeni-fo. 3Na lyingyi mmbo shikeevia wo nndu akee nrini, mmbo kinkooye iinutya uvavaso loose. 4Mmbo mukee varauwe na Kristo yeni moose mukunndye yeekennywa usumanu ni uvavaso, mmbo muwoye mukauka efo isaryeny lya Iruva. 5Mashika yese lwiikayo Mmumuyo mmbo luvereye ivika nsia elyo lya usumanu lweendwa nkikusiryo. 6Mashika kyeendwa ni Yesu Kristo irinwa llyisheekyaa-u kindo-fo, ao nta nndu ira nalarinwa-fo, kitiri-u mashora ni kyikusiryo ekyo kikaaywa ni ikunda.
7Mmbo mwekeetammballya nisha, a mmbi alemwiima mulalatye efyo fya dede? 8Yaalashika elyo llyuukye kwa yeto amuvaangye yeni-fo. 9Ntarang'o munnywa mmbo woomwa imbumba lyoose lya nswa. 10Mmbo shimuvikye nsia nnu shikee na Nndumi, sheelyi mmushetiraa nrima wa ngata ingyi-fo. Kyaindi lyo yeto akeemusaveesa mmbo ashewona uvingo lwakwe, na kava-vi. 11Na yeny, lyo vanavama vakwa, kwakooya shavambisa mbony ta irinwa, a nkikyi elyi shiifo shiiteendwaa? Yoo nsindara wa nsalaba mmbo wammba ruu. 12Kyevaa kyeni kukooye yewo vakeemwishura nyinyira veendekuvanikaa!
13Mashika le nyira, vanavama, mmbo mulevaangwa naambo muve valeke, lyo uleke lwany nshi yelo lweelatya mbony ta mwiili-fo, llweetaramana kya ikunda. 14Mashika uvavaso loose mmbo lwainutywa yaa irerony elyi lyimwi-nsi, lyeyaamba, “Kunda nndu ungyi shaasa kukukundye kumuni.” 15Lyo kwakooya mwava sha mafisi mukulye muveni, loleny mulasheekumaa.
Muu wa Kikristo na wa kiulana
16Naasany mmbo shaamba, endeny mweendo wany mwiiteterwaa Mmumuyo, nta mulashiinutyaa lango eto ta mwiili. 17Mashika to mwiili mmbo utiri lango wikapanaa na Mumuyo, na Mumuyo ukakapana na mwiili; mashika efi fivii mmbo fivikyani kiduva kutani mwalemwa imanya kyeetana. 18Kyaindi kwakooya mwateterwa Mmumuyo, mmukyikee-se vashillye mmavavaso-fo. 19Kyasiany mashora a mwiili nng'u yaa nang'u mmbo amanyikye paa, ni fya urui, ukirinda, uravi. 20Iindya maruva a wongo, usavi, ukiduva, myaandu, itira iriso, irooyo nngoo, uriingyi, iraukana, kyama kikasha. 21Isuvana, unangwa, italauwa ndeu, na findo fivakkye efyo. Kya findo fya ngata yeyo mmbo shasongwa imuvia, shaasa llya shilemmaa imuvia, sheelyi vandu veetana findo fya ngata yeyo mbashewonaa ding'u ya umangyi lwa Iruva-fo. 22Kyaindi ndunda ta Mumuyo ni ukundi, ifura, urilalyi, usisiryo, unndu usha, ilyillya, usaari, 23ufoo, mwiiyanu, na veetana efyo uvavaso llutiri kyeetana-fo. 24Na yewo va Kristo Yesu mmbo valemmaa ikapya miili yaawo nsalabeny veisandye-u na makusaro awo maravi na lango yeto sheesi toose. 25Kwakooya lukee na Mumuyo, lweende lwiiteterwaa Mmumuyo, 26Nta lulave vekuniinga nnduma luveni, lwitanaa fya kitatarwa neetiryana finying'u luveni na veni.
Currently Selected:
VAGALATIA 5: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
