DANIELI 1

Vakoo Valya Vakwaanannya na Mangyi Nebukadnesa Kariny Kyakwe

1Kwikee mwaaka wa kararu, wa ushilyi lwa mangyi Yehoyakimu wa Yuda, Nebukadrasa mangyi ya Babilony mmbo esha kakaba neetira muri wa Yerusalemu. 2Nawe Nndumi, kaniingya mwaanya, Yehoyakimu mangyi ya Yuda, natirwa neevikwa maakony a Nebukadnessa amwi na fiiya maata fya mmba ya Iruva. Naasa kankurika mifungwa amwi na fiiya fyakwe fika urukeny lwa Babilony, kandefivika efo mmba ya iruva lyakwe, amwi na fiiya fya umasi lwakwe. 3Naasa Mangyi kavia Ashpenasi, nkapendafu wakwe nniini, amweengye vandu maata va Israeli wookye efo mmba ta kimangyi, vandu varango, woorotu, 4vandu vakoo valatiri mfere, vatiri fwana shisha, vatakusu ikulosha na imanya findo, vandu vashiidimaa ikaa kufii na ifurukannya mangyi efo mmba ya umangyi, vatakusu ikulosha isoma na ireiya kishomu kya Vakaldayo. 5Mangyi kavavasya vakoo ewo vaniingwa shoonga shisha wo nkonu, shoonga eyo sheni mangyi alyee, na mfinyu eto anii. Nawo mmbo vekundikye, valoshwa ando a myaaka iraru, ikammisya varawa mbee ya mangyi. 6Nnang'ani yaawo ni Danieli, Hanania, Mishaeli na Asaria, woose ni va ufyari lwa Yuda.

7Nkapendafu nniini ulya, kavafishya marina engyi, Danieli kamfishya Belteshasa, Hanania kamfishya; Shedraki, Mishaeli kamfishya; Meshaki, na Asaria, kamfishya Abedneko. 8Indi-we Danieli karummbwa shila, sheelyi-we nnyashiidimaa ikutefusa nalye shoonga shisha ya mangyi, neena mfinyu nsha wa mangyi-fo, kweekyo katereva nkapendafu nniini, nanniinge muumu naambo alasheelya findo fishemweengye utefusu. 9Iruva keekya Danieli, nkapendafu nniini keerikya kiterewo kya Danieli nalashekutefusa. 10Naasa nkapendafu ulya nniini, karouwa Danieli, kammbia, “Mmbo sheereiye mangyi, nndumi wakwa, eto alesauwa shoonga na kyeena, nawe ashelollya finya yafo ikee kilasha na wooroye vafo vairika lyimwi-nsi, mmbo shishewaawa.” 11Kweekyo Danieli kasora mweekyi umwi emmbikwa mashoreny elola vakoo valya vararu amwi nawe kammbia; 12“Lulole yese mashinga afo ando a mikonu ikumi kwiiluniinga nyany teelya na mura weena. 13Numa ya vayo kushelulola yese, na vakoo valya vakeelya shoonga ta kimangyi, kulole mmbaki vatiri finya shisha mmwasi. 14Nawe mweekyi ulya emmbikwa mashoreny keerikyana nawo kya mikonu ikumi.”

15Yikyisya mikonu ikumi vakalollywa mmbo varendeiye vakatira finya shisha vakailannya valya vekeelya shoonga shisha ta kimangyi. 16Naasa mweekyi ulya kaisityo-u ivaniinga shoonga ilya ya kimangyi kavaniinga nyany.

17Vakoo yeva vaana, Iruva kavaniinga wiidimi lwa ikulosha na imanya findo fiingyi fya wo ngata shisha ta vandu. Kya mmwasi, Iruva kaniinga Danieli urango lwa mmwasi, lwa itambashwa moorya na findo fishekaa fishe. 18Kwiikyisya kyeeri kilya mangyi alaamba llyo vasherawaa kwakwe, nkapendafu ulya nniini, kandevavika mbee ya mangyi Nebukadnessa. 19Mangyi karera nawo woose, Danieli, Hanania, Meshaeli na Asaria vakasennya vakailannya valya vengyi woose. 20Wo kindo mangyi alevavesa, na wo kindo elanngye imanya kikwaani na urango usha vakamanya na mbony ta veelafya na vasavi vakailannya ka ikumi vasavi valya vakwe woose yefo umangyiny lwakwe. 21We Danieli keengera ikaa efo mmba ya kimangyi fika mwaaka wa mbee wa ushilyi lwa mangyi Koreshi.

Currently Selected:

DANIELI 1: MAS2

Highlight

Compare

Copy