NKUMBUYE WA UVAVASO 2

1Naasa llyo luleinduka lukaipoo kyaaro ekyo kya kasa lwiilatyaa yeeve lya Siria, shaasa Nndumi Iruva aleshivavasya, lukativa tiva alya mafumbuny a Seiri kyaasha deny. 2Nndumi Iruva kashivia, 3Ekyo mwantiva tiva yaa kifye, ulaalu indukeny taari ya ndoo. 4Neewe vavasya vandu ule, Mmbo mushiiraa urukeny lwa mwanamaye waany Esau, nawo mmbo vamweereyaa, nkyo loleny nnu, 5mulavaruye mwaandu, mashika yeni mmutiri mumu ipaana uruka lwawo-fo, nta uvayo lumwi fo, ni elyi shilemmaa iniinga Esau mafumbu a Seiri ave akwe. 6Kwawo mmbo mushuura shoonga na mura kwa fesa. 7Mashika yewe Nndumi Iruva, Iruva mmbo akuvikye mbora mashoreny moose a maako afo, kavemanya na shaasa kuleraa raa kunu kasa eka kang'ani ando a myaaka makumi aana lyo Nndumi Iruva wafo kakukayau kulaanguyo nta nkindo. 8Naasa Lukaira urukeny lwa vanavamaye veru wo vana va Esau kulya Seiri, lwiishiraa shia ya Araba, kuuka Eilati na Esion-geberi. Neese lukainduka lukasora shia ya Moabu, 9Nndumi Iruva kashivia, Lola kularuuye Vamoabu mwaandu nta kulakukikiseu ikapana nawo, mashika yoo urukeny kwakwe nshishekuningaa nta kindo kimwi-fo mashika, muri wa Ari mmbo shileuniinga vana va Loti uve wawo. 10(Vandu veefo elyo mbee ni Vaemi, nawo vakava vandu vaasha vawongye, nawo ni veengyi, mmbo vekee ma-vandu deny. 11Nawo mmbo vakee ma-vandu maniini, lyo wo Vamoabu vakavavaanga Vaemi. 12Na Vahiri nawo mmbo veekaa Seiri elyo kasha, lyo vana va Esau vakandevakapa neevawaa, vakakaa ando awo, shaasa Israeli aletana llya Nndumi Iruva alenniinga ding'u yakwe) 13Ulaalu nkekwiipony mundekyillya usoka lwa Seredi, Neese lukeenda lukakillya usoka yelo. 14Llya luleuka alya Kadesh-barnea fika Sereedi mmbo kileva kyaaro kya myaaka makumi araru na nyanya, kutani kyeeri kilya vandu valya valemaa iwaawa fireny woose vakasia, shaasa Nndumi Iruva alevavasya. 15Nalo woko lwa Nndumi Iruva lukavalammya neevamamita valakilollyo-se.

16Naasa kyeeri vandu yewo va fira valemaa imamitwa. 17Llyo Nndumi Iruva aleshivia, 18Inu ruukeny Ari mwishiiraa urukeny lwa Moabu, 19neelyi kusheserikyaa kufii na Vaamoni kulavaruuye mwaandu-fo, nta kulakukikise nawo-fo, mashika yoo urukeny lwawo nkwiiyoo kindo nshekuniingaau-fo, mashika nng'u shileniinga vana va Loti ive ding'u yaawo, 20(Uruka yelo nalo lweekee lwa Varefai, shaasa kirerwaa Varefai mfo veekai, lyo Vaamoni mmbo vakavavaanga Vasamsuni, 21nawo ni veengyi, vaasha na vawongye sha Vaanaki, lyo Nndumi Iruva mmbo evamaa, nawo vana va Vaammoni vakakaa ando awo. 22Niindo-da aletannya vana va Esau, vakee Seiri, llya alemaa Vahori nawo vakakaa ando awo fika inu, 23na Vaavi valya veekee urukeny lulya fika Gaza mmbo valemamitwa ni Vakaftari veeukye Kaftori, nawo vakakaa ando awo). 24Kyasia ipoony kyaaro kyany, muruuke imungo lya Arnoni, neeny mmbo nshevikaa mangyi ya Vaamoni we Sihoni maakony any, na mangyi ya Heshboni nawe, na uruka lwawo, muwaane nawe ikapana neetira uruka. 25Neeny ulaalu mmbo shiifo nsheresee vandu woose wo ando vakai, nawo kyeeri vashiita mmbony tany kuti varereme ruu, neetirwa ni wooru kimaruma kyafo.

Waisraeli Vavinga Mangyi Sihoni

(Mee 21:21-30)

26Naasa llyo shileruma vandu vauka alya urukeny lwa Kademoti veende kwa mangyi Sihoni wa Heshboni veende varye marero a ufoo, vammbie, 27Nkyeluseiye lwiire urukeny lwafo, yoo nnang'ani shisore shia sheni shilasheenda mbai. 28Nawe neerikye ilukumbya shoonga urukeny lwakwe, nalukumbye na mura nato, shishiiraa yoo urukeny lwakwe. 29Kive shaasa vana va Esau valera lukaira urukeny lwawo lwa Seiri, na Vamoabu yewo va Ari, naasa shikillyeny Yordan lwaange urukeny yelo luleniingwa ni Nndumi Iruva, we Iruva weeru. 30Lyo mangyi Sihoni wa Heshboni nnyalelura lukeera urukeny lwakwe-fo, kimmba Nndumi Iruva we Iruva weeru alemuumisa nrima wakwe kava llyang'a naambo nammbike maakony eru. 31Naasa Nndumi Iruva kashivia, Lola ulaalu mmbo nkeevikan Sihoni maakony any, angusyany itira uruka elo lwakwe luve lwany. 32Naasa Sihoni keepoo vandu vakwe kapooka ikapana neese alya Yahasa. 33Nndumi Iruva, Iruva weeru kammbika maakony eru, lukankapa we na vana vakwe na vandu vakwe woose. 34Lukavinga miri yakwe myoose kyeeri ekyo, wo muri wa vandu lukaulyamara na vaka na vana deny, nta llulesaara-fo nndu-fo. 35Lyo ng'umbe tawo mmbo luletaallwa shoonga yeeru, na findo lulekooya efo miriny yaawo lukafikamara. 36Uka yoo Aroeri muri yeto ukee mbai ya kyaandaa kya Arnoni na muri yeto ukee efo imungony yelyo kufike Gileadi, nkulekaau muri nkaari kweru iluvinga-fo, myoose Nndumi Iruva, Iruva weeru mmbo aleivika maakony eru, kuuta uruka lwa vana va Amon llulelupaana-fo; 37kusande na taari yeyo shoose ya mura ya Yaboki na miri yeyo ya mafumbuu, na wo ando Nndumi Iruva, Iruva weeru aleluvavasa lulampaane.

Currently Selected:

NKUMBUYE WA UVAVASO 2: MAS2

Highlight

Compare

Copy