NKUMBUYE WA UVAVASO 10

Mose Awarya Lyingyi Mavavasyo

(Yuu 34:1-10)

1Naasa llyo Nndumi Iruva aleshivia, Songosia mapoo avii a mawe sha alya a mbee, kushisore kunu ifumbuu, kuvesongosya na isanduku lya mbau. 2Neeny mmbo nsheareiya sha mapoo alya a mbee kuleafishafisha. Kwammaa mapoo yoo kwuavike efo isandukuny yelyo. 3Naasa shasongosia isanduku elyo na mapoo yoo avii sha alya a mbee, shasaamany na kulya ifumbuny shiiarye na woko. 4Nawe Nndumi Iruva kaareiya shaasa alereiya alya a mbee, mavavaso alya ikumi alenniingya alya ifumbuu eereraa kyuuka kulya murony, nawe kashiniingya. 5Naasa shainduka shooloka shivikye mapoo yoo isandukuny lyilya lya vayo shaasa Nndumi Iruva aleshivavasya. 6(Llyo vana va Israeli valeipoo kyaaro vauka alya nguusokeny ta Bene-yaakani veende Mosera; na Aron kafiiya-fo, karikwafo; na mwana wakwe Elieseri kawarya urundi lwa ukohani ando akwe. 7Veekyuuka-u vakafika Gudgoda, vakafika-se Yotbata nalo ni uruka lutiri ngyusoka shiingyi. 8Naasa Nndumi Iruva llyo kasauwa ufyari lwa Levi vave mmbo vakamaraa isanduku llya lya mavavaso, varunndye Nndumi Iruva, nnevikya vandu mbora na irina lyakwe. Na llyo ishora lyawo. 9Nkyo kimaruma Valevi valatire ding'u sha yewo vengyi, irunndya Nndumi Iruva nnyo ding'u yaawo, shaasa Nndumi Iruva, Iruva waany aleamba.) 10Naasa shakaa kulya ifumbuu sha llya lya mbee, mikonu makumi aana kio na nsanyiny, nawe Nndumi Iruva kashaarannya lyingyi, nalakunde imurumata. 11Nndumi Iruva kashivia, “Kwipoo ulaalu kundesongoya vandu yeva vandetira uruka llwa shilevikya vande vawo kyaasa sheelyi nshevaniingaa.”

Kindo Iruva Akundye

12A ulaalule Israeli nkyokyi kingyi Nndumi Iruva, Iruva wafo aruuyaa kwafo kuuta ni ikunda kumwiinndye, neesora shia takwe, neenkunda, neendunndya na nrima wafo moose na ngoo yafo shoose; 13Kuwarani na mavavaso akwe kukeevavasyo inu, kuwone iviiri? 14Lolate iruveeu mmasaa a Nndumi Iruva, Iruva wafo, neefo uwe koose na ulana na fyoose fya vayo. 15Na lyingyi Nndumi Iruva mmbo alesennywa ni vande vafo, kavakunda, kutani asauwa vana vawo yee, mmbo yeni mukeetorya ngota vandu va masanga engyi moose fika inu. 16Kyasiany alashikeny deny efo miriminy yaany, mure ulyang'a elu lwany. 17Mashika Nndumi Iruva, Iruva waany mmbwe Iruva wa maruva moose, na Nndumi Iruva wa vandumi woose, ni Iruva wa dede aeresye, nalalolaa fisangu fya vandu, nta nalawaryaa kindo kya nnga. 18Mmbo ava mwiitannya nka wa ding'u na mwana wa ngwera kya usumanu, kavekunda na nndu muny kaniinga kyeelya na kyeeraa. 19Naasany, kundeny vandu veny, kimmba neeni mwekee veny kulya Misri. 20Indya Nndumi Iruva wafo, kundunndye, kukusirye nawe neesenda irina lyakwe. 21We mmbwe itumbe lyafo, kaveva Iruva wafo kakutannya mesha yaa moose mmbo aeresye, kakutannya efi fyoose shaasa kulollye.

22Vande vany mmbo valesoka vauka Misri vekee vandu makumi mfungare; ulaalu Nndumi Iruva waany mmbo ammufumbuta sha nyinyiri ta ngininy shaasa tifye.

Currently Selected:

NKUMBUYE WA UVAVASO 10: MAS2

Highlight

Compare

Copy