NKUMBUYE WA UVAVASO 26

Fyaanu fya Fimu

1Neelyi kwammaa yaanga efo urukeny yelo Nndumi Iruva wafo alekuniinga luve ding'u yafo, 2fimu fya mbee kushiilulaa fivike kikabuny kweende na yoo Nndumi Iruva wafo ashekooraa kushesenndyau irina lyakwe. 3Kunderwaaya nkohani yeto atiri ikamba kummbie, yeny mmbo shaana Nndumi Iruva wakwa elyi ashaata kunu urukeny yelu shaasa alevikya vande valya veru kyaasa. 4Nawe nkohani mmbo ashewaryaa kikapu yekyo nakivike yoo kitareny kyeerasya mbee ya Nndumi Iruva wafo. 5Neewe llyo kurouwe, Nde wakwa mmbo ekee Mwarami mwiiraaraa efo, kandesoka na Misri kavafo muny, kang'anya-fo kava ufyari uniini nnu, lla shaasa valeenda-fo vekee vaangu. 6Vamisri mmbo valelusisya na mashora moomu a ushinga. 7Llyo luleiya na Nndumi Iruva wa vande veru, Nndumi Iruva kaarannya kiiyo kyeru, 8nawe koorwa woko lwakwe lwa finya koora-fo wiidimi na ngyende, 9kutani aleluuta-fo kashelufita yaa neeluniinga uruka yelu lwiishwe malela na wuki. 10Nkyo ulaalu, lola shammeende fimu fya mbee kwafo woi Nndumi Iruva. Naasa kuvike si yoo mbee ya Nndumi Iruva, Iruva wafo, kufiirye ndi yoo mbee yakwe. 11Kufureny na mbora na mesha moose yoo Nndumi Iruva wafo akusimba, yewe na va mmba yafo, kulye na Llevi wafo, na muny yeto akee kwafo.

12Elyi kumaa yuuta kiraso kya kyenga kya ikumi wo mwaaka wa karaaru, kurambikye Valevi, na muny na mwana wa ngwera, na nka wa ding'u, nawo valye neewuura kyuuka kwafo, 13Llyo neewe kwaambe, mbee ya Nndumi Iruva wafo, “Findo efi fisha mmbo shafyuuta kyeny kwakwa naambo shyeengye Llevi na mwana wa ngwera na nka wa ding'u shaasa kuleshivavasya, nta nshilerekyo nta yiira mbai-fo.” 14Nta nshafyeende shikee kiiyony fo nta shikee ntefusu-fo, nta nshileniinngya maruva engyi-fo, mmbo shilearannya unyanga lwa Nndumi Iruva wakwa, shatana shaasa aleshivavasya. 15Woi mmbee lulole uka iruveeu kuvikye vandu vafo va Israeli mbora na uruka yelo kuleniinga vande veru lwiishwe malela na wuki.

Vandu va Nndumi Iruva

16Inu Nndumi Iruva wafo mmbo akuvavasya kutane fya usumanu, naasa soraany na nrima wafo moose na ngoo yafo shoose. 17Inu mmbo kwairikya Nndumi Iruva sheelyi mmbwe muni Iruva wafo kwanremmya mmbo kisumani isora shia takwe, na mavavaso akwe, na usumanu lwakwe, na yaarannya unyanga lwakwe; 18inu Nndumi Iruva mmbo amutira sha vandu wakwe vasauwe muve vakwe, shaasa alemuvikya kyaasa, neewe nkuti kuringe mavavaso akwe; 19nawe mmbo ashekung'anisaa efo vanduny va masanga engyi moose, nakuniinge nnduma, na irina, na wiindi, muve vandu veele va Nndumi Iruva waany, shaasa alemuvikya kyaasa.

Currently Selected:

NKUMBUYE WA UVAVASO 26: MAS2

Highlight

Compare

Copy