ESEKIELI 18

Ngapo kwa wo nndu

1Irero lya Nndumi Iruva lyikashisheya lyingyi lyikaamba: 2“A nkyikyi yelyi mwawuyya-se kyaaso yekyi kunu urukeny lwa Israeli?

Mwishaambaa vandeye vallya ndunda tiwawaa,

mayoo a vana akeenda saafu!”

3Yeny Nndumi, Nndumi Iruva eefo na muu; nkukyikaa-fo kyimaruma kya iwuuyya-se kyaaso yekyi kunu Israeli-fo. 4Lola mirima myoose nnyakwa, nrima wa ndeye ni wakwa; ni kiwo na nrima wa mwana ni wakwa, ni kya dede nrima llyamari ni kuti ufwe.

5Nndumi Iruva aamba, “Indi kwakooya nndu ni nsumanu, nawe akeetana yefyo fya usumanu, 6nnyakeelyiyya mafumbuu, nnyeepo miso nalole mafwanu a mmba ya Israeli, nalatuusa nka wa amrasa wakwe, nalandekaa na nka kyeeri kya suku takwe 7nalalamyaa masaa a nndu, nnyaviiraa sye atiri, we nyinndu alasokaa nndu ungyi masaa akwe kwa finya, nawe kavaniinga kyelya valya vatirwa nshaa, na ivavika isara valya vakee mbereto; 8alaakuyaa nndu naambo nakooye-fo mbusha, nalawaryaa kindo kya ntambo ao kya mmwasi, kakwiisa makasha, karumbuya kya usumanu ando a nndu na nndu ungyi; 9na kwakooya alatya na yiinndya mikaaye na mavavaso akwa, ni kya dede nndu yeu ni nsumanu mmbo ashekaa na muu.

10“Indi kwakooya eera mwana mwalashya na mwiwoo, mwitana kimwi kya mbony yeto 11nta nalakunde itana kimwi kya findo yefyo fikwaani; indi kalya uve mafumbu, na ituusa nka wa amurasa wakwe, 12na ilammya vafwafwa na vaturi, na isoka vandu masaa awo kwa finya, nta nalataa sye, keepoyya mafwanu miso, na itana fya kinyala, 13nawe kaakuya vandu naambo akooye-fo mbusha; na iwarya fya mmwasi; a-ndesa ashekaa na muu? Nnyakaa na muu! Antana findo fikasha fifye indi-fo, ni kuti nafwe; na samu yakwe naveswa muni.

14“Indi kwakooya nndu yeu eera mwana, nawe kalollya ngyulyamari toose yeto ndeye aletana, kaereya, nalatane lyimwi lyavayo, 15nalallye uwe ya mafumbu, iipoyya mafwanu a mmba ya Israeli miso, nalatefuse nka wa amurasa wakwe, 16nalyamarye nndu, nalalange kindo akeemwaarye, nalalamyaa masaa a nndu, mmbo aniinga shoonga takwe yewo vatirwa nshaa, na ivavika isara yewo vakee mbereto; 17na lyingyi kwakooya alefiisa woko lwakwe lulatane fya utefusu, nalavaryaa mbusha ao findo fya mmwasi, kalatya mirummbuye ya usumanu na yiindya mavavaso akwa, yeu nnyashefwaa kyimaruma kya ukasha lwa ndeye-fo, ni kya dede mmbo ashekaa na muu. 18Mbony ta nde-wakwe, kimmba aleva nndu wa isisa vandu, na ivatannya findo fivavaa kava, mwiisoka mwanamaye masaa akwe na finya, na itana findo filakee fisha nnang'ani a vandu vakwe, lola ni kuti nafwe kya mitannyi yakwe.

19“Indi yeni mmbo mwaamba, ‘A nkyikyi mwana nalakurika ulyamari lwa ndeye?’ Kyeeri mwana ulya atana fya usumanu na yiinndya mavavaso akwa, ni kya dede mmbo ashekaa na muu. 20Nrima ulyamaraa nto ushefwaa. Mwana nnyashipoo ulyamari lwa ndeye-fo, nta nde nnyashepoo ulyamari lwa mwana wakwe-fo, usumanu lwa nsumanu llwakwemuni; na uravi lwa nravi llwakwe muni. 21Indi nndu nkasha kakurya na ira ngyulyamari takwe toose atannyi, na yiinndya mavavaso akwa moose, na itana yefyo fya dede na usumanu ni kya dede mmbo akaa na muu nnyafwaa-fo. 22Ngyulyamari takwe toose atannyi ntikumbuwa tara-fo, kyimaruma kya usumanu atana mmbo akaa na muu.” 23Nndumi Iruva avesa, “A ndesa, mmbo shifurye kya nndu afiyya ulyamariny? A nshi-kyeeshia-se mmwasi nalashike nayiisitou shia yakwe shikasha nakkye. 24Indi kyeeri nndu nsumanu ashealashika, kava mwiitana makasha, na itana utefusu sha vatefusu vatanaa, nndu yeu ashekaa na muu? Kya mitannyi yakwe misha myoose atannyi, nta lyimwi lya-vayo lyikumbuwa-fo. Kya ulyamari lwakwe yelo atana, na utefusu we mmbo ashefwaa.”

25Indi yeni mmbo mwaamba: “Shia ya Nndumi, nshi ya usumanu-fo.” Ulaalu arannyiny shimmuvie, Yeni Israeli: A ndesa! Shia yakwa nshi-yo ikee ya usumanu-se? Shia tany, nshito tiwuuye usumanu-se? 26Nndu nsumanu kara itana fya usumanu katana fya ukasha na ifwa, mmbo afiyya yefo makasheny akwe aletana. Kya makasha yo atannyi mmbo afwaa. 27Lyingyi, nndu nkasha kyeeri ashealashikaa, katana yefyo fya usha na usumanu, mmbo akiraa nrima wakwe, usheva na muu. 28Mashika mmbo ammalashika, akisoongya kaisityou makasha akwe moose, kya dede nnyashefwa-fo mmbo ashekaa na muu. 29Indi, mmba ya Israeli mmbo yaamba, “Shia ya Nndumi Iruva nshi-ya usumanu-fo. Yee, yeni va mmba ya Israeli; shia takwa nshi-to tikee ta usumanu-se? Nshi shia tany tilakee ta usumanu-se?

30“Naasany mmbo shishemuutya uvingo yeni va mmba ya Israeli, wo umwi kikwaani na mitannyi yakwe, ni Nndumi Iruva aamba. Kuryeny na yaalashika mure-fo mitannyi yaany mikasha myoose naambo mulasheimamitwa. 31Ereny kwaasha ngyulyamari tany toose yeto mulellyamara, muree ngoo shiiyya na mirima miiyya: nkyikyi mukunndye ifwa, yeni va mmba ya Israeli? 32Mashika yeny, nshifurye kya nndu afwa-fo, ni Nndumi Iruva aamba: kweekyo alashikeny mukye.”

Currently Selected:

ESEKIELI 18: MAS2

Highlight

Copy

Compare