ESEKIELI 14

Iruva asuuye Miindye ya maruva a wongo

1Nkonu umwi vamiku maata va Israeli vakasha kwakwa ishivesa mbony, 2Naasa irero lya Nndumi Iruva lyikashisheya lyishaamba: 3“Yewe mwana wa nndu, vandu yeva vankusirye maruva engyi yefo miriminy yaawo, findo fisheveengye misindara na uravi yefo mbee ya usanguny lwawo; vakawa ulyamariny kyeendwa ni marua awo a wongo. Mmbo kishiidimika kyikwi ishivesa mbony. 4Kweekyo yewe rera nawo kuvavie, Nndumi Iruva, mmbo aamba: Nndu moose wa yefo mmba ya Israeli, yeto ashekusirya na yiindya maruva a wongo yefo nriminy wakwe, na findo fisheveengye misindara na uravi, yefo usanguny lwawo, nalyo kakunda ishevesa mbony kwa nkisuku, yeny Nndumi Iruva mmbo shinrouwa shimuni, kimaruma kya mamwiingyi a maruva yoo a wongo, 5Naambo shiidimi yuumbya mirima ya vana va mmba ya Israeli valya valennyanyaka kyeendwa ni maruva a wongo.

6“Naasany, via yewo va-mmba ya Israeli sheelyi Nndumi Iruva aamba: Kurieny mwaalashike, mulakane na maruva yoo any a wongo mulakane yefo mitannyiny yaany mikasha myoose. 7Mashika yeto moose wa mmba ya Israeli, ao muny akee kyaarony kunu Israeli, kashikapa mungo, kandekusirya maruva akwe a wongo na mitannyi ingyi yeyo ishemweengye misindara na makasha yefo usanguny lwakwe, nalyo kasha ivesa mbony takwa kwa nkisuku yeny Nndumi Iruva mmbo shishenrouwa shimuni. 8Na nndu yeto shinkape mungo; shimwante na illakanisa nnang'ani ya vandu vakwa, llyo kumanya sheelyi yeny mmbwe Nndumi Iruva. 9Kwakooya nkisuku alemba karera irero lya wongo, nyeny Nndumi Iruva shalemba nkisuku yeto; nawe ni kuti shimwaante na imuuta nnang'ani a vandu wakwa Israeli. 10Mmbo vashekooya ngapo ya ngata imwi, ngapo ya nkisuku yeto na ngapo ya mwiivesa mbony, mmbo ishevaa ya ngata imwi. 11Nta vana va Israeli valakikaa vafishe ivavaso nta yaangya mbai, itana fya utefusu. Vasheva vandu vakwa na yeny shisheva Iruva waawo. Ni Nndumi Iruva aamba.”

Noe, Danieli na Yobu

12Irero lya Nndumi Iruva lyikasheshiya lyikashivia: 13“Yewe mwana wa nndu, Kwakooya uruka lwashilyamarya, na itana fya utefusu, neeny shavarikya ngapo ya woko lwakwa, shivasoka shoonga yeelya na uruka lwawo; shaa niini kwa vandu woose na mafisi ivaolokye, na iiwaa nndu na ifisi, 14naakwa ni kwa vandu yeva vararu, Noe, Danieli na Yobu vakee nnang'ani yaawo, mmbo vashekooya ikirwa muu yaawo-nsi kimaruma kya mikaaye misha na usumanu lwawo, ni Nndumi Iruva aamba;

15“Kwakooya sharuma mafisi a ngoroshony ishelyamara uruka, na findo fiifo fyoose, nta kuleefo kindo vavikye nsia, nta vandu valashiidima ikaa-fo kimaruma kya mafisi, 16naakwa vandu yeva vararu vakee urukeny yelo, ni yeny shiifo na muu yeny Nndumi Iruva shaamba, mmbashekira mwana nave wa vomi ao wa kyika-fo indi-wo mmbo vashekooya ikirwa na uruka lusheva kasa koomu lulatiri vandu. 17Ao kwakooya sheende ngapo urukeny yelu; fira ikapani wo ando urukeny koose; vandu sanda na mafisi vakooye ngapo ya fira, 18naakwa vandu yeva vararu vakee urukeny yelo, shiifo na muu yeny Nndumi Iruva shaamba, mmbakira mwana, nave wa vomi ao wa kyika-fo, indi-wo mmbo vashekooya ikirwa. 19Ao kwakooya sharuma ndwari shikasha kunu urukeny, shirooywa ni ngoo shinyaasi, shapuswa samu uka vandu na mafisi; 20Naakwa Noe, Danieli na Yobu vakee nnang'ani yaawo, shiifo na muu mmbashekira mwana, nave wa vomi ao wa kyika-fo; indi-wo mmbo vashekiraa muu wawo kimaruma kya usumanu lwawo.”

21Nndumi Iruva aamba: “A nshe mmwasi elyi shirikyaa Yerusalemu ngapo takwa shikasha yiinya, fira, shaa, mafisi makasha na ndwari shuumu imamita nndu na ifisi! 22Indi kwakooya kwiifo washeturunnyaa wakooye ikira vana va vomi na vakyika, mmbo kuvalolaa kyeeri vashaa kwafo, ngata ya mitannyi na ngyulyamari tawo mmbo tishekoora paa sheelyi ngapo yeyo shilevarikya Yerusalemu mmbo yiinani na makasha awo. 23Vakakunyiisa na ikurya kya meengye yaawo, llyo kumanyaa sheelyi, ngapo yeetiri kyimaruma kyimaaye, ni yeny Nndumi Iruva shaamba.”

Currently Selected:

ESEKIELI 14: MAS2

Highlight

Copy

Compare