ESEKIELI 47

Usoka lukeyuuka efo mmba ya Iruva

1Nndu ulya kashivia alya mwaangony wa mmba ya Iruva. Mura mmbo wekeyuuka yoo sumbai ya kisingiti kya mwaango wa mmba ya Iruva kulealla taari ya ngama. Mura yeto mmbo wekeyeeka wuuka taari ya sinde ya mwaango wa mmba ya Iruva, taari ya sinde ya masapau. 2Naasa nndu ulya kashisomuta poo ashiita na mwaango wa taari ya ndoo, kandeshifita mwaango wa poo eto ulollye na taari ya ngama na usoka lwa mura mmbo lwekeyeeka luuka na taari ya sinde. 3Nndu ulya kwa urungo lwakwe lwa yeesa, keesa mita mayana araanu kuleenda-si taari ya ngama kashiita yoo mureny yeto. Mura ulya ukafika kishengele kya uvayo lwa urende lwakwa. 4Keesa lyingyi mita mayana araanu kashivia shiruuke mura. Mura ukashifikya-ndi. Keesa lyingyi mita mayana araanu, kashivia shiruuke mura, mura ukashifikya kyisi. 5Keesa mita tingyi mayana araanu, na mura ukava ndilyi shaasha nnu nta shilakiidimi yuukyillya. Mmbwekiva lyingyi ikillya-fo, kuuta ikyeleya-nsi.

6Nndu ulya kashivia: “Yewe mwana wa nndu, kwalolla findo yefi? Nndu ulya kashivira fika alya mbai ya mura. 7Kyeeri shefika-u shalollya miri miingyi nnu, taari toose ta mbai ya mura. 8Kashivia; mura yeu, mmbo usheeka uleera sumbai kutani wandefika Araba, nato ukamfika-fo mmbo ushaaluka mura wa Yeeve ya Shumbi isheva mura nsha weena. 9Wo ando mura yeu ushiiraa, mmbo kusheva-fo na mafisi a ngata toose na makunga. Mura yeu mmbo ushaalashaa mura wa yeeve lya Shumbi usheva mura mfoo. Wo ando ushiraa mmbo kushekaa-fo fyuumbe fitiri muu. 10Wereiya makunga mmbo vashekwaala mbaa-mbaa ya Yeeve kupookya Engedi kundefika En-eglaimu veyaanikye mireiyo ya makunga. Mmbo kushevaa-fo ngata shiingyi ta makunga, sheeto tikee efo Yeeve ya Medtirania. 11Indi ando yoo kutiri mapwashi na maruva mbaa-mbaa ya Yeeve nkushevaa-fo mura nsha weena-fo. Kya indi yeto mmbo ushesaa iva mura wa shumbi tupu. 12Numa, efo mbai ya mura eto mmbo kushemyaa-fo miri ya wo ngata, isheende shoonga. Mare a vayo nnyashuuma nta inaa-fo, mmbo ivika ndunda kyeeri kyoose. Mmbo ivikaa ndunda shiiya wo mwiiri mashika ikeewonisa mura wuuka iruveeu kwa Iruva. Ndunda ta-vayo mmbo tishevaa ni shoonga na maruu a vayo asheva miri ya ishiisa ndwari.”

Minyanu ya uruka

13Nndumi Iruva mmbo aamba indi: “Yei nnyo minyanu ya uruka elo mushekooya yaavya ngyufyari ikumi na ivii ta Israeli. Indi lyo ufyari lwa Yosefu vaniingwa lyimwi mmwasi ya yewo vengyi. 14Moose mmbo mushaavaa fiinani. Nshelyisya mboo shisheniingaa vakuu vany uruka elu, nalo luve masaa any. Yeu nto ushevaa nnyanu wa uruka: 15Taari ya ndoo, nnyanu mmbo ushepookya Yeeve ya Mediterania kulelatya muri wa Hamati kundefika Sedadi. 16Kupookya yoondo kundefika Berota na Sibraimu (eto ukeennang'ani ya Damesko na Hamati) kundefika muri wa Haser-hatikoni eto ufiitani na Haurani. 17Niindo nnyanu ushevaa kupookya yeeve lya Mediterania kundefika Hasar-enoni taari ya ngama ufiitani na fyuungo fya Damasko na Hamati kwa taari ya ndoo. 18Taari ya ngama, nnyanu ni mura wa Yordan eto ushiraa nnang'ani ya Haurani na Damasko, Gileadi na uruka lwa Israeli. Nato mmbo ushiraa taari ya ngama ya Yeeve ya Shumbi fika Tamari. 19Taari ya sinde, kupookya Tamari nnyanu mmbo usheenda undefika usoka lwa Meriba-kadeshi. Kupookya Meriba-kadeshi; nnyanu mmbo usheenda undefika taari ya sinde nkwaany kutani kwandekooya Yeeve ya Mediterania, kuleera taari ya ngama ya uruka lwa Misri. 20Taari ya nkwaany, nnyanu mmbo ushevaa Yeeve ya Mediterania, kusaami kulella taari ya ndoo, kutani kwandefika ando kweyaanga Hamati.

21“Naasany niindo mushaavaa uruka elu nnang'ani yaany, kyuukana na ngyufyari ta Israeli. 22Mmbo mukwaavya ive masaa any. Veny vashekaa nnang'ani yaany, nawo valemmbonnya vana kunu kwany, kyeeri mukeyaava, nawo muvewootya-fo waavi lwawo. Yewo ni kuti muveevatannya kimwi sha vana va Israeli veni. Nawo mmbo vatiri usumanu lwa waavi lwa uruka kyimwi sha ngyufyari ta Israeli. 23Wo nndu mwiny, akee kwany, mmbo asheniingwa waavi lwakwe, kyimwi sha vandu ewo akee nnang'ani yaawo.” Ni Yeny Nndumi Iruva, shaamba.”

Currently Selected:

ESEKIELI 47: MAS2

Highlight

Compare

Copy