ESEKIELI 16

Kyiila kya muri wa Yerusalemu

1Lyingyi irero lya Nndumi Iruva lyikashisheya lyikaamba: 2“Yewe mwana wa nndu, manyisya vandu va Yerusalemu mbony ta uravi lwawo. 3Kuvavie kindo Nndumi Iruva akerera kya muri wa Yerusalemu: Yeni ukuukuny na kundo muwonikye ni urukeny lwa Kanaani, ndeye waany ekee Mwaamori na maaye waany ekee Mwiti. 4Nkonu ulya kwewonika nkwerumbuwa kipoposho nta nkwesangywa na mura; nta isingwa na shumbi nta nkwevikwa soori-fo. 5Nkwiifo nndu ekwuyiiya mashoya nakutannyi findo yefyo-fo, woose mmbo valekweera imungony mashika nkonu yeto mmbo kwekee nriti mbee yaawo.

6“Kyeeri sheera shakulollya mmbo kwekeekwaalaala yefo samuny yafo; shakuvia, ‘Salala! 7Mmya na ing'ana sha nganu shironge nndeny. Neewe kwang'ana kwava mwaasha sha mwana wa kyika atimmye, mavee afo akang'ana na fii nato tikalyaa. Indi lyo mmbo kweifo mbereto.’ 8Kyeeri shesheera lyingyi kufii na yewe, shakulola shakooya kwanng'ana fika ando kwa vandu ikukapa miso. Neeny shakuutya isara lyakwa shakusikkya. Shalya mma na yewe kwaaluka wakwa. Ni yeny Nndumi Iruva shaamba.

9“Naasa shakusangya na mura shakuuta samu ilya kweefwani na ikwaamba mafura. 10Shakuvika isara lyifumi nisha, shakuvika fyaaru fisha fya shonyi, shakoosya nkorori nsha na kitambaa kya lesi. 11Shakushopa na findo fivaramaa, shakuvika pangili ta maakony na nse singony. 12Shakuvika kyipuli kya mmbwa na maarwi afo; na nrweny wafo shakuvika ureto usha. 13Kwashopwa nsaabu na fesa. Masara afo akava ni kitany shisha, nang'u mmbo ekee mooke. Shoonga yafo mmbo yekee nswa mmamiri, mafura na ukyi. Kwasennya kwailannya vaka wa mmba ya kimangyi. 14Irina lyafo lyikakwaana nnang'ani a masanga moose, kimaruma kya usha na fwana yafo, kyeendwa ni yeny shimuni ngata shilekusangya na ikuvika utore usha. Ni yeny Nndumi Iruva shaamba.

15“Indi yewe mmbo kulekusirya usha lwafo, na ngata kwiishiwa kwalala na wo nndu kullollyaa. 16Soori tafo maata kwaallwa teeshopa ando kwafo kweekwanannya na vatuusi kwanderunndya-u mashora afo a utuusi; kindo kilandetanyika nta kilakaa kitanyike lyingyi. 17Kweepoo findo fyafo fya mawe akwa a saabu na fesa filya shekuniinga kwandesongosya-fo mafwanu a womi kwandefina nang'u utuusi lwafo. 18Kweepo masara afo alya mafumi nisha kwandesikya nang'u mafwanu yoo, ubani na mafura akwa kwaniingya mafwanu yoo. 19Naakwa ni nkate wakwa ulya shekuniinga, kwalya shoonga shisongosye na nswa mmamiri ukeensande mafura na ukyi, kwasheniinga mafwanu kyikee kya iyalelemba, ni Nndumi Iruva aamba.

20“Lyingyi kwaniingya vana vafo va womi na va kyika, valya kweshiwonnya, vakava kiraso kyeemamitwa kya mafwanu. 21A mmbo kyekee ni kindo kidu deny iniingya vana vakwa kiraso kyekora na muro kwa mafwanu yoo, kimaruma kya utuusi lwafo? 22Nta nkulekummbwa utuusiny na ngeeny yafo shikasha, kyeeri kilya kya ukoo lwafo kwikee mbereto nta kulatiri kindo kwikwaalaalaa yefo samuny yafo.”

Utuusi lwa Yerusalemu

23Mafurumyony a uravi lwafo loose, Nndumi Iruva aamba, “Woshi! Woshiny llwafo, Yerusalemu 24Mmbo kulekutefusa, kwava ntuusi kweelannya, kwalyamara ukoo lwafo, wo nnyanu wa mfongo na nndu kukwaanannya nawe kavekutefusa. 25Kwavika nganga wo ando yefo shia ta mbasero; naambo kwiidimi ituuswa mmwasi na mmwasi. 26Kweengera iva na lango niini ya utuusi na vaamrasa vafo Misri, nakyo ni isheengye irooywa ni ngoo mmwasi. 27Kulollye ulaalu ngaa yafo shikasha nnyo yakweengye ngapo yei, shaangura shoonga yafo, shakureeya vakiduva vafo vaniini, vana va kyika va Vafilisti yewo kulevasuta nnu kimaruma kya utuusi lwafo. 28Kimaruma kya lango ta utuusi lwafo kweengera-se ituuswa kwandefika kwa Vaashuri kwatuuswa mmbo. Nta nakyo nkilekupaana ando-fo. 29Yewe kumuni kwandekulunga-se na vekapa mbusha vandu va Babilony kya utuusi, nta nkilemaa-fo.

30“Nkyikyi yelyi kutiri nrima wa ilanga womi king'ani indi, ni Nndumi Iruva aamba: Shaasa kuletuuswa kifye indi, kya dede yewe mmbo kukee nka isonga nkutirwa ndwari ya utuusi. 31Nka atannyi nganga wo ando kutiri shia ta mbasero, 32nka isonga kuwarya wo nndumi kullollyaa ando a iwaarya mmi wafo, kwava nka wa shia. 33Womi mmbo waniinga masonga findo, lyo yewe kukeeniinga womi naambo washe kwafo. Kwava nka kuruuya womi, ando a womi ikuruuya yewe; kwaruuya vakutuuse. 34Yewe mmbo kukee kilasha na vaka vengyi kya utuusi lwafo, mashika ando a ituuswa, yewe mmbo kutuusa. Kweekyo nkwiifo fesa kuleniingwa-fo ni yewe kuniingya, kwava kilasha deny na vaka vengyi.”

Mirumbuye ya Iruva ya Yerusalemu

35“Yewe isonga, arannya irero lya Nndumi Iruva! Nndumi Iruva aamba indi: 36Kimmba usutu lwafo lukee paa kwakweengya mbereto kwituusa vesha vafo, kyimaruma kya mafwanu afo moose, kimaruma kya samu ya vana vafo kwaaniinga. 37Kweekyo lola mmbo shikeesangyirya vakunde vafo woose, valya kweelyaa nawo vesha na vakasha shivaummbye wooka taari toose, shikusaleese mbee yaawo vakulole kwikee mbereto. 38Shikurummbuye mwaandu sha vaka valya vafishaa ummba na iwaa; shishekuutya uvingo lwa ngoo na kyififi. 39Shishekurambikya maakony a vakunde vafo, nawo vashewunndwa na ifishafisha nganga tilya tafo kundo kweetuusywaa; vashekwammbwa soori na ikusoka findo fyafo fya mawe a wuuru uniini vakure mbereto. 40Vashekweengye itorito lya fira lyikukape na mawe, neekumamanya fyenga fyenga na ngyusu tawo. 41Vashekuutya uvingo lwa ikora mmba tafo na muro, na vaka veengyi vashelollya uvingo na ngapo yafo. Neewe kusherumbuya tapa kulashekaa kutuuse lyingyi nta ituuswa. 42Ni indo ngoo na kyififi kyakwa kishemandaa, shive mfoo-sau nta shilakisswa lyingyi. 43Mashika yewe mmbo kulerekywa kyeeri kilya kwikee nkoo. Indi kwashinyaafisha kyeendwa ni findo yefi fyoose, lola shikekoolotya ngapo kyeendwa mitannyi yafo. Ni yeny Nndumi Iruva shaamba.”

Ikungu na Nshira

44Arannya shikuvie yewe, mwiirera fyaaso, ni kuti arere kyafo kwi kyaaso yekyo naambe, “Ikungu na Nshira,” ngaa ya maye nnyo ngaa ya mwana-mfu. 45Kya dede yewe mmbo kukee mwana-mfu wa nka asuuye mmi na vana vakwe, yewe mmbo kuvakye vefu va mau, yewo vasuuye womi na vana vawo. Mau ekee Mwiti na ndoo ni Mwaamori. 46Mfwamau mmbee ni Samaria yeto akee taari ya ndoo amwi na vefu vakwe, Mfwamau n-du ni Sodoma yeto akee taari yafo ya sinde, amwi na vefu vakwe. 47Indi yewe ilatya ngata yaawo na mitannyi yaawo mikasha nkilekumaa-fo. Kwa kyeeri kifii nnu kulekaa nawo, mmbo kuletana makasha kwawailannya kwa shia toose. 48Ni kya dede mmbo shakulyiya mboo yeny Nndumi Iruva, mfwamau Sodoma na vefu vakwe, nnyaletana yekyi kuletana yewe na vefu vafo-fo. 49Lola yelu mmbo lwekee ulyamari lwa mfwamau Sodoma, we na vefu vakwe vakakushopa kimaruma kya shoonga na mbora yeto veetiri, vakarekywa ilola vaturi na vakiva. 50Vakakushopa vakatana fya weesi usanguny lwakwa. Neeny shikilollya indo shavarikya ngapo shavasamisa nalyimwi-nsi. 51Ulyamari lwa Samaria llwandefikya kyenga kya ulyamari lwafo-fo; mmbo kutannyi fya ulyamari kwailannya; kikeenngye mfwamau kalollywa ni nsumanu, kimaruma kya weesi lwafo uniini kutannyi. 52Kurike usutu lwafo kumuni deny! Mashika ulyamari kutannyi ni ulyamari ukasha lukailannya lwa vefu va mau, vakalolwa ni vandu vakalollywa ni vasumanu kyeendwa ni ulyamari lwafo lung'ani nnu. Kweekyo usutu na yiipalwa ni fyafo, kurike yewe kumuni, mashika yewe mmbwe kuleengye vefu va mau vakalollywa mmbasumanu.

Sodoma na Samaria ishetanwaa wiiya

53“Mmbo shisheviirya Sodoma mbora tawo, we na vefu vakwe, Samaria na vefu vakwe, na mbora yafo isheva yefo nnang'ani ya mbora tawo. 54Naambo kukooye isuka na ikurika usutu lwa yefyo fyoose kuletana na mirima yaawo ikooye yaanguywa. 55Kya vamfwamau, Sodoma na vefu vakwe mmbo vashewuyaa kulya urukeny lwawo; na Samaria na vefu vakwe ashewuyaa kulya urukeny lwakwe; naakwa ni yewe na vefu vafo mmbo kushewuyaa kulya urukeny lwafo. 56A mfwamau Sodoma nnyekee irero lya ituula kaniny kafo llya lya ukushopi lwafo, 57kulaore makasha afo ammanyika? Ulaalu kwammbaka Sodoma, kwava kindo kya tangalu nnang'ani a vefu va Edomu, na vaamrasa vakwe woose, na vefu va Vafilisti vaamrasa vafo valya veekusauye. 58Ngapo ya utefusu na meenngye yafo mmbo kukurikaa kumuni. Ni yeny Nndumi Iruva shaamba.”

Mma ya llung'anu

59Yee, ni indo Nndumi Iruva aamba: “Mmbo shikutannya shaasa kuletana, mmbo kulekilya mma, kwepala mavavaso. 60Indi yeny mmbo shikummbwa mma ilya yakwa shelya neewe kyeeri kya ukoo lwafo. Ive mma yakwa neewe ya llung'anu. 61Llyo kushekumbwa meenngye yafo, kushelollya usutu kyeeri nshekuniingya vamfwamau n-du na n-niini sha vefu vafo, nta nshi kimaruma kya mma nnang'ani yakwa na yewe-fo. 62Shisheshimbiraa mma yakwa na yewe, llyo kushemanya sheelyi yeny mmbwe Nndumi Iruva. 63Naambo kukumbwe kweereye neemalallya sau, kyeendwa ni usutu, elyi shikufwaaya findo fyoose kulyamarye, ni yeny Nndumi Iruva shaamba.”

Currently Selected:

ESEKIELI 16: MAS2

Highlight

Copy

Compare