MWIILOSHA 5

Kwiise kwiivikaa kyaasa

1Lola nnu kwishaanga mmba ya Iruva, Yaanga-fo neekulosha ni kisha mmwasi ngota indeniingya firaso sha efyo finiingywa mmbandu varung'ani, yewo valeeshi kilasha ya mesha na makasha. 2Kusare mbele kulaore kwammamba kindo, nta kulave mwaangu weyaamba kindo mbee ya usangu lwa Iruva, mashika Iruva ni iruveeu akai na yewe ni kunu ulaniny kukai kweekyo fiisa mbony. 3Ndesa kusavaa mmwasi niindo kushekooya yoorya, na kana ka nrung'ani ni marero meengyi. 4Kwakooya kwavika kyaasa kwa Iruva lola kulashekyeeywa yiinutya kyaasa ekyo. 5Kyeeva kyeni kulavike kyaasa ngota ivika kyaasa kulashiinutyaa. 6Ringa kana kafo kalashekwaata ulyamariny naasa kupookeny ivia varundi va Iruva sheelyi nshekunndye yaanga ulyamariny-fo. A kyimaruma nkyoki kutani Iruva arooywa nnyashi na mashora a maako afo alyamarike. 7Moorya akammba meengyi na marero meengyi kwiifo urumato. Lyo ni kisha yiindya Iruva.

Muu nkyokyi

8Kulasheyaawukwa kwakooya kwalollya umangyi lwiiwonnya vaturi neelamya yewo vakee vafwafwa yewo valatiri kindo, mmbo vakesokwa ni yewo vakee uwe yaawo, nawo mmbo vakesalallywa ni yewo vakee uwe yaawo na va uwe mmwasi. 9Naakwa ni indo-da mangyi atiri mbusha ni ulya uruka lwakwe lutiri shoonga. 10Nndu mwilanga fesa nnyakaa naambe yee ulaalu fesa tishifye-fo. Naakwa ni eto mwiiruya masaa meengyi ni kiwo-da. Efi fyoose ni maariso. 11Masaa akeengereka, na veelya ni indo vasheengerekaa. Neeto muni masaa kyeetana nkyokyi nnyilola na miso-nsi. 12Ishinga lyikalya na lyilalye mmbo lyirekkya rony-si. Indi muni masaa nnyalalaa-fo kimaruma kya masaa akwe meengyi atiri. 13Mmbo shilelollya kindo kyimwi kikasha kwasi ya ngina: nndu kaumbya fesa takwe shiingyi ando kyeevaa mbusha kwakwe tikamweengye ukyiva. 14Ando a kyeeri kyaangu fesa takwe shoose tikasiiya kundo kwa tangalu, nawe ni nndu atiri vana lyo kasaa ruu alatiri kindo wokony. 15Ngata alesha kunu ulaniny mbereto, uka nsangeny wa maaye, niindo ashekooya iwuya mbereto efo kundo ookye. Nnyashiidimaa ikurika nta kindo kyimwi kive ni nrike wa mashora akwe-fo. 16Ekyi nakyo ni maariso mmbo awuya ngata ilya sheni alesha nayo! Mbusha nnyo-ki? Mmbo alekwaarisa eerishisaa uraato. 17Muu wakwe moose ukasiiya efo ireeminy eesokywa mfyoova eshaatarika ni ndwari na usuwanu. 18Naasa efi mfyo findo shilekooya imanya, kindo kisha kisennyi kwa nndu wa vandu ni ilya na ina naifura kya ndunda ta nrike wa mashora akwe yaa alekooya irunda kwa mikonu yei myaangu Iruva alenniinga yaa ulaniny, mashika niindo Iruva alevikya nndu uramba. 19Kwakooya Iruva asimba nndu umasi kava na masaa meengyi, kanniinga na mwaanya weefura nafyo, nndu yeto ni kuti naarafumi Iruva eefuraa kya findo efyo fyakwe alefirunndya kwa nrike wakwe. Mashika, eyo ni mbora yuuka kwa Iruva. 20Kimmba Iruva ammuniinga muumu weeva na ifura nkwiifo kimaruma kyeeva na usau lwa muu yeu mfii-fo.

Currently Selected:

MWIILOSHA 5: MAS2

Highlight

Copy

Compare