MWIILOSHA 4

1Naasa shalollya ngata vandu vakeelamywa, neelyiswa ukyiva kuleefo nndu akeesara kyawo nta ivafweerisa. Vandu vakaiya misoru lyo kuleefo nndu akevaniinga ngarami mashika yewo vakeevalamya ni vandu vatiri finya. 2Naasa shasoongya efo nriminy kya yewo valemma ifwa nayeenda yefo kulawuywaa. Shakooya ni kyeni ngota valya veefo na muu. 3Lyo, nkyeni mmwasi ya valya veefo na muu na valya vafiiye, eto kulaore alemmbonika na ilollya ukyiva elo vandu vakeelyiswa yaa ulaniny.

4Kilanya ya fyoose shakooya mirunndye na ifurukana lya nndu efo mashoreny akwe ni kififi kya nriminy. Lyo efyo fyoose ni maariso kyimwi sha nndu akeerishisa uraato.

5Nndu nrung'ani nnyarundaa mashora-fo,

Mafurumyony a vayo mmbo awaawaa nshaa.

6Ni kyeni evaa na shoonga shaangu asande na urilalyi efo nriminy,

Ngota yuumbya fiingyi asande na ukyiva;

ni kyimwi sha nndu akeerishisa uraato.

7Mmbo shilelollya kindo kyimwi kya tangalu deny ulaniny. 8Mmbo shelollya nndu umwi alatiri mwana nta mwanamaye, lyo mmbo akerunda kio na nsanyiny kuleefo kyiimuyo eeshuumbya filashiishwa alaidimi nta ikuvesa: “A mashora yaa moose mmbovi yeto shikeendunndya? Shilatiri nta mwaanya wefura?” Efyo fyoose ni maariso na mashora eshilyisa ukiva.

9Ni kyeni iva vandu vavii ngota iva nndu umwi mashika vandu vavii vashiiluula weesi lwa mashora awo. 10Keenda kawa-si umwi waawo yeto urooye ashensaleesa. Lyo, Woshiny llwa yeto akee we muni alatiri urooye. Eto kyeeri ashewaa nnyalollya mwinsaleesa-fo! 11Niindo-da kyikai, “Vandu vavii vakalala kyimwi vawonaa nrike. A mmbo kyishiidimikaa kyikwi nndu akee muni neete nrike? 12Nndu ekee umwi ni kyaangu nkiduva illamya. Lyo vekee vavii, ni kyaangu deny ikoosa na nkiduva eto neemmbinga. Mikova iraru ikoososwa kyimwi nshi kindo kyaangu irumbuke-fo.

13Ni kyeni mwana nkoo, nturi atiri urango, ngota mangyi nrung'ani alakunndye ikulosha; 14naakwa akee mfungwa, lyo ulaalu mmbo akee mangyi, ao awonikye mmba shikyiva-deny, indi ulaalu mmbo akee mangyi. 15Shalollya vandu woose vakee ya ulaniny, sanda na mwana ulya nkoo eshiidimaa iva mangyi. 16Vandu veiyo mmbetiri yeekyena-fo nawe kashilya woose. Lyo naakwa nnyendo, valya vashewonikaa numa mmbafuraa kyakwe-fo. Ni kya dede-deny, efyo fyoose, ni maariso, kyimwi sha nndu arishisaa uraato.”

Currently Selected:

MWIILOSHA 4: MAS2

Highlight

Copy

Compare