YUUKA 10

Ngapo ya Nyanya, Nrie

1Naasa Nndumi Iruva kavia Mose, “Anga kwa Farao mashika yeny shammumisa nrima wakwe, naambo shoore ngyende takwa kwawo; 2naambo neewe kwiidimi yoongoya mwana wafo na nshuku wafo, kitavanu shiletannya Vamisri, na kya ngyende yeto shiletana vakalollya, naambo mumanyi dede yeny ni Nndumi Iruva.” 3Naasa Mose na Aron vakamelollya Farao vakammbia, “Nndumi Iruva wa Vaebrania mmbo akuvia indi, ‘Ni fika indii kushelemaa ikunyiisa mbee yakwa? Niinga vandu vakwa mumu vandeshirunndya. 4Na kwakooya kweengera ivaima mumu wa yeenda, lola, ndesi mmbo nshendee nrie urukeny kwafo, 5tisikkye sumbai shoose, nndu alemwa ilollya uteeri, nato mmbo tishelyaa findo filya filekyia fikasaa-fo llya mmbwa ilya ya mawe ilekapa, nrie yeto mmbo tishelyaa wo nri umyaa efo maremeny. 6Na mmba yafo, na mmba ta varundi vafo na ta Vamisri woose mmbo tisheishwaa nrie ngata ya vayo nta vande vafo na vasaawoo mbalelollye-fo, uka elyo vepooka ikaa ulaniny na fika inu. Veekimaa vakainduka vakasomuka.’” 7Naasa vandu va Farao vakammbia, “Nndu yeu mmbo asheva nnreyo weru fika indii? Niinga vandu yewo mumu veende immbikkya mwiinndye Nndumi Iruva, Iruva waawo, ao nkwalemanya fika ulaalu, sheelyi Misri yammaa ilyamarika?” 8Mose na Aron vakeendwa lyingi kwa Farao nawe kavavia, “Endeny mukanderunndya Nndumi Iruva, Iruva waany; kyeendi yewo vashendaa mmbo va-kyi?” 9Mose kammbia, Mmbo lushendaa na vasoro veru na vamiku veru na vana veru na vefu veru, lwipoo na moonri eru na ng'umbe teru, naambo lukooye ivikkya Nndumi Iruva nndumwa. 10Nawe kavavia, “A paa kitimu, nshishemuniinga mumu mweende ando amwi na vana vany na vaka vany-fo, mashika efo mbee yaany nshi kusha-fo.” 11Ekyo oode, endeny yeni vandu vaniini veni, munderunndya Nndumi Iruva; mashika nkyo mukunndye. Nawo vakaumbutwa yoo mbee ya Farao.

12Nndumi Iruva kavia Mose, “Orrwa woko lwafo uwe ya uruka lwa Misri kweende nrie urukeny tilye mare moose, filya filesaaro-fo ni mmbwa ilya ya masaawe.” 13Mose kaorrwa mbiiri yakwe uwe ya Misri, na Nndumi Iruva keende uraato luuka taari ya ngama, nkonu piti, na kio tara-raa, kyeeri kulekya uraaato lulya lukeende nrie. 14Nrie yeto tikakwaana Misri koose, nta nkulenkaa-fo nrie sheeto ukya elyo-fo nta numa ya vayo nkushekaafo tingyi tifye-indo-fo. 15Mashika mmbo tilesikkya sumbai shoose, na ireema lyikawoya uruka, nrie yeto tikalya wo kindo kimyaa na ndunda toose tilerewa-fo ni mmbwa ilya ya mawe nkulerewa-fo nta imburu lyimwi-fo, nri nta imburu lya remeny-fo, urukeny lwa Misri loose. 16Llyo Farao kaangusya ivaanga Mose na Aron kaamba, “Shiletannya Nndumi Iruva waany ulyamari neeni-da. 17Naasa ulaalu, shamutereva, shisaryeny ulyamari lwakwa ikamba yelyi yeni tupu, mutereve Nndumi Iruva waany, nashuute ngapo yei ya ufu.” 18Mose kooka kwa Farao, katereva Nndumi Iruva. 19Naasa Nndumi Iruva keende uraato lwa taari ya nkwaany, lutiri finya, lukavivita nrie tilya tikandesiiya yeeveny ya Shamu na nkulesaa-fo nta nrie imwi urukeny lwa Misri-fo. 20Kyeendi Nndumi Iruva kaumisa nrima wa Farao, nawe nalaniinge vana va Israeli mumu veende.

Ireema

21Nndumi Iruva kavia Mose, “Oroya woko lwafo iruveeu lyishe ireema Misri koose, naambo vandu veende ireeminy.” 22Naasa Mose kaoroya woko lwakwe iruveeu, naasa kukava-fo ireema iroo urukeny koose ando a mikonu iraru; 23nkwii-fo nndu aleidima ilollya ungyi-fo, nta nkwii-fo nndu aleuka alya ekai-fo, ando a mikonu iraru sele; kyeendi wo Vana va Israeli vaka-kaa seny yoo ando vekai. 24Farao kavaanga Mose kammbia, “Naasa ulaalu endeny mukanderunndya Nndumi Iruva moonri any na ng'umbe tany to tirewa-u, indi vana vany, wo veende neeni.” 25Mose kaamba, “Ni kuti lweende lurye na findo fyeru fyeenderasya Iruva, naambo lundeshishya Nndumi Iruva, Iruva weeru firaso fyekora na muro. 26Maronda eru moose mmbo ashendaa neese, nta mbungashu sheni nnyisaa numa-fo, mashika mfo lushesauwaa findo fyeerunndya Nndumi Iruva kutani elyi lushefikaa.” 27Kyeendi Nndumi Iruva kaumisa nrima wa Farao, alakunde ivaniinga muumu veende. 28Farao kavia Mose, “Kweete-deny, uka yaa shikai, shilakulollye lyingyi-fo, nkonu yeto nshekulollyaa lyingyi, mmbo kufwaa.” 29Mose kaamba, “Kwanrera nisha”, neeny, “Nkukyilollya lyingyi kisangu kyakwa-fo.”

Currently Selected:

YUUKA 10: MAS2

Highlight

Copy