NKUMBUYE WA UVAVASO 22

1Kwakooya kwalollya ng'umbe ao yoonri lya mwanamau lyiirekaa, kulasingire miso-fo, nkuti kuviirye mwanamau. 2Na kwakooya mwanamau nalakee kufii, ao kwakooya kulamwiishi irwaa kyeny kwafo kukee nayo neelyi asheiruuya kummbiirye. 3Na nshungu wakwe utannyi indo, naakwa nkindo kyakwe kyareka, kevetana indo, kulave sha nndu nalalollye-fo.

4Na kwakooya nshungu wakwe wawa si, wiipoo, ao ng'umbe, kulave sheelyi kulalollye-fo. 5Nndu nka nalarae soori ta kyuumi-fo, nta nndu nndumi nalarae soori ta kyika-fo, mashika mwiitana indo mmbo atana uravi kwa Nndumi Iruva, Iruva wakwe.

6Kwakooya kifuri kya ndeye yoo nriny ao yoo si kitiri maana a ndeye ao mayai a vayo, na ndeye yiilaaye, kulaipoo ndeye yeyo na maana a vayo-fo, 7nkuti kure ndeye yeyo irumbuke, lyo maana yoo kutiri mumu wa yaakurika, llyo yewe kushetira iviiri fyeeri fyafo. 8Kwakooya kwatana mmba ringitya kai ka vayo na kishi naambo nndu nalawe ooka mmbeeu wa mmbaafo nafwe. 9Nndeny wafo wa misabibu kulavaaye mbeu taalashikye-fo naambo elyi kushiilulaa mbeu ilasheereka.

10Kulasande ng'umbe na nshungu kyeeri kukeerema-fo. 11Nta kularae soori shisasande ruu tingyi-fo. 12Fumya mise efo sooriny yafo ya yeerya taari toose.

Wiindi lwa Mbony ta Ummba

13Naasa kwakooya nndu oora nka na numa kansua, 14neerera findo fya sony kyakwe eshambaa “Mmbo shileora nka yeu shilankooye na wiiyya lwakwe; 15llyo ndeye na maye wa mwana yeto wa kyeny vashelolaa soori takwe shaasa tifwani, vaore vamiku va muriyoo mwangony, 16na ndeye wa mwana yeto navie vamiku, ‘Nndu yeu mmbo shilenninga mwana wakwa nave nkaakwe, lyo ulaalu nnyakinkunndye-fo.’” 17Loleny ulaalu mmbo amwekerya marero a sony eeshaambaa nnyalekooya kwakwe wiiya lwakwe-fo, lyo yeni nkyeloleny soori takwe shaasa tifwani. Nawo vamiku va muri llyo vaalallwe soori yeto neetilola. 18-19Naasa llyo vamiku yewo vatose nndumi yeto fesa iyana, vaniingye ndeye wa mwana yeto wa kyeny, mashika elyi atannya mwana yeu wa kyika wa Israeli kindo kilasumani, na mwana yeu neengere iva nka wakwe nalatiri muumu weelakana nawe, 20Lyo kwankooya nndu yeu mmbo alerera kya dede vamiku valalollye kwakwe wiiya lwakwe, 21llyo vashesomutaa mwana yeto yoo mbee ya mmba ya ndeye na womi va muri vankape na mawe tana afwa, kimmba aletana kya urung'ani kunu Israeli katana ulyamari yelo ekee kwa ndeye, llyo kusheutaa uravi kwany.

22Kwakooya nndu aaramwa eelele na nka wa nndu, vawaawa woose veevavii, niindo kusheutaa uravi kunu Israeli.

23Na kwakooya mwana wa kyika afinngyo ni nndu, na nndu ungyi kankooya muriny kalala nawe, 24llyo woose veevavii vashesomutwaa yoo poo ya muri, vakapwa na mawe tana vafwa, ulya wa kyika mashika elyi kulore aleffwa, neeto wa kyuumi ni elyi alala na tindi wa nndu ungyi, Niindo kusheutaa uravi kunu Israeli.

25Lyo kwakooya nndu nndumi akooya mwana wa kyika efo mbateny nawe ni tindi wa nndu, kalala nawe, nndu yeto nkuti nawaawa, 26lyo yeto wa kyika-fo mashika nnyatiri ulyamari lunkooye nafwe-fo, mashika we mmbo kyava sheelyi nndu awoya ungyi kammbwaa, niindo kyikai, 27kimmba ankooya efo mbateny kantira nawe kaffwa, lyo nalaoni nndu amuuta.

28Kwakooya nndu alollya mwana wa kyika nalafinngyo, nawe kantira kalala nawe, vakalollyo, 29nndu yeto nataa ndeye wa mwana yeto fesa makumi araanu, naasa naveny nkaakwe, kimmba amwaafinya, nta nalalakani nawe-fo.

30Kulave nndu apaana nka wa ndeye-fo, nta isukwa masara akwe-fo.

Currently Selected:

NKUMBUYE WA UVAVASO 22: MAS2

Highlight

Compare

Copy