ESEKIELI 17

Kyaaso kya Ngoru na nsabibu

1Irero lya Nndumi Iruva lyikashisheya lyishaamba: 2“Yewe mwana wa nndu! Uraawe! Woyo! Via vana va mmba ya Israeli kyaaso. 3Kwaambe; Nndumi Iruva aamba:

Kweifo ngoru imwi ing'ani nnu,

yetiri maru maniini,

itiri ngywaa shiingyi shaasha

itiri fwana ta wo ngata

ikarumbuka fika ifumbu lya Lebanoni,

ikandekaya uroro lwa mweresi,

4ikafisha iramba lya vayo lya uwe mmwasi,

ikakurika fika urukeny lwa vekapa mbusha;

ikavika yefo muriny wawo umwi.

5Naasa ikaipoo mbeu ya uruka ikaivaaya uteriny usha;

ando kutiri mura mwiingyi.

6Mbeu ikammya ikang'ana ikava nsabibu

wa ngata ya nri ukwallye-si;

na maramba a vayo akamwiindukya,

na miraari ya vayo ikakwaala sumbai ya vayo.

nsabibu ukapara maramba a maru meengyi.

7Indi kweifo ngoru ingyi ing'ani;

yetiri maru maniini atiri ngywaa shiingyi,

Naasa nsabibu yeu ukamwallya miraari yavayo.

Ukamwiindutya maramba akwe,

naambo aunise.

8nsabibu mmbo wekemuute kitaluny kya wayo.

ukandevaaywa ando kutiri uteri usha na mura mwiingyi,

naambo ukooye ipara maramba na ivika ndunda

wiidimi iva nsabibu wa kimangyi!

9Ulaalu yeny Nndumi Iruva muni finya shakuvesa:

Ndesa, nsabibu yeto ulung'annya-u?

Ndesa, nnyashiillwa-se miraari ya-vavyo

na yaarammbwa maramba a vayo

na iporisa ndunda tavayo,

na yuumisa maramba a vayo makoo?

Nkukundikye-se nndu atiri finya ao itorito

yiillwa wuuke yefo uteriny-fo.

10Wammbakywa, ung'anaa ndesa?

Yelyi ukapoo ni uraato lwa taari ya ngama, usiikaa?

Mmbo ushumyaa yoo kweni umiyye.”

Kyaaso kya ngoru na nsabibu kyarambuwa

11Naasa irero lya Nndumi Iruva lyikashisheya lyishaamba: 12“Ulaalu vesa vandu yewo valyang'a, kwamanya-se kindo kyaaso yekyo kyaamba? Naambo kuvavie sheelyi mangyi ya Babilony mmbo esha Yerusalemu, kashoondwa-fo mangyi amwi na vasongoru vakwe kavakamara Babilony. 13Naasa keepoo-fo umwi wa mmba ya kyimangyi vakavikyana kyaasa kamwaata mashoreny. Kasamisa-fo vandu valya vatakusu woose kavarwaa kwaasha, 14naambo umangyi yelo luve ufwafwa na yiinndya kyaasa kya mangyi ya Babilony.

15“Indi kamwiila, neeruma vandu Misri, naambo vandemweengye frasi, na itorito iniini lya vaskari. A ndesa asheidimisywa? A nndu atana mbony ta ngata yeyo ashidimaa iturunya? Afishe mavavaso neeturunya? 16“Shikulyiiya mboo yeny Nndumi Iruva shiifo na muu, ando alya kukaa mangyi, nndu yeto alemmbika nave mangyi, yeto alemwiila kafisha mavavaso na kyaasa kyakwe nnyafiyya kulya Babilony. 17Naakwa itorito iniini lya mangyi ya Misri na mamwiingyi a vandu mmbamaa kindo fireny-fo. Kyeeri vashekooyaa itana ulale na turuve naambo wamamite vandu veengyi. 18Mashika mmbo aleepala na ifisha kyaasa kyakwe, mmbwe aleimmbwa mavavaso moose na mbony yeti shoose tikatanyika nnyaturunyaa-fo.

19“Naasany, shakulyiyya mboo yeny Nndumi Iruva, shiifo na muu, ni kya-dede, kyaasa kyakwa alefisha naiimmbwa mavavaso akwa mmbo ashewona ngapo niini. 20Mmbo shishemwambikkya nreiyo, nato ushentira, shimweende fika Babilony; shindemuutya uvingo shiinderara-fo nawe kyimaruma kya ifisha ivavaso yelyo lyakwa. 21Na yewo vakamare mifungwa wakwe woose, na matorito vasikari vakwe woose, mmbo vawaawa na usu, na yewo vashesaa-fo mmbo vashenyanyatwa wo ando, neeni llyo mumanyaa sheelyi yeny, Nndumi Iruva shammaamba.”

Iruva avika kyaasa kya nsia

22Nndumi Iruva aamba indi: “Yeny mmbo shisherummbwa maa ya mweresi, shishevaakya ando yefo firambeny fya-vayo yefyo fikee uwe shuute-u kirammba kimwi yekyi kimamiri, neeny shindekyivaakya uwe ya ifumbu yaasha, lyikee uwe nnu; 23ifumbu yaasha kunu Israeli, nayo maa yeyo isheparaa maramba na ivika ndunda, nayo isheva mweresi nsha, na kwasi ya wavyo kushekaa-u mafisi a wo ngata na kirishe kya maramba vayo kushekaa-fo ndeye titiri maru ta wo ngata. 24Na miri myoose ya marema ishemanya sheelyi Yeny, Nndumi Iruva, mmbo shifiisa nri mwaasha, na ilyeesa nri nfii, na yuumisa nri mmbisi neenisa nri muumu, ni yeny Nndumi Iruva shaamba na yeny mmbwe shitanaa mbony yei.”

Currently Selected:

ESEKIELI 17: MAS2

Highlight

Copy

Compare