NKUMBUYE WA UVAVASO 32
32
1Yeni va efo iruveeu shaarannyiny shiireraa. Neeni va kunu ulaniny aranyiny marero akwa. 2Marero akwa aoloke sha mmbwa, Nang'u ashoshoke sha laura sha uraranya efo mareny sha marony a mmbwa efo moorony
3Mashika mmbo nshevambisaa Irina lya Nndumi Iruva;
Shaambe uniini kwa Iruva weeru!
4Nndumi Iruva ni mbanga, mashora akwe ni mesha nnu,
Shia takwe toose ni ta usumanu
Ni Iruva nsaari nalatiri ulembi,
We ni usumanu na woorotu.
5Mmbo valetana findo fya utefusu
Mmbavaa vandu-fo, llo uravi lwawo
Wo irika yeesi, lyeevekye deny
6A ekyo nkyo mutaa nakyo Nndumi Iruva
Yeni varung'ani na matondo?
A ndesa yeto nshi nde wafo alekuura
Mmbwe alekuumba neekuvangisa
7Nkyekummbwa
Kusare kya marika yoo na myaaka
Nkyevesa ndoo, nawe ashekuviaa
Vesa vamiku vafo nawo vakurouwaa,
8Yeto akee uwe ya fyoose llya aleniinga vandu ding'u
Kaava vandu va masanga
Kavavikya minyanu yaawo,
Shaasa ngyufyari ta vana va Israeli tikai
9Mashika vandu mmbo waavi lwa Nndumi Iruva
Yakobo mmbo alesauwa va ufyari lwakwe.
10Mmbo alenkooya urukeny wuumu
Neefo kasa koomu keerese
Mmbo alellyingillya kammbavara
Kanringa sheelyi aringaa iriso
11Kavaka ngoru iloshaa fitoro fya-vayo irumbuka, kafiipoo na usaari yefo maruny a vayo, ni indo Nndumi aringa vana va Israeli valawe.
12Ni Nndumi Iruva muni alentetera
Nta nkweiyo iruva lyingi ando amwi nawe-fo.
13Mmbo alensaamisa ando a uwe
Nawe kalya fimu fya mareminy
Kavaniinga ukyi wa mbangeny
Na mafura aleuka efo iweny yuumu
14Mafura a ivee na malela a moonri
Ando amwi na mafura a suva
Na ndafu ta Bashani na mburu
Na uredi lwa ngano isennyi
Kwana mfinyo nsha uvakye usao.
15Lyo vandu va Nndumi Iruva veekyiinina vakammina
Llya valesennya neewuura nisha
Vakaraany Iruva yeto alevavika-u
Vakamina mbanga ya ukiro Lwawo.
16Vakamweengye unyafi kyeenndwa mmaruva engyi
Uravi lwawo lukamweengye unyafi
17Firaso fyawo vakaniingya uraato, valafiniingye Iruva,
Kwa maruva engyi ilesha mikonu yei-da
Nta vande vany mmbeeyeereiye-fo
18Mmukikumbuye Nndumi Iruva mbanga alemukira-fo
Mmbo kulerekyo Iruva mwiikwiira.
19Elyi Nndumi Iruva alelola kasukyo niwo
Mashika elyi vana vakwe valemweenngye unyafi
20Lyo aleamba, Mmbo shivasurumaa kisangu kyakwa
Shilole efo vashefurummyaa nafo,
Mashika elyi ni irika yeesi
Ni vana valatiri yiirikyo
21Mmbo valesheenngye unyafi na maruva a wongo
shatirwa nkififi kya maruva yoo
Neeny mmbo nsheveenngyee kififi na findo filakee vandu
Vaonise unyafi veengyo ni vandu matondo
22Mashika unyafi lwakwa lwammaata muro
Nato ukeaka fika kwa vafu
Ulye ulana na fimu fya vayo
Ukore mafumbu fika efo si uvasheny lwa vayo
23Mmbo nshevafumbutyaa fivavisaa
Shivaase na mife yakwa myoose
24Vaniiye kyeendwa nshaa, muro uvaakye
valyamarwa deny
shivevarikya mafisi manyaasi avalye
Ando amwi na makuru makasha avamaare
25Efo poo mfira
neefo mmba kweerese
filyamare vana va kyuumi na va kyika
Fivana fidu na vandu vakuu
26Neeny mmbo shileamba mmbo nshevanyanyatyaa kwaasha
shivaute deny yaa ulaniny
27Lyo nshilekunda ireeya vakiduva vakusare fya wongo-fo
Valasheekusara mmbo valetana indo
vaambe vai nshi Nndumi Iruva alevakapa
28Mashika yeva ni vandu valavaa irerya
Nta mmbatiri urango usha-fo
29Kyeevaa kyeni kwe veetiri urango, vamanyi mmbony yeti,
Na kundo vashefurummyaa ifika.
30Niinda nndu ashindimaa yuumbuta vandu kyiku
Na vandu vavii vaumbute fiku ikumi
Nndumi Iruva waawo mmbo alemmbaka
we Nndumi Iruva mmbo alemmbaraa?
31Mashika iruva waawo nshi sha Nndumi Iruva weeru-fo,
Naakwa ni vakiduva veru veeshi ekyo,
32Na misabibu yaawo mmbo ivakye Sodoma na Gomora
Ndunda ta vayo mmbo tivavaa
33Na mfinyo wa vayo mmbo uvakye uroo ukasha lwa shoka
34A yefi nshi shilesurummyo yeny shilollye shapu?
35Kiduva nkyakwa yeny, ni yeny shitaa
Kyeeri yeny nsherendeyaa
Mashika kiiyo kyawo kikee kufii,
Neefyo fikaa fivawoye firye shia uviny
36Mashika Nndumi Iruva asheetaa vandu vakwe
Nalyillye mashinga akwe
Kyeeri ekyo alollya finya tawo tammeeleleka
Neelyi valollyaa nkwasaau nndu nalakeemfinge
37Llyo we naambe, A maruva awo akee kwi?
Mwiikira ulya veemmbikye nsia?
38Ulya alewarya firaso fyawo fya mafura na mfinyo kana?
Nakwiipony namweekye, vave llo umangyi lwany.
39Manyiny-te ulaalu, yeny mmbwe, yee, yeny
Nta kulaifo Iruva kuuta yeny;
Yeny shitiri finya yeewaa na yeeruta
Mmbo shavika fyaasha, shooka-fo shashiisa.
Nta nkwiifo edima itafura kindo wokony lwakwa-fo.
40Mmbo shaipoo woko lwakwa shikee iruveeu
Shaamba, Dede yeny ni wa Llung'anu.
41Kyeeri shannwa usu lwakwa lwa muro
Shalutira na woko mmbo shataiya vakiduva yewo vashisuuye
42Na mife yakwa iwuure samu, na usu lwakwa lulye nyama.
Ando amwi na samu ya yewo valewaawa fireny neekamarwa mifungwa
veeriwa ni vakiduva.
43Fureny yeni vandu va masanga,
Mashika mmbo ashetaiyaa kiduva kya samu ya mashinga akwe
Eetaiyaa vakiduva
Vave kiraso kya uruka na vandu vakwe.
44Mose kasha neerera marero yoo moose a kyiimbo ekyi vandu woose vakeeta, na Yosua mwana wa Nuni.
Wiikimbi lwa Mose lwa Ifurumya
45Kyeeri Mose alemarisya irera marero yaa moose kwa Israeli, 46kavavia, Vikeny marero yaa nkemuvia efo miriminy yaany muvavasye vana vany vaaringe moose. 47Mashika uvavaso elu nshikindo kyeelema-fo, nkyo kishemweengeryaa myaaka efo urukeny yelo mukeenda kwakulya ya Yordan.
48Naasa Nndumi Iruva karera na Mose nkonu yeto mweni kammbia, 49Osho saama ifumbuny yelyi lya Abarimu alya urorony lwa Nebo, yoo urukeny lwa Moabu kufii na Yeriko kulole uruka lwa Kanaani nkeniinga vana va Israeli luve lwawo, 50yewe kufiiye efo ifumbuu, kusange na vakuu vafo vafiiye, na shaasa Aron alefiyya kulya Hori, nawe kavesanga na vandu vakwe, 51Mmashika elyi muleshilyamarya na vana va Israeli alya mureny wa Meriba kulya Kadeshi urukeny kasa-ka Sini, ni elyi kulore muleshiinndya mbee ya Israeli. 52Mmbo kukabaa miso urukeny yelo nsheningaa vana va Israeli lyo yewe nkushaangaa urukeny yelo-fo.
Currently Selected:
NKUMBUYE WA UVAVASO 32: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
