YouVersion Logo
Search Icon

YUUKA 9

9
Ngapo ya Karaanu, Findo fya Ivikya Fyafwa
1Llyo Nndumi Iruva kavia Mose, “Yewe enda kwa Farao, kummbie, Nndumi Iruva, Iruva wa Vaebrania, aamba indi, ‘Niinga vandu vakwa mumu naambo vandeshivikkya mwiinndye. 2Mashika kwalema ivaniinga mumu veende, 3llyo woko lwa Nndumi Iruva lushekapaa findo fyafo fyeevikkya, na frasi na mishungu na ngamula, na ng'umbe, na moonri, mmbo kusheshaa-u ukiva uniini nnu.’ 4Llyo Nndumi Iruva karauwa findo fya mmba fya Vaisraeli na fya Vamisri, nkishefwaa nta kindo kimwi kya vana va Israeli-fo.” 5Nawe Nndumi Iruva kadeesya nkonu kaamba, “Ndesi Nndumi Iruva mmbo asheinutya mbony yei urukeny. 6Elyi lya ndesi Nndumi Iruva kainutya ekyo eambaye, na findo fyevikkya fya Vamisri fyoose fikafwa; kyeendi findo fya vana va Israeli filafwe nta kimwi.” 7Farao karuma vandu vandelola, ate nkwiifo nta kimwi kya vana va Israeli kilefwa-fo. Kyeendi nrima wa Farao ukava mumu nalaniinge vandu yewo mumu wa yeenda.
Moore
8Nndumi Iruva kavia Mose na Aron, “Ipoony ng'unde imwi ya ifu lya rukony, na Mose nafwallwe na uwe Farao eelollye, 9Nang'u mmbo ashevaa kiluulyi kisiise efo sumbai Misri koose, nang'u mmbo ashefummbyaa vandu moore na mafisi moose.” 10Naasa vakaipoo ifu lya rukony vakasalala mbee ya Farao. Na Mose kaaera neefo uwe nang'u akaaluka moore oomborye kwa vandu na mafisi. 11Na vaanga valya mbaleedima isalala mbee ya Mose kimaruma kya moore alya, mashika vaanga yewo na Vamisri woose mmbo valetirwa mmoore. 12Nndumi Iruva kaallwa nrima wa Farao muumu-da, nalakunde ivaarannya; ndesa Nndumi emmamba sheelyi magyi nnyashekunda yaarannya Mose na Aron-fo.
Mmbwa ya Masaawe
13Nndumi Iruva kavia Mose, “Kwipoo ngama shuru kundesalala mbee ya Farao, kummbie, ‘Nndumi Iruva, Iruva wa Vaebrania aamba indi, Niinga vandu vakwa mumu vaende vandeshivikkya mwiinndye. 14Mashika ulaalu llyo nsheengyee nrima wafo ngapo takwa toose, sheengye na varundi vafo woose, na vandu vafo woose, llyo yewe kushemanyaa nkwiifo nta umwi ulaniny koose ashivakkye-fo. 15Mashika mmbo sheekoyaa ulaalu shammorrwa woko lwakwa shikukape yewe na vandu vafo, shikukape na isuku, neewe mmbo kweshaangatwaa deny kuuke yaa ulaniny. 16Kyeendi lyo shamura-u mukee-u na muu kimaruma ekyi kyeni, naambo shikoore widimi lwakwa, na lyingyi naambo irina lyakwa lyiidukaniswa ulaniny koose. 17A yewe fika ulaalu mmbo kukee ikufumbisa tupu, kulakunde ilekeya vandu vakwa veende? 18Neewe lolaany, ndesi mmbo nshendee mmbwa ya masaawe niini nnu, na efo Misri nkulellywa-fo mfwanu wa vayo uka elyo fika inu-fo. 19Kweekyo ulaalu vavasya findo fyafo fyoose fikapywa mmba neefyo fikee maremeny, mashika wo nndu na woo ifisi ashekooywaa nreminy kulaore fyammaanga mmba mmbwa yeyo ya masaawe mmbo ishevawaa.’” 20Vandu va Farao yewo valeita irero lya Nndumi Iruva mmbo valerishisa varundi na findo fyawo vakafyaata mmba, 21neeto alemina irina lya Nndumi Iruva kara varundi vakwe na findo fyakwe poo.
22Nndumi Iruva kavia Mose, “Orrwa woko lwafo na iruveu naambo ikape mmbwa ya masaawe Misri koose, isheye vandu na mafisi moose na nyany ta efo Misri koose.” 23Mose kaoroya woko lwakwe iruveeu, na Nndumi Iruva karika iruruma na mmbwa ya masaawe, na ukova lukakora-si; Nndumi Iruva keende mmbwa ya masaawe Misri koose. 24Ikasha mmbwa ya masaawe iryani na ngova, mmbwa shiroo deny, kulaore ilellollywa Misri uka elyo vandu vekaa-fo.
25Na mmbwa ilya ya masaawe ikakapa findo fyoose fyeekee poo mareminy, vandu na mafisi, Misri koose, mmbwa yeyo ikakapa fika na nyany ta mareminy, na wo nri ukafishwa-fishwa, 26kuuta Gosheni kweni, efo Vana va Israeli veekai fo nkwesha-fo mmbwa ya masaawe-fo. 27Farao karuma vandu vandevaanga Mose na Aron, neevavia, “Ni yeny shilyamarye, na Nndumi Iruva kava mmbwe wa usumanu, neeny na vandu vakwa lukava vakasha. 28Tereveny Nndumi Iruva mashika maruruma yoo maniini affye ulaalu na mmbwa yeyo ya masaawe neeny nshemuningaa mumu mweende, mulakyikaa yaa mmwasi-fo.” 29Mose kammbia, “Elyi nshukaa kunu muriny mmbo nsheipoiyoo Nndumi Iruva maako akwa na maruruma yoo ashemandaa, na nta mmbwa yeyo ya masaawe nyikishaa-fo, naambo kumanyi dede ulana elu llwa Nndumi Iruva. 30Kyeendi shiishi deny yewe na varundi vafo mmweereiye Nndumi Iruva-fo.” 31Kitani na Shayiri mmbo filelyamarwa, mashika nganu mmbo yeetiri fyaa fya vayo na kitani nayo ikavaa, 32kyeendi kwiifo nganu kulore ilakapwa mashika llya yekee shidu. 33Mose kauka muriny kwa Farao, kaipoiyo Nndumi Iruva maako akwe, maruruma alya na mmbwa ilya ya masaawe ikamanda. 34Kyeeri Farao alelollya mmbwa na mmbwa ya mawe na maruruma alya ammanda, keengera ullyamari, kaumisa nrima wakwe, na varundi vakwe. 35Nrima wa Farao ukava muumu, nta nalaniinge vana va Israel mumu veende; shaasa Nndumi Iruva alerera na kana kya Mose.

Currently Selected:

YUUKA 9: MAS2

Highlight

Share

Copy

None

Want to have your highlights saved across all your devices? Sign up or sign in