NKUMBUYE WA UVAVASO 31
31
Yosua Akaya Kitima kya Mose
(Mee 27:12-23)
1Naasa Mose kandevia vana va Israeli marero yoo moose. 2Kavavia, “Inu mmbo shitiri myaaka iyana na makumi avii nshikitiri ngeta isomuka na yaanga-fo, nawe Nndumi Iruva, mmbo aleshivia, ‘Yewe nkukillyaa Yordan-fo.’ 3Nndumi Iruva wafo mmbwe asheruuka nakwiirye mbee neevinga vandu yewa vakee mbee yafo, kuvashillye. Yosua mmbwe yeto ashiraa mbee yany, shaasa Nndumi Iruva, alevika kyaasa. 4Nawe Nndumi Iruva mmbo ashevatannyaa shaasa aletannya Sihoni na Ogu wo vamangyi valya va Vaamori na uruka lwawo, kavamamita. 5Nawe Nndumi Iruva, mmbo ashevavikaa maakony any mushevatannya shaasa alemuvia. 6Kaaryeny, mulairyae-fo, nta kinnyo-fo, mashika Nndumi Iruva, Iruva wafo mmbo asheendaa neewe, nalakwaanguyaa nta ikura.”
7Mose kavaanga Yosua kammbia yoo mbee ya Israeli woose, Tira nrima nkaari mashika ni yewe kusheendaa na vandu yeva fika uruka yelo Nndumi Iruva alevikya vande wao kyaasa sheelyi ashevaniingaa, nkyo yewe kushevaata-fo. 8Lyo ni Nndumi Iruva ashekusongoyaa, nakae neewe, nalakwaanguyaa nta ikura, kulairyaa nta isavaa-fo.
Mavavaso Asomwa wo Myaaka Mfungare
9Mose kareiya uvavaso yelu, kaniingya makohani, wo vana va Levi, mmbo yewo veekurika isanduku lya mavavaso a Nndumi Iruva, na vamiku woose va Israeli 10Mose kavavia, yoo masiyony a wo mwaaka wa mfungare, nto wa isarya, kyeeri ekyo kyikee kivavasye kya sukukuu ya matengo, 11elyi Israeli vashekooraa mbee ya Nndumi Iruva, Iruva wafo ando yoo ashesauwaa, nng'u kushesommyaa Israeli woose Uvavaso elu, weete, 12Sang'irya vandu woose, womi na vaka na vana, na veny vakee kwafo, naambo woose weete neekulosha, weenndye Nndumi Iruva, Iruva waany, naambo vatani shaasa uvavaso elu lwavavia. 13Na vana vawo valandeite llyo veete neekulosha kwa Nndumi Iruva waany, mikonu myoose mushekaa urukeny yelo kwalukillya lwa Yordan.
Uramba lwa Iruva lwa Mafurumyony kwa Mose
14Nndumi Iruva, Iruva kavia Mose, kwiishi, ifwa lyafo nkufii; nkyevaanga Yosua, neeni mundekuummbya alya yeminy yeele, naambo shimmbavavasye kyeetana. Mose na Yosua vakeenda, vakandefika yoo yeemeny elyo. 15Nndumi Iruva, kalollyo yoo yeminy ekee sha ngo ya ifishi na yo ikasalala yoo mwaangony wa yeema. 16Naasa Nndumi Iruva kavia Mose, Lola ulaalu mmbo kukeefwa, kusange na vande vafo, lyo vandu yeva mmbo vashesoraa maruva engyi neeshira yeny, efo urukeny yelo, vafishe kyaasa kyakwa shilevika nawo. 17Nalyo llyo unyafi lwakwa lusherwaa kimaruma kyawo shivare neevasuruma kisangu kyakwa, varumatwa, neesheyo mfindo firavi nkuka na nyinyira. Nkonu yeto vasheambaa, “A nyira ekyi kyalweenngye findo firavi indi nshi elyi Iruva weeru nalakee nnang'ani yeeru?” 18Neeny mmbo nsheengeraa ikaa kwaasha nawo deny, kyeenndwa ni uravi vatannyi na isora maruva engyi. 19Kyasia ulaalu reiya kiimmbo ekyi, kuloshe vana va Israeli vakyiimbe naambo luve ukureekyi kwawo, wo vana va Israeli, 20Mashika kyeeri shimaa ivaata efo urukeny yelo shilevikya vande vawo kyaasa nshevaniingaa, uruka yelo lwiishwe malela na wuki, nawo elyi valyaa vawuure nisha neesennya, naasa llyo vasheinndukyaa maruva engyi vaarunndye neeshimina yeny, vafishe kyaasa kyakwa. 21Nawo kyeeri vashesheyoo mfindo efyo firavi fiingyi, kimbo ekyi mmbo kishesalala sha ukureekyi kwawo, mashika nkisherekaa efo kaniny ka vana vawo-fo, mashika shilollye makusaro awo shaasa akai, kulaore nta shammbafita efo urukeny yelo shilevavikya kyaasa. 22Naasa llyo Mose alereiya kiimbo ekyo nkonu yeto mweni, kalosha vana va Israeli. 23Naasa kavavasya Yosua wa Nuni, kammbia, “Va ntakusu kutire nrima nkaari, mashika nnyewe kurwaa vana va Israeli urukeny yelo shilemuvikya kyaasa, Neeny nsheendaa shiryani neewe.”
24Naasa Mose eekyimaa ireiya marero a uvavaso elu na kyitabu ekyi, 25llyo Mose alevavasya Valevi yewo veepoo isanduku lya mavavaso lya Nndumi Iruva, kavavia, 26Waryeny kyitabu ekyi kya mavavaso, mukyivike yoo isandukuny lya kyaasa kya Nndumi Iruva, Iruva waany, kiveny ukereekyi. 27Mashika uravi lwafo shilwiishi na wuumu lwa nrima wafo, lyo loleny yeny shiiyo, shikee neeni, mmbo mulelyamarya Nndumi Iruva, Iruva waany elyi nshefwaa! 28Sheenngyeny vamiku vany na vashilyi woose va ngyufyari toose, naambo shivavie findo efi, shiidimi ivakureekya. 29Mashika shiishi deny elyi shifwaa mmbo muvaa varavi deny, na yaalashika mirima deny mulasore shia ilya shilemoora, na lyeefurummya mmbo mushesheyoo mfindo fikasha kiinani na shaasa mushelyamaryaa Nndumi Iruva, Iruva na inrosya ngoo kya mashora maravi a maako any.
Kyiimbo kya Mose
30Mose kasommya vana wa Israeli marero moose a kiimbo ekyi vakeeta.
Currently Selected:
NKUMBUYE WA UVAVASO 31: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
