ESEKIELI 12

Nkisuku mwirishiswa

1Irero lya Nndumi Iruva lyikashisheya lyishaambaa: 2“Yewe mwana wa nndu! Yewe mmbo kukee nnang'ani ya mmba sheesi. Vandu valyanga vatiri miso lyo alalollye, vatiri maarwi lyo alaitye. Wo ni vandu valyang'a. 3Naasa yewe mwana wa nndu, tana sheelyi kwiifo kusamaa: kwiipoo nsanyiny veekulollye, kurishye kundo kungyi. Enda sha mwiirishiswa uka kyeny kwafo, kweende kundo kungyi nawo veekulollye. Kulakooye vamanyaa lla neelyi vakee valyanga. 4Tana indo veelollye kindo kuketana; finga irio lyafo, kwaangusye isomuta poo na ikudeesya sha vandu veefo vashipoo kyaaro kyeeri kya nkwaany yeenda usamirony, 5Veekulollye dosha isimamba lya mmba kwiire nang'u kusomuke poo. 6Veekulollye mmbo kushekurika meeveny irio lyafo, kuuke-fo kyeeri kya ireema. Kusikye kisangu kyafo, kulaidimi imanya kundo kukeyeenda nafo. Mmbo shatana indo naambo kuve kiring'isyo kwa mmba ya Israeli.”

7Neeny shatana ndesa Nndumi Iruva aleshivavasya. Nkonu yeto, kyeeri kya nsanyiny, shafinga irio lyakwa, sha irio lya mwiirishiswa. Kwikee nkwany na ivishivishi, shadosha isimamba lya mmba na maako akwa mmuni shasomuka shiirye irio lyakwa meeveny, na vandu woose veeshilollye.

8Elyi lya ndesi ya vayo ngama, Nndumi Iruva kashivesa: 9“Yewe mwana wa nndu! A-ndesa valyang'a yewo va Israeli mmbalekuvesa nkyikyi kukeetana-indi? 10Vavie sheelyi Nndumi Iruva mmbo aamba: Ekyo shatana ni wende lushewoyaa mwishillya Yerusalemu na vandu woose va Israeli, yewo vakee yefo urukeny yelo. 11Vavie sheelyi yewe ni wende kwawo; kilya kuletana nkyo kitanyika yefo kwawo; mmbo varishyaa usamirony; yee mmbo vakamarwa mifungwa.

12“Na nshilyi akee nnang'ani yaawo mmbo ashekurika irio lyakwe meeveny ireeminy asherishaa nadoshe isimamba neere-u, naambo naidimi isomuka poo; eesikye kisangu kyakwe naambo nalaidimi ilollya uruka na miso akwe. 13Nalyo mmbo nshaala waafu luve nreiyo wakwa weentira. Shishenkurika fika Babilony, urukeny lwa Vakaldayo; nawe akee kulya kutani afwa kulaore alollya uruka yelo. 14Yewo woose vakee kyaalu kyakwe, ngyama takwe na matorito akwe moose shivanyanyate taari toose, shiipoo usu shivalatye numa. 15Kyeeri nshevanyanyatyaa nnang'ani a masanga engyi na ngyuruka ta kwaasha llyo vashemanyaa sheelyi yeny mmbwe Nndumi Iruva. 16Lyo shitiiya-fo maata vaturunye fira, vakye iwaawa ni shaa na ndwari shikasha; naambo wo vaidimi ikureeka kwa vandu va masanga yefo vakaa ngata valetana makasha. Llyo vamanyaa sheelyi yeny mmbwe Nndumi Iruva.”

Kiringissyo kya Nkisuku mweerei

17Irero lya Nndumi Iruva lyikaengera ishisheya: 18“Yewe mwana wa nndu! Lya shoonga yafo na ina mura wafo na weerei kwirerema. 19Kuvie vandu va uruka yelu, sheelyi yeny Nndumi Iruva mmbo sharera kya vandu va Yerusalemu vakee kunu urukeny lwa Israeli, mmbo valyaa shoonga yaawo vetafukwa na ina mura wawo vesavaa, mashika uruka lwawo llushesokwa wo kindo lutiri kyeendwa ni utefusu. 20Miri itiri vandu mmbo ikeemamitwa na uruka luve ukyiva. Llyo mumanyaa sheelyi yeny ni Nndumi Iruva.”

Irero lya Nndumi Iruva lyishiinukya

21Irero lya Nndumi Iruva lyikashisheya lyishaamba: 22“Yewe mwana wa nndu! A nkyiki kyaaso yekyi kyikasendwa kunu Israeli: Mikonu mmbo ikeesha na yiira, nkyiki elyi ukisuku lulakeinukya?” 23Vavie sheelyi yeny Nndumi Iruva shaamba sheelyi kyaaso yekyi nkyikaa kisendwa lyingyi urukeny Israeli-fo. Vavie sheelyi kyeeri kyammafukya kya ukisuku loose luinukye. 24Mashika nkukyikaa-fo lyingyi ukisuku lwa wongo ao ikapa upau nnang'ani a vana va Israeli-fo. 25Ni yeny Nndumi Iruva shimuni shishaamba yekyo kyisheshaa. Nakyo mmbo kisheshaa kuleefo ikyeeywa. Kyeeri kya muu wany, yeni vandu valyanga, irero yelyo shishaamba, ni kuti shilyiinutye. Ni yeny Nndumi Iruva shaamba.

26Irero lya Nndumi Iruva lyikashisheya lyingyi lyishambaa: 27“Yewe mwana wa nndu, Vaisraeli mmbo vakusarye sheelyi ilollya ukisuku lwakwa llwa fyeeri fya kwaasha nnu! 28Kweekyo vavie sheelyi nkwiifo irero lyakwa lyimwi lyikyeeywa-fo; ni kuti marero akwa ainukye. Ni yeny Nndumi Iruva shaamba.”

Currently Selected:

ESEKIELI 12: MAS2

Highlight

Copy

Compare