ESEKIELI 13

Woshiny lwa Vakisuku va wongo

1Irero lya Nndumi Iruva lyikashisheya lyishaamba: 2“Yewe mwana wa nndu kyeemya vakisuku va Israeli yeva vashaamba mbony ta mirwe yaawo. Vavie vaarannye filya yeny Nndumi Iruva shikeyaamba. 3Yeny Nndumi, Iruva shaamba: Oshiny llwany vakisuku varung'ani yeni mukelatya makusaro any muveni na yefyo mulollye muveni! 4Vakisuku vany, yeni Vaisraeli ni kimwi sha maparwe akeraaraa yefo maremeny. 5Mmbaleenda iringa masimamba alewunduka nta mmbaletana masimamba maiyya naambo Vaisraeli vaidimi ikkya fira yeyo isheshaa nkonu yeto yeny Nndumi Iruva shamma ideesya-fo. 6Ilollya lyawo ni lya wongo weni, na ukisuku lwawo ni lwa ulembi weni. Mmbo vakeelemba sheelyi ni yeny Nndumi Iruva shavaruma, indi yeny nshalevaruma-fo; kya mmwasi mmbo vakevereya shiinutye yefyo vakeyaamba. 7Ulaalu shamuvesa: A ndesa, mbony yeto mukeyaamba na ukisuku lwany nshi-ulembi weni? Yeni mukeeyaamba, ni kwa irina lyakwa mukeyaamba mbony yeti, neeny shilanderera neeni tusu?”

8Naasa yeny Nndumi Iruva shaamba indi: “Kimmba marero any ni a ulembi na fisuku fyany ni fya wongo, yeny ni kilasha kyany. Ni yeny Nndumi Iruva shaamba. 9Mmbo nshoorrwa woko lwakwa uwe yaany yeni vakisuku mukeyaamba wongo na yaawuya fisuku fya ilemba vandu. Kyeeri vandu vakwa vakwaanannya irummbwa shila, yeni mmukooywau-fo. Nta mmuvikwaa yefo urambeny lwa vandu va mmba ya Israeli-fo, nta mmushaanga yefo urukeny lwa Israeli-fo; llyo mumanyaa sha elyi yeny mmbwe Nndumi Iruva. 10Vakisuku yewo vakeereta vandu vakwa veshaamba, ‘Ni urilalyi,’ nta kuleefo urilalyi. Vandu vakwa vakatana isimamba lyilavaa, nawo vakalwaamba yeela! 11Ulaalu vieny vakisuku yewo vakeeyaamba yeela isimamba yelyo sheelyi mmbo ishaa mmbwa niini ya mawe na uraato lwa iruruma na isimamba yelyo lyiwunduke. 12A elyi isimamba lyiwundukyaa, vandu mmbavesaa: ‘A yeela ilya valeamba-fo nkwi lyikai?’”

13Kweekyo yeny Nndumi Iruva shaamba: “Kweenyafukwa lyakwa mmbo nshantaa uraato lwa iruruma na mmbwa niini ya mawe, nafyo fyiwunndwe isimamba yelyo. 14Mmbo shilyiwunduya kwaasha isimamba yelyo mulelyaamba yeela na nsuka wa vayo usee-u mbereto. Isimamba elyo lyikawunduka mmbo lyimusaasa sumbai yavayo. Llyo meendi mumanyaa sheelyi yeny mmbwe Nndumi Iruva. 15Nyashi yakwa shoose mmbo nsheyavyaa uwe ya isimamba yelyo na uwe ya yewo valeamba yeela. Neeni llyo muvywaa: Isimamba lliyo lyingyi-fo nta neewo valelwaamba yeela mmbaiyo-fo. 16Mafurumyony a vakisuku va Israeli yewo valeamba mesha kya Yerusalemu na ilollya urilalyi nta kuleefo urilalyi. Ni yeny Nndumi Iruva shaamba.”

Ukisuku lwa wongo lwa vakisuku va Kyika

17Ulaalu, yewe mwana wa nndu, indukkya vaka va isanga lyafo, yewo vakeeyaawuya ukisuku lwa yefyo vakusarye veni. Rera kya ukisuku lwawo, 18naasa kuvavie sheelyi Nndumi Iruva aamba indi; Oshiny lwany yeni vaka mukeefuma pangilyi ta irisi ta irawa yefo maako a wo nndu, na isongosya shela titiri irisi ta wo ngata ya uravi tirawaa mmbandu. A yelyi mukeeruuya muu wa vandu vakwa, mmbo mukusarye iturunya muu wa vengyi na mbusha? 19Mwanshiila mbee ya vandu vakwa, naambo mukooye iningwa woyi lwa nswa wa nganu na shoonga shidu. Mmbo mukeewaa vandu valakwaani ifwa, mukara-fo valya vakwaani iwaawa, kimaruma kya wongo lwany mukeyoongoya vandu vakwa, nawo vakamwiirikya.

20Ulaalu, yeny Nndumi Iruva shaamba: “Mmbo shimusokaa marisi yoo any mufingye nayo vandu, shiafishefishe ooke yefo maakony any vandu vakwa vave valeke veende sha ndeye. 21Mmbo shiranndwa shela tany shimusoke vandu vakwa maakony any; mulakyikaa muvalollye lyingyi maakony any. Llyo mumanyaa sheelyi yeny mmbwe Nndumi Iruva. 22Kimmba mwammbafisha nrima vandu vasaari kweyaamba wongo, nta kulaore yeny shilemmbafisha nrima, mukarumisha veetana makasha naambo valare itana makasha vakire muu wawo, 23naasa, yeni mmukaa mulollye lyingyi ukisuku lwa ulembi-fo. Mmbo shirurushwaa vandu vakwa maakony any. Llyo mumanyaa sheelyi yeny mmbwe Nndumi Iruva.”

Currently Selected:

ESEKIELI 13: MAS2

Highlight

Copy

Compare