MWIILOSHA 3

Kyeeri kya wo kindo

1Wo kindo mmbo kitanyikaa kwa kyeeri kya vayo yaa ulaniny.

2Kyeri kyeewonika na kyeeri kyeefwa

Kyeeri kyeevaaya na kyeeri kyeilula.

3Kyeeri kyeewa, na kyeeri kyeekira

Kyeeri kyeewunndwa mmba, na kyeeri kyeetana mmba.

4Kyeeri kyefiira, na kyeeri kyeeseka

Kyeeri kyeiya, na kyeeri kyefina

5Kyeeri kya yeera mawe, na kyeeri kyeyuumbya mawe.

Kyeeri kyeekulumba, na kyeeri kyeera kulakulumba.

6Kyeeri kyeeruuya, na kyeeri kyeereta

Kyeeri kyesuruma, na kyeeri kyeeyera

7Kyeeri kyeeranndwa, na kyeeri kyeefuma

Kyeeri kyemamya-sau, na kyeeri kyeerera.

8Kyeeri kyeekunda, na kyeeri kyeeisuvana

Kyeeri kya fira, na kyeeri kya urilalyi.

9Ni mbusha-ki, awonisaa yeto mwiitana efyo fyoose? 10Yeny mmbo shilollye maariso Iruva aniingye mwana wa nndu. 11Iruva mmbo atannyi wo kindo kisha kwa kyeeri kya-vayo, kaniinga mwana wa nndu makusaro a-ikunda imanya findo fisheshaa fitanyike elyi numa, lyo kamwiima makusaro a-imanya mashora Iruva atannyi ukya mapookyony fika mafurumyony. 12Shalollya nkwiifo kindo kya mmwasi mwana wa nndu ashiidimaa itana-fo kuuta ifura na itana wo kindo kisha kyeeri kyoose kya muu wakwe. 13Kweekyo lulye neena lwiifurye, kya mashora a nrike weru mashika eto ni simbo tuuka kwa Iruva. 14Mmbo shiishi shamanya wo kindo Iruva atannyi mmbo kyikaa indo llung'anu kuleefo kindo kishiidimika yeengerywa-u ao yuutwa-u. Niindo Iruva atannyi naambo vandu vakooye imwiindya na imweereya. 15Ekyo kyikeetannyika inu kilemma-itannyika, neekyo kyitannyika numa, kilemma-itanyika. Mashika Iruva mmbo atana kindo kilya kyeni kitanyike lyingyi na lyingyi.

Usumanu lwawiika ulaniny

16Kilanya ya fyoose shakooya yaa ulaniny ando kwa udede na usumanu kya indi ni ulyamari lukwaani wo-ando. 17Efo nriminy wakwa shaamba, “Iruva mmbwe mwileta mwaandu kwa vandu vasumanu, na ewo valasumani; kwa kyeeri kisumani na mashora a-vayo.” 18Efo nriminy wakwa shaamba, “Kya vana va vandu Iruva mmbo akeeveesa tupu mashika mmbatiri kilasha na mafisi a ngoroshony-fo. 19Mafurumyony a nndu wa vandu na mafurumyony a ifisi ni kyimwi tupu, mashika ngata nndu akeefwa, niindo, neefisi lya ngoroshony lyikeefwa. Naakwa nnyomwa uraato naakwa ni ifisi lya ngoroshony ni-ki-wo, mwana wa nndu na ifisi lya ngoroshony ni-kyimwi tupu nkwiifo kilasha-fo. Fyoose ni maariso. 20Woose mmbo vafwaa, na woose mmbo vasheenda ando kumwi. Woose ni uteeriny vaukye, na woose mmbo vawuyaa uteeriny. 21Mmbovi eeshiny sheelyi nrima wa nndu ushesaama iruvee-u, na wa ifisi usherekya na sumbai uteeriny? 22Llyo shemanya ate, nkwiifo, mbusha kwa mwana wa nndu kilanya yeefura kimaruma kya mashora a-maako akwe-fo; mashika niindo Iruva ammbikye uramba. Mmbi eto ashiidimaa ivia mwana wa nndu ekyo kishekaa kishe kyeeri ammefwa?”

Currently Selected:

MWIILOSHA 3: MAS2

Highlight

Copy

Compare