NKUMBUYE WA UVAVASO 21

Nndu Akooyo Afiyye

1Naasa kwakooya ashelollyoo nndu afiyye yoo shia, efo urukeny yelo Nndumi Iruva wafo akuniingaa, nawe nalaishiwa ni vi ammbwaa, 2vamiku vaange efo muriny ando amwi na veeleta vashelola-u swaa koose, 3neefo muriny wa kufii vamiku va vayo vaute-fo ngashe ya taa ilanderemi ao irunda ishora lyoose, 4vamiku yewo varwaa ngashe yeyo neefo imungony lyitiri mura, lyo lyilakee ireme nta kindo, vandefisha ngashe yeyo singo. 5Nawo makohani wo vana va Levi vasembeye kufii, vavikye mbora mashika llyo ishora lyawo, neeringa usumanu loose 6nawo vamiku woose va muri yeto ukee kufii na yoo nndu alefiyya vasangye maako awo yoo uwe ya ngashe yeyo ya taa yafishwa singo, 7varouwane veeshaambaa, “Maako eru nnyabuswa samu ya nndu yeu-fo, nta miso eru nnyalollya-fo. 8Woi Nndumi Iruva sarya vandu vafo va Israeli kulevawouwa, nta kulalweengye uvingo lwa samu lulatiri nayo mbese-fo.” Neeni mushesaryoo. 9Niindo kusheutaa urekwa lwa samu kulatiri nayo mbese, kutani fya songosiny mbee ya Nndumi Iruva.

Nndu Nka Aipowa Ushingeny

10Na kyeeri kusheendaa fireny ikapana na vakiduva vafo na Nndumi Iruva navavike maakony afo kwiidimi itira mifungwa, 11na nnang'ani yaawo kwalanga nka mmbe neekunda imwaallwa nka wafo, 12kyasia, mwiipoo, lyo noote nrwe wakwe, navyaa na ngyala takwe, 13naalashe na soori tilya eeree, nakukayeeny kwafo, lyo nakae rembo mwiiri umwi naiye kya ndeye na maye valefiiya fireny, llyo kunrwaany nave nka wafo neewe mmi wakwe, 14Elyi numa kwakooya akusukya, lleke na kweenngye, nta kulankumbe sha kishinga-fo, mashika yewe mmbo kwemwaafinya.

Ding'u ya Mwana Mbee

15Na kwakooya nndu atiri vaka vavii, yeto umwi kankunda na yeto ungyi nalankundye, na woose vakamwiirya vana va vomi, neeto alakunndye kapooka we yiira mwana, 16llyoony nkonu wa ivaniinga ding'u vana yewo, mwana wa nka yeto ankunndye nalamwallwe mmbwe wa mbee nasongoye yeto wa nka nalakunndye-fo, mashika ulya asongoye mmbwe asongoye-da. 17Nairikye mwana wa nka yeto nalankunndye nanniinge waavi kavii lwa findo fyakwe, mashika nkuti nairikye mwana wakwe mmbee nanniinge waavi lunsumannyi.

Mwana Alatiri Wiindi

18Kwakooya nndu atiri mwana llyan'ga nalashiirikyaa nta ndeye nta maye, naakwa akapwa nalashiitaa, 19naasa ndeye na maye vantire vanrwaa kwa vamiku va muri, 20vavieny vamiku yewo, “Mwana yeu weeru mmbo akee llyang'a nalekeyiita nta kindo avioo, kava nnangwa kava ntuusi.” 21Llyo womi woose va muri vankape na mawe, nafwe; neeni niindo musheutaa uravi kunu Israeli koose, neewo vashiitaa woose vakooye yiiryaa.

Mavavaso a Mmwaasi

22Kwakooya nndu atana ulyamari lunkooye nafwe, nawe kawaawa neevanikwa nriiny, 23lyo nkuti narikwa nkonu yeto mweni, nnying'a wakwe ularewa-u kwiile-fo, mashika yeto avanikwa nriiny nkidengo kwa Iruva, niindo kivaa naambo mulasheetefusa uruka yelo Nndumi Iruva wafo akuniingaa luve lwafo.

Currently Selected:

NKUMBUYE WA UVAVASO 21: MAS2

Highlight

Compare

Copy