ESEKIELI 48

Waavi lwa uruka nnang'ani a ngyufyari

1“Yaa nng'u marina a ngyufyari na waavi lwawo. Kupookya nnyanu wa taari ya ndoo, kulelatya shia ya Hetloni kundefika Hamtai na muri wa Hasar-enoni (eto ukee nnyanuny na Damasko na Hamati taari ya ndoo kuleenda kuuka taari ya ngama fika taari ya nkwaany), kyaawu mmbo kishevaa kya ufyari lwa Dani. 2Kyaawu ekyo kyifiitani na kya Dani kupookya taari ya ngama, fika taari ya nkwaany, mmbo kyivaa kya Asheri 3Ufyari lwa Naftali, mmbo lusheniingwaa kyaawu ekyo kyifiitani na ekyo kya Asheri, kupookya taari ya ngama kundefika taari ya nkwaany. 4Kuuka kyaawuny kya ufyari lwa Naftali, mmbo kyilatyaa kyaawu kya ufyari lwa Manase, kupookya taari ya ngama kundefika taari ya nkwaany. 5Kyaawu ekyo kyifitani na kyaawu kya Manase, kupookya taari ya ngama kundefika taari ya nkwaany, mmbo kyishevaa kya ufyari lwa Efreemu. 6Kyaawu ekyo kyifitani na kyaawu kya Efreemu, kupookya taari ya ngama kundefika taari ya nkwaany, mmbo kyishevaa kya ufyari lwa Rubeny. 7Kyaawu ekyo kyifitani na kyaawu kya Rubeny, kupookya taari ya ngama, kundefika taari ya nkwaany, mmbo kyishevaa kya ufyari lwa Yuda.”

Fyaawu fisauwe nnang'ani ya Uruka

8Kwamma yuuta-u kyaawu kya ufyari lwa Yuda. Mmbo kushootaa-u kyaawu kyitiri waasha lwa kilomita ikumi na ivii na ivari lya vayo fiinani kimwi; kuuka taari ya ndoo kundefika taari ya sinde, waasha ni elo weni, kupookya taari ya ngama kundefika taari ya nkwaany. Mmbo kiinani na kyaawu kya wo ufyari. Yoo nnang'ani a kyaawu ekyo mmbo kushevaa kyeny kwa Iruva. 9Kyaawu ekyo kushoota-u kya Nndumi Iruva, mmbo kishevaa na waasha lwa kilomita ikumi na ivii na kyenga, kwa kilomita ikumi. 10Vakoani mmbo vashevaa na kyaawu kyawo efo kyaawuny ekyo. Kyaawu ekyo mmbo kishevaa na waasha lwa kilomita ikumi na ivii na kyenga, kupookya taari ya ngama kundefika taari ya nkwaany, na kilomita isaanu kupookya taari ya ndoo, kundefika taari ya sinde. Kyeny kwa Iruva mmbo kushevaa yoo nnang'ani a kyaawu ekyo. 11Kyaawu ekyo mmbo kishevaa kya vakoani va mmba ya Sadoki, valya valeshirundya kwa usaari valandefuluke kyeeri kilya Vaisraeli veshifuluka amwi na Valevi. 12Ekyo mmbo kishevaa kyaawu kyawo ng'arushu kyuuka efo kyaawuny kyeele kya uruka; kyaawu kyeele nnu, ekyo kishefiitana na kyaawu kya Valevi. 13Kyaawu kya Valevi wo mmbo kishevaa, taari ya kwasinde ya kyaawu kya vakoani. Kyaawu ekyo mmbo kishevaa na waasha lya kilomita ikumi na ivii na kyenga, kupookya taari ya ngama kundefika taari ya nkwaany; na ivari lya kilomita isaanu kupookya taari ya ndoo kundefika taari ya sinde. 14Nkwiifo kyenga kyoose kya kyaawu ekyo kishekumbwaa ao iniingywa nndu wa ngata shoose-fo; mashika kyaawu ekyo, ni kyeele kwa Nndumi Iruva nakyo mmbo kikee kiviiri ngota fingyi fyoose urukeny.

15Kyaawu kilya kisauwe kisaei-u kya waasha lwa kilomita ikumi na ivii na kyenga na ivari lya kilomita ivii na kyenga, elyo mmbo lyishevaa lya itana findo fyikwaani na findo fyaangu fya efo muriny. Kundo kweekaa neerema shoonga. Yoo nnang'ani ya vayo kushevikwaa-u muri, 16nato mmbo usheinanaa fyeeso fya vayo taari toose, wo taari mita fiku fivii mayana avii na makumi araanu. 17Kuleringitya muri kushevaa-u na uvasha lulatiri kindo, ivari lya-vayo mita iyaana na makumi avii na isaanu. 18Kyaawu ekyo kishesaa-u, mmba ya Iruva yamma itanwa taari ya kwasinde ya muri, kilomita isaanu kwa kilomita ivii na kyenga taari ya ngama, na kilomita isaanu kwa kilomita ivii na kyenga taari ya nkwaany, mmbo ishevaa kyaawu kyeerema kya vandu eva vakee yoo muriny. 19Varundi va muriny walakee wa ufyari lwa Israeli mmbwa vatiri muumu wa irema efo kyaawuny ekyo. 20Kweekyo kyaawu kyoose ekyo kushoota-u, kikee kyaawu kyeele, sanda na kyaawu kya muri, mmbo kyivaa kya fyeeso fiinani taari toose, kilomita ikumi na ivii na kyenga wo taari imwi. 21Kyaawu kishesaa-u, taari toose ta kyaawu kyeele, na kyaawu kilya kya muri kilya fyeeso fyavayo fiinani taari toose kilomita ikumi na ivii na kyenga wo taari, kupookya taari ya ngama, kundefika taari ya nkwaany, usumanu na fyaawu filya fya ngyufyari, mmbo fishevaa fya mangyi. Kyaawu kilya kyeele kulya kyeny kwa Iruva mmbo ishevaa yoo nnang'ani. 22Kyaawu kya Valevi kimwi na kyaawu kilya kya muri mmbo kishekaa nnang'ani ya kyaawu kya mangyi. Kyaawu kya mangyi mmbo kishekaa nnyanuny wa kyaawu kya ufyari lwa Yuda na kyaawu kya ufyari lwa Penyamini.

Fyaawu fya ngyufyari tingyi

23Ngyufyari tisaae mmbo tishaavywa fyaawu fyawo indi: Ufyari lwa Penyamini mmbo vasheniingwa kyaawu taari ya ngama kundefika taari ya nkwaany. 24Kyaawu kifiitani na kyaawu kya Penyamini, kupookya taari ya ngama kundefika taari ya nkwaany, mmbo kishevaa kya ufyari lwa Simiony. 25Kyaawu kifiitani na ufyari lwa Simion, kupookya taari ya ngama kundefika taari ya nkwaany, mmbo kishevaa kyaawu kya ufyari lwa Isakari. 26Kyaawu kifiitani na ufyari lwa Isakari, kupookya taari ya ngama kundefika taari ya nkwaany mmbo kishevaa kyaawu kya ufyari lwa Saplony. 27Kyaawu kifiitani na ufyari lwa Saplony, kupookya taari ya ngama kundefika taari ya nkwaany mmbo kishevaa kyaawu kya ufyari lwa Kati. 28Kyaawu kifiitani na ufyari lwa Kati, kulella na taari ya sinde nnyanu mmbo upookya alya muri wa Tamari, kundefika usoka lwa Meriba-kadeshi kundefika taari ya ngama ya Misri kutani kwafika Yeeve ya Mediterania. 29Ekyo nkyo kyaawu kya ufyari lwa Israeli. Efo mfo kundo vasheutywaa fyaawu fyawo. Wo ufyari kyaawu kyawo. Ni Nndumi Iruva, aamba.

Myaango ya Yerusalemu

30“Muri wa Yerusalemu mmbo ushevaa na isimamba lyishevikwaa myaango yeyaanga neesomuka. Taari ya ndoo waasha lwa isimamba mmbo lushevaa mita fiku fivii mayana avii na makumi araanu. Eyo ni taari ya ndoo. 31Mmbo ushevaa na myaango iraru, mwaango wa Rubeny, mwaango wa Yuda, na mwaango wa Levi. 32Isimamba lya taari ya ngama mmbo lyishevaa na waasha lwa mita fiku fivii, mayana avii na makumi araanu. Taari eyo mmbo ishevaa na myaango iraru: Mwaango wa Yosefu, mwaango wa Penyamini na mwaango wa Dani. 33Isimamba lya taari ya sinde, mmbo lyishevaa na waasha lwa mita fiku fivii, mayana avii na makumi araanu. Taari eyo mmbo ishevaa na myaango iraru: mwaango wa Simeony, mwaango wa Isakari na mwaango wa Saplon. 34Isimamba lya taari ya nkwaany, mmbo lyishevaa na waasha lwa mita fiku fivii, mayana avii na makumi araanu. Taari eyo mmbo ishevaa na myaango iraru: mwaango wa Kati, mwaango wa Asheri, na mwaango wa Naftali. 35Waasha lwa mita ta masimamba moose aana ando amwi ni mita fiku kyeenda. Irina lya muri kupookya inu na mikonu myoose, ni Nndumi Iruva Aiyo.”

Currently Selected:

ESEKIELI 48: MAS2

Highlight

Compare

Copy