NKUMBUYE WA UVAVASO 24
24
Yaalyika na Ilakana na Nka
1Kwakooya nndu oora nka, numa kalollya teve shive kwakwe nawe kakunda ilakana nawe, kyasia, nareiye barrwa ya ilakana nawe nanrammbikye, nansomuteeny kwakwe. 2Neelyi ammaa isomuka kwakwe atiri muumu wendoorwa ni nndu ungyi. 3Na nndu yeto ungyi nawe kwakooya answa, nawe-da navereiya barrwa ya ilakana nawe nanrammbikye nansomute kwakwe. Na kwakooya mmi yeu wa kavii afwa, 4mmi ulya wa mbee nalammbuiye-fo, mmbo ammba ntefusu, nkyikasha kwa Nndumi Iruva. Naasa kulasheetefusa uruka lwa Nndumi Iruva wafo akuniinga.
Uramba lungyi
5Kyeeri nndu oora nka naleende fireny-fo nta nalaniingwa ishora lyoose-fo, kutani mwaaka wasia ekee na nkaakwe. 6Kwaakuya nndu kindo, kulasheevika iwe lyakwe lyeesa nswa lyive ando a vayo-fo, kwatana indo mmbo kwafirisa muu wa nndu.
7Kwakooya nndu aiva mwanamaye Mwisraeli na imwashallwa ishinga, we nkuti nafwe deny, niindo uravi lusye kwany,
8Na kya ndwari ya ivave, loleny nnu mutane shaasa shilemuvavasya yeni Valevi. 9Kumbweny shaasa Nndumi Iruva wafo aletannya Miriamu kulya shia llya muleuka Misri.
10Elyi kwaakuya mwanamau kindo kulasheenda mmba kwakwe indemfua-fo. 11Yewe kaa yoo poo we muni nakweenngye yekyo akunndye ikuniingya kyeekutaa. 12Na kwakooya ni nndu nkiva kulakae na kindo kyakwe kutani kwakya-fo. 13Nkuti kummbiirye kwiishiilaa, nalale nisha neekukunndya mbora, nalyo lyive ni iviiri kwafo Nndumi Iruva wafo akulyimya.
14Kulalembe nndu wa weesi akee mwaanguye na nkiva, kwakooya ni wa kwany ao muny, akee kwany ao efo mmba kwafo; 15Nniinge weesi lwakwe kulandeile, mashika ni nkiva, nawe ng'u avikye nsia, naambo nalasheefuuya Nndumi Iruva kimaruma kyafo kyikuviiye ulyamari. 16Kyeendwa ni ulyamari vana valawaawa ando a vandeye-fo, nta vande valawaawa ando a vana-fo. Wo nndu mmbo ashefwaa kimaruma kya ulyamari lwakwe muni.
17Kulaevete usumanu lwa muny yoo mwaanduny, nta lwa mwana wa ngwera, nta kulawarye soori ya nka wa ding'u kyeetaa kindo kya nndu. 18Mmbo kushekummbwa shaasa kwekee ishinga kulya Misri, nawe Nndumi Iruva wafo kakwaauwa-fo, nkyo inu kwavavasyo itana indo.
19Kyeeri kukeeilula fimu fyafo nreminy, neewe kwarekyo-fo kikonde kiymwi kulawuye numa indekyoonndwafo-fo, ra-fo kikooywa-u mmuny ao mwana wa ngwera ao nka wa ding'u, naambo Nndumi Iruva wafo nakuvikye mbora mashoreny afo moose.
20Kyeeri kusheyayaa ndunda ta mikuu yafo, kulawuiye-fo lya kavii-fo, yoo asaa-fo areeyo muny na mwana wa ngwera na nka wa ding'u.
21Na kyeeri kukeeyaya ndunda ta misabibu kulawuye-fo lya kavii-fo, yeto tisaa-fo tive ta muny, mwana wa ngwera na nka wa ding'u.
22Neewe kummbwa mmbo kwekee ishinga kulya Misri, nkyo mmbo shakuvavasya inu kutani indo.
Currently Selected:
NKUMBUYE WA UVAVASO 24: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
